ပ္ဍဲကွာန်လှာ၊ ပွိုၚ်ဍုၚ်မုဟ်ဍုၚ်၊ တွဵုရးဍုၚ်မန်ဝွံ သၟတ် (၂) တၠ ဒးဒုၚ်ရပ်လဝ်ကဵု သ္ကိုပ်အုပ်ဓုပ် ပ္ဍဲသၞာံ (၂၀၂၅) တုဲကၠုၚ်ဏံဂှ် ဒးဒုၚ်ပလံၚ်ဏာ တန်ဗ္တောန်ယိုက်ဂၠေၚ်ပၞာန် ဗွဲအဓမ္မတုဲ စိုပ်ဒၟံၚ်မုက်ပၞာန်ရောၚ် ညးစုက်လုက်ကဵု ဂကောံသ္ၚိကၟိန်တံ ဟီုရ။
နကဵုအမှုကၠတ်ဂၠံက်၊ ကြဴကြာန်တုဲ သၟတ်ဒေသကွာန်လှာ အာယုက် (၁၇) သၞာံၜါတၠ၊ ဒးဒုၚ်ရပ်ကဵု ဂကောံသ္ကိုပ်အုပ်ဓုပ်ကွာန် ပ္ဍဲဂိတုဂျူလာၚ်၊ သၞာံ (၂၀၂၅) တုဲကၠုၚ်ဏံဂှ်တုဲ ကေတ်လဝ်အရေဝ် ပ္ဍဲဗဒိုပ်ဗၠာဲသၟိၚ်ဍုၚ်ကၟာဝက်ရောၚ် ဂွံတီကေတ်ရ။
ပၞောဝ်ကဵုသၟတ်ၜါတၠ ဒးဒုၚ်ရပ် လလအ် (၅) ဂိတုတုဲဂှ်မ္ဂး သၟတ်မွဲတၠဂှ် ဟွံဒစးဒုၚ်ကဵုပရိုၚ် ကုသ္ၚိကၟိန်မွဲသာ် ပလံၚ်ဏာထံၚ်ကျာ်မြဟ်တုဲ နူဂှ်မွဲတဆံၚ် ဆက်ပလံၚ်ဏာ ဌာန်ဂအုပ်ပၞာန်ရးအဂၞဲရောၚ် ညးစုက်လုက်ကဵု ဂကောံသ္ၚိကၟိန်မွဲတၠဂှ် ဟီုရ။
ယၚ်သၟတ်ဂှ်ဝွံ အခိၚ်လၟုဟ်ဏံ စိုပ်မံၚ်ပ္ဍဲဗလးမုက်ပၞာန် ပွဳဗွိုၚ်ဍုၚ်သေတ်တိုဲ၊ တွဵုရးရခေၚ်ရောၚ် ဂးရ။
ညးစုက်လုက်ကဵု သ္ၚိကၟိန်မွဲတၠဂှ် “အေ ကောန်ၚာ်ဂှ် မွဲဟရာံဏံရ ဆက်နၚ်ဖုၚ်ကဵု ရဲဍေံ ပ္ဍဲကွာန်လှာရ။ ဍေံလဴထ္ၜးစ ပရူဍေံရ။ လၟုဟ် စိုပ်မံၚ် ဍုၚ်သေတ်တိုဲရ။ ပ္ဍဲမုက်ပၞာန်ဂး၊ ဆဂး ဗွဲကြဴဂှ်တုဲ မုအဆက်စၠောံလေဝ် ဟွံဂွံရပုဟ်” သာ်ဝွံ ညးဟီုရ။
တုဲပၠန် သၟတ်သှေ်မံၚ်မွဲတၠဂှ်လေဝ် ပလံၚ်ဏာလဝ်ထံၚ်ကျာ်မြဟ်ရောၚ် လ္ပာ်သ္ကိုပ်အုပ်ဓုပ်တံ ဟီုဏာလဝ်တုဲဂှ် မုဟွံဂွံအဆက်စၠောံမွဲသာ် ကၠေမံၚ်ဂှ်ရ စိုပ်အာတန်ဗ္တောန်ပၞာန်တေံမာန်ရဂှ်လေဝ် ညးဒေသတံ သ္ၚဳဂၠိပ်လဝ်ရ။
“(၃) ဂိတုပြၚ်တုဲတှေ် ကြပ် (၅) ဂိတုလေဝ် ဟွံစိုပ်ဏီဂှ်ရ မိကောန်ၚာ်ဂှ် ထပ်သၟာန် သ္ကိုပ်အုပ်ဓုပ်ရ။ သ္ကိုပ်အုပ်ဓုပ်ဂး ပလံၚ်ဏာ ထံၚ်ကျာ်မြဟ်တေံယျ။ နူကျာ်မြဟ် အဃောပလံၚ်ဏာသဓီုဂှ် ဆၚ်စှေ်နူကာထံၚ်တုဲ ကၠေံအာရ” သာ်ဝွံ မၞိဟ်လ္တူဂှ် ဆက်ဟီုလဝ်ရ။
စပ်ကဵုကိစ္စဏံတုဲ နူလ္ပာ်သ္ၚိကၟိန်တံ သၟာန်သၟုက်ဂှ်မ္ဂး ဟွံပသောၚ်ကဵု ချိုတ်ချိုတ်ပၠိုတ်ပၠိုတ်တုဲ လ္ပာ်အုပ်ဓုပ်ဒေသတံဂှ် “ဟွံပြေစိုတ်တှေ် ဂၠာဲကေတ်ကေတ်” သာ်ဝွံ ဟီုဂးလဝ်ရ။
လ္တူပရူဒဒှ်ဏံတုဲ ညးစုက်လုက်ကဵု ဗော်ညဳသၟဟ်မန်မွဲတၠဂှ် “ကိစ္စဏံဂှ် အေန်ယူပဳကီု ရုၚ်ဆက်ဆောံဇြပ်ဗုကီု ဟီုထ္ၜးကဵုပရူပရာတုဲ ဗီုလဵုကၠောန်ဂွံရောဟီုဂှ် ကၠုၚ်အာတ်အရီုဗၚ်နွံရ။ ဆဂး နကဵုပိုဲတံလေဝ် ကေတ်တာလျိုၚ်ပသောၚ်ကဵု ဟွံဂွံဏီပုဟ်” သာ်ဝွံ ဟီုရ။
ပ္ဍဲကဵုကွာန်လှာ သွက်ဂွံကော်ညးယိုက်ဂၠေၚ်ပၞာန်ဝါတ်ဂါတ်မံၚ်ဂှ်ဝွံ သၟတ်ၜါတၠ ဒးဒုၚ်ရပ်ဏာတုဲဂှ် ကိစ္စယိုက်ဂၠေၚ်ပၞာန်ဟွံမိၚ်မွဲသာ် သၟတ်ၜါတၠဂှ် ထ္ပက်စုတ်ဏာအဇာ ဒှ်မာန်ရောၚ် ညးဒေသတံ ဟီုဂးသဳဂၠိပ်မံၚ်ရ။
ဆေၚ်စပ်ကဵုပရူဒဒှ်ဏံတုဲ အခိၚ်လၟုဟ်ဏံ ညးဒေသတံ ဒှ်မံၚ်ဂဝိၚ်ကဵု အကာဲအရာသၟတ်ၜါတၠဂှ်တုဲ နကဵုဂကောံညးတာလျိုၚ်မဆေၚ်စပ်တံ သွက်ဂွံစၟဳစၟတ်ဂၠိုက်ဂၠာဲကဵု ဗွဲမကၠးဖ္ဍးဂှ် ညးဒေသတံ အာတ်မိက်မံၚ်ရ။
သွက်တန်ဗ္တောန်ပၞာန် လၟေၚ် (၂၄) မကော်ဖန်ဇန်လဝ် ပ္ဍဲဂိတုမေ (၂၅) ဏံဂှ်ဝွံ သွက်ဂွံဂၠံက်မာဲယိုက်ဂၠေၚ်ပၞာန် နလၟေၚ်ဒေသတိဍာ်မဆေၚ်စပ်ဂှ် နူကဵုကမ္မယှေန်ပၞာန်တံ ဗက်ကော်ဒၟံၚ်စဵုကဵုသ္ၚိဖိုဟ်ရောၚ်ဂှ်လေဝ် ဂွံတီကေတ်ရ။
