ပ္ဍဲတွဵုရးဍုၚ်မန်ဝွံ ပ္ဍဲကဵုပွိုၚ်ဍုၚ်နာနာဂှ် နူတနေံဏံ ပ္တိတ်ကဵုသြန်ဒမၠေံတဵုသြောံကသီု မွဲဨက (၃) ကိုဋ်ဒကေဝ်ကီုလေဝ် ညးကၠုၚ်စိုပ်ဂၠေံသြန်အတိုၚ်တြေံဟေၚ်နွံရောၚ် သၟာဗ္ၚတံ ဟီုရ။
အပ္ဍဲကဵုကိုန်စဳဇန်ကမ္မယှေန်ပၞာန် ပွိုၚ် (၁၀၀) တ္ၚဲဏံ သွက်ဂွံသၠုၚ်ပ္တိုန် ပရေၚ်ပိုန်ဒြပ် ဘဝသၟာဗ္ၚတံဂးတုဲ ဂိတုမေ (၁၂) ၊ နူတနေံဏံ နူသၞာဲဒဴတိုက်သြန် ကေုာံ ညးစၞးကၠတ်ထဝ်ဂမၠိုၚ်၊ ဂကောံအလဵုအသဳတွဵုရးတံ ပ္တိတ်ကဵုမံၚ်သြန်ဒမၠေံတဵုသြောံရောၚ် ဂွံတီကေတ်ရ။
သြန်ဒမၠေံ သွက်တဵုသြောံကသီုကဵု သတ်ဆုတၞဟ်တၞဟ်ဂမၠိုၚ်ဂှ် ပ္တိတ်ဂၠိုၚ်ပ္တိုန်ကဵု နူသၞာံတုဲတေံ ဗဒဲါၜါဆကီုလေဝ် ဟိုတ်နူစရိတ်တဵုလွဳ သၠုၚ်တိုန်ဟွံမွဲကဵုသၞောတ်ဗ္ၜတ်ဂှ်ရ က္လေၚ်ဂွံတမ်စရိုတ်တဵုလွဳဟွံသေၚ်ရောၚ် သၟာဗ္ၚ နူဒေသပံၚ်မွဲတၠ ဟီုရ။
“နူတနေံဏံ အခိၚ်နူဂယးဂှ် အာကေတ်မံၚ်သြန်ဂၠေံအိုတ်ရ။ မွဲဨက ဂွံ (၃) ကိုဋ်ရ။ ကဵုဂလိုၚ်တိုန်လေဝ် ဟွံတၟေၚ်ပုဟ်။ ၚုဟ်ထဲတိ၊ ၚုဟ်ရတ်သီ၊ ၚုဟ်ဝဲါတံ သၠုၚ်တိုန်မံၚ်ဖအိုတ်ဏောၚ်တှေ် ဟွံရုံပုဟ်။ ၜိုတ်ကဝက်ဟေၚ် ရုံမာန်ထေၚ်ရ။ လၟုဟ်ဏံ ၚုဟ်သၟာကမၠောန်တ္ၚဲမွဲတၠဂှ် မွဲတ္ၚဲတှေ် ဒးကဵုမံၚ်ဗဒဲါကိုဋ်ရ။ ဗီုလဵုဂွံပ ဟွံတီရပုဟ်” သာ်ဝွံ ဟီုရ။
စၞးဒးသၠုၚ်ပ္တိုန်ကဵု လၟိဟ်(ပမာဏ)သြန်ဒမၠေံဂှ် ယဝ်ဖအောန်ဖျေံ ၚုဟ်ကၠေၚ်စက်၊ ၚုဟ်ဝဲါမာန်မ္ဂး သွက်သၟာဗ္ၚတံ သာတုဲဂုန်ဖဵုနွံရောၚ် ညးဆက်ဟီုရ။
သၞာံတုဲကၠုၚ်တေံဝွံ ဝဲါဓာတ်မွဲရိုက် အကြာ (၉) ဠက်ဂှ် အခိၚ်လၟုဟ်ဏံ သၠုၚ်တိုန်အာ စဵုကဵုဗဒဲါ (၂) ကိုဋ်ဒကေဝ်တုဲ ကၠေၚ်စက်ဂမၠိုၚ်ဂှ်လေဝ် သၟာၚ်နူရာန်ဂွံဝါတ်ဂှ်မ္ဂး ကၠာတေံ မွဲစေဝ် ၜိုတ် (၅) ဠက်ဂှ် လၟုဟ်ဏံ သၠုၚ်တိုန်အာ စဵုကဵု (၈) ဠက်ဒကေဝ်ပြၚ်ရောၚ် ဂွံတီကေတ်ရ။
တုဲပၠန် အခိၚ်လၟုဟ်ဏံ ၚုဟ်သြောံ ကေုာံ သတ်ဆုတၞဟ်တၞဟ် ဟွံသၠုၚ်တိုန်တုဲ စရိတ်တဵုလွဳ ဟွံက္လေၚ်စှေ်မွဲသာ်ဂှ်ရ ဒးဒှ်မံၚ်ဂဝိၚ်ကဵု အကာဲအရာဒှ်ကၠုၚ်ခတှ်နွံရောၚ် ဂးရ။
“ၜဲတဵုလဝ်အခိၚ်က္ညၚ်တံဂှ် ဟိုတ်နူခက်ခုဲကၠေၚ်စက်ဂှ်ရ တိတ်အောန်တုဲ ၚုဟ်လေဝ်ဟွံဂွံပုဟ်။ ပရဲဟွံမွဲတှေ် သၞာံဏံ ချပ်မံၚ် ဟွံတဵုသြောံကသီုရ။ တဵုတှေ်လေဝ် ဗီုဂွံပရဲ ဟွံမွဲပုဟ်။ ဟွံသေၚ်တှေ် ဒးဂဝိၚ်ကဵု ဒှ်ခတှ်ရ” သာ်ဝွံ သၟာဗ္ၚ နူပွိုၚ်ဍုၚ်ကျာ်မြဟ်မွဲတၠဂှ် ဟီုရ။
ဟိုတ်နူစရိတ်တဵုလွဳသၠုၚ်တိုန်ကၠုၚ်ဂှ်ရ သၟာဗ္ၚလ္ၚဵု အပ္ဍဲတွဵုရးဍုၚ်မန်ဂှ် သၞာံဏံ သွက်ဂွံတဵုသြောံကသီု ဖအောန်ဖျေံလၟိဟ်ဨကကီု ဟွံသေၚ်မ္ဂး သွက်ဂွံဒေံါဇူကီုဂှ် စဳဇန်မံၚ်အိုတ်ရ။
ရာသဳတဵုသြောံကသီု သၞာံ (၂၀၂၅) တုဲကၠုၚ်ဏံ စရိတ်သြန်ဒမၠေံတဵုလွဳဂမၠိုၚ်ဂှ် နူဂိတုမေ (၁၉) စပ္တိတ်ကဵုတုဲ သၟာဗ္ၚက္လေၚ်လဴကဵုလဝ် ခတှ်ဟွံမွဲတံဂှ် မွဲဨကမ္ဂး မွဲကိုဋ်ဘာ်ဒကေဝ်၊ ကံက်ကေတ်အိက်သြန် (၅) တၟံကၠံတုဲ ဂၠေံပ္တိတ်ကဵုမံၚ်ရောၚ် ဂွံတီကေတ်ရ။
က္ဍိုပ်သ္ကိုပ်ပၞာန်တြေံ ဥူမေန်အံၚ်လှာၚ်ဝွံ နကဵုကာလပရေၚ်ပြံၚ်လှာဲ အပ္ဍဲပွိုၚ် (၁၀၀) တ္ၚဲဏံ သၟာၚ်နူလၟေၚ်ကမၠောန်ပရေၚ်ၜိုဟ်လလမ်တုဲ ပရေၚ်ဖောအ်ဗြေဝ်ဒေသ၊ ကဏ္ဍပရေၚ်ပညာ၊ ပရေၚ်ထတ်ယုက် ကေုာံ အရာမနွံပၟိက်ဂမၠိုၚ်ဂှ်လေဝ် ကၠောန်သ္ပရေၚ်တၠုၚ်ကဵုရောၚ် ကဵုဏာကတိတုဲဂှ် နူကဵုဂကောံကွာန် / အရာပ်မွဲတဆံၚ် စန္ဒက်ဒၟံၚ်ညးဍုၚ်ကွာန်တံရောၚ် ဂွံတီကေတ်ရ။
