ဘာကောန်ဂကူမန် တန်မူလ၊ တန်လဒေါဝ် ကေုာံ တန်သၠုၚ် သၟဝ်ဌာနကမ္မတဳပရေၚ်ပညာကောန်ဂကူမန် MNEC ဝွံ ပ္ဍဲဂိတုမေ (၂၅) ဏံ စဒုၚ်တဲပအပ်ဘာရောၚ် နူမုက်လိက်ပရေၚ်မၞိဟ် ဘာကောန်ဂကူမန် လလောၚ်ကဵုလဝ်သမ္တီဂှ် ဂွံတီကေတ်ရ။
စပ္တံနူဂိတုမေ (၂၅) စဵုကဵု (၂၉) ဂှ် ဘာကောန်ဂကူမန်ဂမၠိုၚ် စဒုၚ်တဲပအပ်ဘာတုဲ နကဵုမိမကွးဘာဂမၠိုၚ်တံဝွံ ပ္ဍဲကဵုဘာကောန်ဂကူမန်ကြပ်ကဵုဇကု မစကာဗ္တောန်ဒၟံၚ် သၞောတ်ဗ္တောန်သ္ပသဇိုၚ်အရေဝ်ဘာသာမိဂှ် ပအပ်ဘာနကဵုၚုဟ်မးမးမာန်ရောၚ် ကဵုလဝ်သမ္တီရ။
ပ္ဍဲကဵုဘာကောန်ဂကူမန်တန်သၠုၚ် ကေုာံ တန်သၠုၚ်ပါ်ဂမၠိုၚ်ဂှ်ဝွံ သွက်ကွးဘာတြေံ / တၟိ မံၚ်ပ္ဍဲခဒံတံ ဒးဒစးဒုၚ်ပကောံပကေဝ် လိက်သက်သဳစၟတ်သမ္တီ နူဘာစၟတ်လဝ်ဍိုက်ဍိုက်ပေၚ်ပေၚ်ရောၚ်ဂှ်လေဝ် အ္စာၝောံ နူဇြပ်ဗုမွဲတၠဂှ် ဟီုရ။
“ကွးဘာတၟိ မံၚ်ပ္ဍဲခဒံဟီုတှေ် သွက်ပိုဲတံ သာတုဲတာလျိုၚ်ဇၞော်ရ။ လိက်စၟတ်သမ္တီကီု စနူမိမ/ညးထိၚ်ဒဝ် ကၠုၚ်ပအပ်ဍေံတံ ပၟိက်ဇၞော်မံၚ်ဏောၚ်။ လိက်စၟတ်တဲပြံၚ်ဘာတံ၊ တၞးလိက်ဆာဲတၞဟ်တၞဟ်တံ ပကောံပကေဝ်ဍိုက်ပေၚ်ဇဳမှ ကၠုၚ်ပအပ်တှေ် ပဵုပြေပြံၚ်ရ” သာ်ဝွံ ဟီုရ။
အပ္ဍဲရာသဳပံက်ဘာဏံ ပ္ဍဲဘာကောန်ဂကူမန်ဂမၠိုၚ်ဝွံ ကပေါတ်စကာဘာ ညးတၠဒါန်တံ ကဵုလဝ်ဒါန်ဂမၠိုၚ်ဂှ်လေဝ် သွက်ဂွံကဵုမးမးနွံရောၚ် ဂးရ။
ပ္ဍဲသၞာံဗ္တောန်ပညာ သၞာံ (၂၀၂၆ – ၂၀၂၇) ဏံ ဘာကောန်ဂကူမန် သၟဝ်ဌာန MNEC ကြပ်သီုဖအိုတ် ပံက်အာမာန်ရောၚ်ဂှ် ဂွံတီကေတ် နူပွဳဗွိုၚ်ပရေၚ်ပညာကောန်ဂကူမန်ရ။
ၜိုန်ဂှ်ကီုလေဝ် ဘာပုဂ္ဂလိက၊ ဘာပူဂဵု ဂၠိုၚ်ကၠုၚ်ကီုတုဲ ပ္ဍဲကဵုဘာဂှ်ဝွံ စနူအဝဲတန်ကောန်ၚာ် ပအပ်စွံစတိက်ပ္ဍဲဘာမာန်ဂှ်ရ ပ္ဍဲသၞာံဗ္တောန်ပညာလၟုဟ်ဏံလေဝ် ပ္ဍဲကဵုဘာကောန်ဂကူမန်ဂမၠိုၚ်ဂှ် လၟိဟ်ကွးဘာဂၠိုၚ်တိုန်မာန်ဟွံသေၚ်ရဂှ်လေဝ် အ္စာဘာ နူရေဝ်မွဲတၠ သ္ၚဳဂၠိပ်လဝ်ရ။
“တန် KG ဟီုတှေ် မွဲသၞာံကဵုမွဲသၞာံ ယအ် ယအ်ကၠုၚ်ရ။ စိုပ်အာ ဘာပူဂဵု လ္တူဍုၚ်ဂၠိုၚ်ရ။ ကဵု ကိုဋ် (၁၀၀၊ ၂၀၀) တုဲ စွံရ။ ဟိုတ်ဂှ်ရ ရံၚ်တန် KG ဂှ်တှေ် တီရလေဝ် ကွးဘာ အောန်ဂၠိုၚ်ဂှ်။ နူကဵုတန် KG ယဝ်နွံ (၂၀) ရတှေ် စိုပ်တန်ဇၞော်တှေ် မူစိတၠသှေ်ရော” သာ်ဝွံ ဟီုရ။
တုဲပၠန် ကွးဘာအဝဲတန်လဒေါဝ်ဂမၠိုၚ်ဂှ် နူကဵုမိမကွးဘာတံ ကော်ပ္တိတ်ဏာ သွက်ဂွံကၠောန်ၝာတ်သေံကီု၊ ဟိုတ်နူကေၚ်ကာမံၚ်စံၚ်စသုၚ်သ္ၚိကၟိန်တုဲ ပ္ဍဲသၞာံဗ္တောန်ပညာတုဲကၠုၚ်ဏံ လၟိဟ်တိတ်ဘာဂၠိုၚ်ကၠုၚ်လဝ်ရ။
ဟိုတ်ဂှ်ရ ညးထံက်ဂလာန်ကဵုဇြဟတ် ပရေၚ်ပညာကောန်ဂကူမန်တံဂှ် အကာဲအရာ ဒးဒှ်ဓဝိၚ် အောန်စှေ် / ကၠေံကၠက်အာနွံရဂှ်လေဝ် အ္စာဘာလ္တူဂှ် ထပ်ဟီုလဝ်ရ။
အတိုၚ်ဌာန်ပရိုၚ်ဗၠးၜးမန် MNA သၟာန်သၟုက်လဝ်ဂှ်မ္ဂး ပ္ဍဲသၞာံဗ္တောန်ပညာဏံဝွံ ပ္ဍဲပွိုၚ်ဍုၚ်မုဟ်ဍုၚ်ဂှ် ဘာအဆံၚ်တန်မူလ (၂) ဘာ၊ ပ္ဍဲရေဝ်သၟဝ်ကျာဂှ် ဘာတန်မူလ (၁) ဘာ၊ ပ္ဍဲပွိုၚ်ဍုၚ်ပံၚ်ဂှ် ဘာတန်မူလ (၁) ဘာ သွက်ဂွံပံက်အာတၟိ သၟဝ်ဌာနကမ္မတဳပရေၚ်ပညာကောန်ဂကူမန် MNEC နွံရဂှ်လေဝ် ဂွံတီကေတ်ရ။
