ပ္ဍဲသၞာံ (၂၀၂၆) စနူဂိတုမေမံက်ဏအ်ဝွံ အလုံကၟိန်ဍုၚ်သေံမွဲဂှ် ညးတာလျိုၚ်ဗၠာဲသၟိၚ်သေံတအ် ဗက်လုပ်စၟဳစၟတ်အာ သၟာကမၠောန်ကောန်ဍုၚ်သၟာၚ် ညးတၞးလိက်သက်သဳဟွံမွဲတအ်ကဵု ညးရပ်လဝ်တၞးလိက်ပတောံတအ်ဂှ်ရောၚ် ဝန်ဇၞော်သၟာကမၠောန်သေံ “နာဲဂျူလာဖါန် အမဝ်ရဳဝါတ်’’ ဟီုစၞောန်လဝ်ရ။
ဂိတုမေ စၟတ်တ္ၚဲ (၁) တုဲကၠုၚ်ဏအ်ဝွံ ညးတာလျိုၚ်ဗၠာဲသၟိၚ်သေံတအ် လုပ်စၟဳစၟတ်လဝ် ပ္ဍဲခရိုၚ်ကအ်ဖါန်ၚာန် ဒၞါဲဘာထိၚ်ဒဝ်ကောန်ၚာ်မွဲဒၞါဲဂှ်တုဲ ဂွံဆဵုကေတ်သၟာကမၠောန် ဟွံမွဲကဵုတၞးလိက်သက်သဳ ကောန်ဍုၚ်သေံကဵု
ကောန်ဍုၚ်သၟာၚ် (၉) တၠတုဲ သၟာကမၠောန်ကောန်ဍုၚ်သၟာၚ်တအ်ဂှ် ဒးဒုၚ်တပ်ဒဏ်ဩန် အကြာ (၅,၀၀၀) ၝာတ်ကဵု (၅၀,၀၀၀) ၝာတ်၊ သီုကဵုဒးဒုၚ်ကၟာတ် အခေါၚ်လုပ်ကၠောန်ကမၠောန်ပ္ဍဲဍုၚ်သေံ ပွိုၚ် (၂) သၞာံကီုရ။
လ္ပါ်ခရိုၚ်သူရာတ် ဒၞါဲရုၚ်သၟာကမၠောန်တအ်ဂမၠိုၚ်ဂှ်ဝွံ ညးတာလျိုၚ်ဗၠာဲသၟိၚ်သေံတအ် ဂၠိုက်ဂၠာဲဂွံလဝ်တၚ်နၚ် နကဵုအခေါၚ်ဟွံမွဲမွဲသာ် ကၠောန်မံၚ်ကမၠောန်ဂှ်ရ ဗက်လုပ်စၟဳစၟတ်အာ နကာတၟေၚ်တုဲ အတိုၚ်သၞောဝ်ဥပဒေကၟိန်ဍုၚ်သေံဂှ် ကေတ်အာအရေဝ်ပေၚ်ပေၚ်ရောၚ် ဝန်ဇၞော်သၟာကမၠောန်သေံ ဂးရ။
ဗွဲတၟေၚ် ဒၞါဲကဵုရုၚ်ဌာနကောပ်ကာဲ ပအပ်သၟာကမၠောန်တအ်ဂမၠိုၚ်ဝွံ စၟဳစၟတ်အာ တၚ်နၚ်စရၚ် သၟာကမၠောန်တအ်ကၠာတုဲ အလန်ဏအ် စွံအဓိကစၟဳစၟတ်အာ ညးသက်သဳတၞးလိက် (Work Permit) ဟွံမွဲ၊ ညးတၞးလိက်အာယုက်အိုတ်၊ ညးကၠောန်မံၚ်ကမၠောန် နတၞးလိက်ပတောံတအ်ကဵု ညးရပ်လဝ် (passport) လိက်အုပ်တတ်ကၠောံဍုၚ်တအ်ဂှ်ရောၚ် ဂွံတီကေတ်ရ။
ဒှ်သာ်ဂှ်ရ နကဵုသၟာကမၠောန်ကောန်ဍုၚ်သၟာၚ် သီုပါလုပ်ကောန်ဍုၚ်မန်ဗၟာ ညးမံၚ်ကဵုတၞးလိက်သက်သဳဟွံမွဲ ဟွံသေၚ်သာ်ဂှ် ညးမံၚ်ကဵုတၞးလိက်ပတောံတအ်ဂှ်ဝွံ စၟဳစၟတ်ရပ်စပ်ဂွံမ္ဂး ဒးဒုၚ်တပ်ဒဏ်ဩန် အကြာ (၅,၀၀၀) ၝာတ်ကဵု (၅၀,၀၀၀) ၝာတ်၊ သီုကဵုဒးဒုၚ်ကၟာတ် အခေါၚ်လုပ်ကၠောန်ကမၠောန်ပ္ဍဲဍုၚ်သေံ ပွိုၚ် (၂) သၞာံနွံရ။
တုဲပၠန် နကဵုတၠကမၠောန်တအ်လေဝ် ဒးဒုၚ်တပ်ဒဏ်ဩန် အကြာ (၁၀,၀၀၀) ၝာတ်ကဵု (၁၀၀,၀၀၀) ၝာတ်၊ ယဝ်လုတ်လောန်ဒးအာ ဒုဟ်မွဲမွဲသာ်မ္ဂး ဒးဒဏ်ထံၚ် ပွိုၚ် (၁) သၞာံ ကဵု ဒဏ်ဩန် အကြာ (၅၀,၀၀၀) ၝာတ်ကဵု (၂၀၀,၀၀၀) ၝာတ်၊ သီုကဵုဒးဒုၚ်ကၟာတ်ကော်သၟာကမၠောန် ပွိုၚ် (၃) သၞာံနွံရောၚ် ဂွံတီကေတ်ရ။
အတိုၚ်စၞောန်ဝန်ဇၞော်သၟာကမၠောန်သေံ “နာဲဂျူလာဖါန် အမဝ်ရဳဝါတ်’’ ဟီုလဝ်ဂှ်ဝွံ စနူဂိတုမေ စၟတ်တ္ၚဲ (၁) တုဲကၠုၚ်ဏအ် ဇၟာပ်ခရိုၚ်ဒေသ၊ ဇၟာပ်တွဵုရး အလုံကၟိန်ဍုၚ်သေံမွဲဂှ် ဗက်လုပ်စၟဳစၟတ်အာ သၟာကမၠောန် ကောန်ဍုၚ်သၟာၚ် ညးတၞးလိက်သက်သဳဟွံမွဲတအ်ကဵု ညးရပ်လဝ်တၞးလိက်ပတောံ (Work Permit) တအ်ရောၚ်ဂှ် ဂွံတီကေတ်ရ။
