ဒူရေန်သတ်တိတ်တဲကၠာဏံ ဂွံၚုဟ်ခိုဟ်ကီုလေဝ် တော်ကဵုၚုဟ်မးဩန်မ္ဂး နွံၚုဟ်မးအောန်နူသၞာံတုဲကၠုၚ်တေံဏီရောၚ် တၠကၠအ်ဒူရေန်တအ် ဟီုရ။
သတ်ဒူရေန်ဆက်မတ်ဂကူခိုဟ်အိုတ်ဂှ် ရဲသွံရာန်တအ် ဗက်ရာန်ဒၟံၚ် မွဲကဳလိုဝ် အကြာ (၂၇၀၀၀) နွံတုဲ ဂကူသဝ်ညိဂှ် မွဲကဳလိုဝ် နွံအကြာ (၁၅၀၀၀) ဒ္ကေဝ်နွံရ။
နကဵုၚုဟ်မးဩန် ၜိုန်ရဂွံၚုဟ်သၠုၚ်နူသၞာံတုဲကၠုၚ်တေံကီုလေဝ် တော်ကဵုၚုဟ်မးဩန် သၞာံတုဲကၠုၚ်တေံကဵု ၚုဟ်မးဩန်သၞာံဏံမ္ဂး ၚုဟ်မးသဝ်နူသၞာံတုဲကၠုၚ်တေံဏီရောၚ် တၠကၠအ်ဒူရေန် နူဍုၚ်ဇြပ်ဗုမွဲတၠ တော်ဟီုထ္ၜး သာ်ဝွံရ။
“သၞာံတုဲကၠုၚ်တေံ ဒူရေန်ၚုဟ်ခိုဟ်အိုတ် မွဲကဳလိုဝ် အကြာ (၂၂၀၀၀)၊ ဂကူပရေံညိဂှ် မွဲကဳလိုဝ် အကြာ (၁၂၀၀၀)၊ အခိၚ်တေံဂှ် ၚုဟ်ထဝ်နွံအကြာ (၉၀) ကိုဋ်၊ တော်ကဵုၚုဟ်သ္ၚုတှေ် မွဲရိုက်အကြာ (၆၀၀၀၀၊ ရ၀၀၀၀)၊ သၞာံဏံဂှ် ဒူရေန်သၠုၚ်အိုတ်ဂှ် (၂၇၀၀၀)၊ သဝ်ညိဂှ် (၁၅၀၀၀)၊ ရံၚ်ကဵုၚုဟ်တှေ် ဂွံၚုဟ်ခိုဟ်နူသၞာံတုဲကၠုၚ်တေံကွေံ၊ ဆကလေၚ်တော်ကဵု ၚုဟ်ထဝ်၊ ၚုဟ်သ္ၚု၊ ၚုဟ်ဗွဝ်ဖျာဂလိုၚ်တှေ် သၠုၚ်တိုန်အာနူကဵု သၞာံတုဲကၠုၚ်တေံ ဗွဲဟွံသာ၊ ၚုဟ်ဒူရေန်ဂှ် ၚုဟ်မးဍေံသၠုၚ်တိုန်ကဵု မသုန်လ္ၚီကဵု ပိလ္ၚီ ရတှေ် ဗက်ဟွံစိုပ်လးလး၊ ယဝ်တော်ကဵုၚုဟ်မးဩန်တှေ် ၚုဟ်မးဟွံသၠုၚ်တိုန်ပုဟ်” သာ်ဝွံ နာဲညုၚ် ပိုၚ်ပြဳလဝ်ကၠအ်ဒူရေန် (၂၀၀) တၞံပြၚ် နူဍုၚ်ဇြပ်ဗုဂှ် ဟီုတော်ထ္ၜးရ။
ၚုဟ်သတ်ဒူရေန် စတိတ်တၟိတၟိလၟုဟ်ဏံဂှ် ဂကူဒယှ်အိုတ် ကော် မူသာန်ကေန် မွဲကဳလိုဝ်မ္ဂး နွံၚုဟ်အကြာ (၂၇၀၀၀) ဒ္ကေဝ်တုဲ ဂကူက္ဍိုပ်ကျာံ၊ ဂကူမန်ဓံၚ်တအ်မ္ဂး မွဲကဳလိုဝ် နွံၚုဟ်အကြာ (၁၅၀၀၀) ဒ္ကေဝ်တုဲ သတ်ဒူရေန်မအရိုၚ်မ္ဂး တန်တဴကဵု မဇၞော် မဍောတ်တုဲ ၚုဟ်တၞဟ်ခြာနွံရ။
“တၠကၠအ်ဒူရေန်တအ် သွံဒူရေန်မွဲတဲ ဂွံကဵုစှော်ကိုဋ်ကွေံရ၊ ဆဂး ယဝ်တော်ကဵု ၚုဟ်မးအနှေန်ထဝ်၊ ၚုဟ်မးကပေါတ်ဖျာတၞဟ်တၞဟ်တှေ် သၠုဲ (၅၀) ကိုဋ်ဂှ် မုလေဝ်သ္ပဟွံဂွံ၊ လၟိဟ်ဩန်ဂှ်ရဂၠိုၚ် ၚုဟ်မးဩန်ဂှ် အောန်စှေ်၊ ရဲကၠအ်ဗီုပိုဲတအ်ဂှ် ဒုၚ်ယၟုဂွံဩန်ကဵု (၁၀၀) ကိုဋ်၊ (၂၀၀) ကိုဋ်၊ ယဝ်တော်ကဵု ၚုဟ်ရာန်ဝါဲ ၚုဟ်လၟုဟ်၊ ၚုဟ်စရိတ်ကောန်ကမၠောန် ၚုဟ်လၟုဟ်တှေ် ဩန် (၁၀၀) ကိုဋ်၊ (၂၀၀) ကိုဋ်ဂှ် မုလေဝ် ၚုဟ်မးဍေံဟွံသှေ်ရ” သာ်ဝွံ တၠကၠအ်ဂှ် ဆက်ဟီုရ။
ဍုၚ်မန်ဂှ် ဒူရေန်မဆက်မတ်မ္ဂး ပ္ဍဲပွိုၚ်ဍုၚ်မုဟ်ဍုၚ်ကဵု ပွိုၚ်ဍုၚ်ဇြပ်ဗု တိတ်ဂၠိုၚ်တုဲ ဒူရေန်မအရိုၚ်မ္ဂး ပွိုၚ်ဍုၚ်ရေဝ် တိတ်ဂၠိုၚ်အိုတ်ရ။ အခိၚ်ဏံမ္ဂး ဍုၚ်မန်ဂှ် ဗွဝ်ဖျာသတ်ဒူရေန်ဂှ် လုပ်အဝေါၚ်ဗွဝ်ဖျာဇၞော်ဇၞော်မွဲကီုရောၚ် ဂွံတီကေတ်ရ။
