ပ္ဍဲကဵုအစဳဇန် ပ္တိုန်စရာဲကဵုလာဘ် ကုကွးဘာမန်ဥတုက္ညၚ်ဏံဝွံ ညးတၠဒါန်ဒေသနာနာ သွက်ဂွံပါလုပ်ဂှ် နူဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန် ကော်ဘိက်ဒၟံၚ်နွံရောၚ် ဂွံတီကေတ်ရ။
ပ္ဍဲဂိတုမေ (၂၁) ဏံ သွက်ဂွံကၠောန်ဗဒှ်အာ ပေဲါသၟာန်သွဟ်လိက်ပတ်မန်ဥတုက္ညၚ် အလုံဒေသရးမန် ပ္ဍဲဘာကျာ်ဒေါဝ်သာသနာ (၂၅၀၀) လ္တူဍုၚ်မတ်မလီုတုဲ ဂိတုမေ (၃၁) ဂှ်မ္ဂး ပ္တိုန်စရာဲကဵုလာဘ် ကုကွးဘာကေက်သကာတံရ။
ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာတံဝွံ တန်ဝၚ်မန်မွဲတန်မ္ဂး စဳဇန်လဝ် သွက်ဂွံကဵုလာဘ်တၟေၚ် (၅) လာဘ်နွံတုဲ ကွးဘာအံၚ်လဝ်တန်ဝၚ်သီုဖအိုတ် (၁၄၂) တၠတံဂှ်လေဝ် နကဵုကယျိုၚ်ကေတ်တဆိပ်ကြာပေၚ်ပေၚ် ပ္တိုန်စရာဲကဵုလာဘ်ရောၚ် ဂးရ။
ဟိုတ်ဂှ်ရ ညးဒေသ ညးဍုၚ်ကွာန်မန်တံဝွံ သွက်လိက်ပတ်မန် သ္ဂောံတောတက်တိုန်ဂှ်မ္ဂး နကဵုလာဘ်တၟေၚ်မွဲလာဘ်ကီု၊ နကဵုမွဲတန်ကီု ညံၚ်သ္ဂောံပါလုပ် ပ္ဍဲအစဳဇန် ပ္တိုန်စရာဲကဵုလာဘ် သွက်ကွးဘာတန်ဝၚ်တုဲတံဂှ် ညးတာလျိုၚ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်မွဲတၠ ဟီုဂးဖ္တိုက်ဖအောဝ်လဝ် ပ္ဍဲကဵုဌာန်ပရိုၚ်ဗၠးၜးမန် IMNA ရ။
“ဟိုတ်နူဆာန်လိက်ပတ်ကဵု ယေန်သၞာၚ်အခိုက်ကၞာဂကူမန်တံတုဲ ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ ဒတူလိုၚ်ကၠုၚ် ဒဵုကဵု (၂၇) သၞာံရ။ ဟိုတ်နူညးဍုၚ်ကွာန်မန်တံ ဘိုၚ်ရီုဗၚ်ထံက်ပၚ်ဂှ်ရ ကၠောန်သ္ပကၠုၚ် ဗီုလၟုဟ်ဏံမာန်ရ။ သၞာံဏံလေဝ် ဗီုသၞာံတုဲတုဲကၠုၚ်တေံ မိက်ဂွံကဵုဘိုၚ်ရီုဗၚ်ထံက်ပၚ်ရ။ မွဲသၞာံကဵုမွဲသၞာံလေဝ် လၟိဟ်ကွးဘာတံ ဂၠိုၚ်ကၠုၚ်မံၚ်ဏောၚ်။ ဟိုတ်ဂှ်ရ ပရေၚ်ရီုဗၚ်ထံက်ပၚ်ဂှ်လေဝ် နွံပၟိက်ဂၠိုၚ်ကၠုၚ်ရ။ ဒှ်သာ်ဂှ်ရ ဘိုၚ်ပူဗိုၚ်ပါလုပ်မွဲကရောံညိဂှ် ကော်ဘိက်ဏာရ” သာ်ဝွံ ညးတာလျိုၚ်ဂှ် ဟီုရ။
ပ္ဍဲကဵုအစဳဇန် ပ္တိုန်စရာဲကဵုလာဘ်တၟေၚ်ဏံဝွံ လာဘ်ပထမ (၁၅၀၀၀၀) ဒကေဝ်၊ လာဘ်ဒုတိယ (၁၃၀၀၀၀) ဒကေဝ်၊ လာဘ်တတိယ (၁၁၀၀၀၀) ဒကေဝ်၊ လာဘ်သ္ဍိုက်စိုတ်ၜါလာဘ် နကဵု (၂၀၀၀၀၀) ဒကေဝ် သွက်ဂွံကဵုအာနွံဂှ်ရ သွက်တန်ဝၚ်ဖအိုတ် (၇) တန်ဂှ် နွံပၟိက်သြန် (၄၀) ကိုဋ်ရောၚ် ဂးရ။
သၟာၚ်နူဂှ်ပၠန် ကွးဘာတန်ဝၚ်တုဲမွဲတၠမ္ဂး သွက်ဂွံပ္တိုန်စရာဲကဵုလာဘ် (၆၀၀၀၀) ဒကေဝ်နွံဂှ်ရ ဒးဒုၚ်ဖအိုတ်သြန် (၈၅၀၀၀၀၀) ဒကေဝ်ရ။
ပ္ဍဲကဵုဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အဆံၚ်ပွိုၚ်ဍုၚ်ဂှ်မ္ဂး ဗ္တောန်ကဵုဒၟံၚ် နူတန်ကောန်ၚာ် စဵုကဵုတန်ဝၚ် (၁၂) တန်ကီုလေဝ် တန်ဝၚ်ဂမၠိုၚ်ဟေၚ် သွက်ဂွံလုပ်သွဟ် ပ္ဍဲကဵုပေဲါသၟာန်သွဟ်လိက် အလုံဒေသရးမန်ဂှ် စၟတ်လဝ်ရ။
ပ္ဍဲကဵုသက္ကရာဇ် (၁၃၆၀) သၞာံ လောန်ကၠုၚ်တေံ ခၟဳသၚ်မန်ဂမၠိုၚ်ကဵု ပူဂဵုဆာန်ဂကူမန်တံ ပံၚ်ကောံညးသ္ကံတုဲ နကဵုပွိုၚ်ဍုၚ် (၆) ပွိုၚ်ဍုၚ်ဂှ် စဒက်ပ္တန်ကၠုၚ် ဂကောံဗ္တောန်လိက်ပတ်မန် ကေုာံ ယေန်သၞာၚ်ဗုဒ္ဓဘာသာ အလုံဒေသရးမန်ရ။
အခိၚ်လၟုဟ်ဏံဝွံ အပ္ဍဲဒေသမန်၊ ကရေၚ်၊ တၞၚ်သဳ၊ ဗဂေါ၊ သေံ ကေုာံ မလေဝ်ယှာ စဵုကဵု (၂၅) ပွိုၚ်ဍုၚ် ပံၚ်ကောံပါလုပ်ကၠုၚ်တုဲ ပ္ဍဲကဵုပရေၚ်ဗ္တောန်လိက်ပတ်မန်ဂှ် ဒှ်ဂကောံဇြဟတ်ဇၞော်မွဲရောၚ် ဂွံတီကေတ်ရ။
