ပ္ဍဲပွိုၚ်ဍုၚ်ဍာ်ဗု၊ ရးတၞၚ်သဳဝွံ ဂိတုဂျောန် (၃)၊ နူတနေံဏံ အခိၚ်တ္ၚဲစေၚ်ဂှ် ဟွံဒှ်ပေဲါဗ္တိုက်မွဲသာ် ဒးဒုၚ်ဗ္တိုက်ထောံဖျေံဗမ်ကဵုက္ၜၚ်ကျာဂှ်ရ ညးဗြဴမနွံပဋိသန္ဓိ (၁) တၠ ကေုာံ ကောန်ၚာ် (၁) တၠ ချိုတ်အာတုဲ ဒးအာဘဲဝပ် (၁) တၠနွံရောၚ် ဂွံတီကေတ်ရ။
က္ၜၚ်ကျာပဝ်ကၠုၚ် နူလ္ပာ်ဗဒိုပ်ဒပ်ဍာ်မောရဝတဳ၊ ဒေသကာန်ဗံက်ဂှ်ဝွံ နူတနေံဏံ အခိၚ်တ္ၚဲစေၚ် ၜိုတ် (၃) နာဍဳပြၚ်ဂှ် ဂြာတ်ထောံဖျေံဗမ် (၃) မတုဲ ဒတုံခတိုဟ်အာ ပ္ဍဲဗဒဲါပွဳဗွိုၚ်ကွာန် (ဧကနိ၊ ရၚဲ၊ ရၚဲဝဇွန်းတော) ဂှ်ရ။
အဃောဒတုံခတိုဟ်အာ ပ္ဍဲပွဳဗွိုၚ်ကွာန် (ဧကနိ) ဂှ်ဝွံ သၟာကမၠောန်ဆုဲပြံၚ် ဒၟံၚ်တန်တဴမံၚ် အပ္ဍဲကၠအ် ညးဗြဴမနွံပဋိသန္ဓိ အာယုက် (၃၅) သၞာံမွဲတၠကဵု ကောန်ၚာ် ကောန်ဂကောံသ္ၚိကၟိန်ညး အာယုက် (၁၃) သၞာံမွဲတၠဂှ် ဒးချိုတ်အာ ပ္ဍဲကဵုဒၞာဲဂှ်ဣရဂှ် ညးတြုံဒေသဂှ်မွဲတၠ ဟီုရ။
“ညးဗြဴဗုၚ်ဂှ်ကဵု ဒေံညးတေံဂှ်တှေ် အဃောတိက်မံၚ်ဂှ် တုဲအာဟဂှ်ရ။ ကောန်ၚာ်ဍောတ်ဂှ်တှေ် ဒးအာသၟုဟ်ယျာန် ပ္ဍဲဇကုရ။ ညးတြုံဂှ် မုဟွံဒှ်ပုဟ်။ ညးဗြဴဗုၚ်ဂှ် စိုပ်မံၚ်ဂိတုၜံၚ်ရတှေ် ကရေက်ဗုၚ်တုဲ ရီုမံၚ်ကောန်ၚာ်ဏီကီုလေဝ် ဟွံဂတာပ်အခိၚ်ပုဟ်” သာ်ဝွံ ညးတြုံဒေသမွဲတၠ ဟီုရ။
ကောန်ၚာ် အာယုက် (၁) သၞာံ ဒးအာဘဲဝပ်ဂှ်ဝွံ ဟိုတ်နူဘဲဝပ်ဟွံသ္ကာတ်မြဟ်ဂှ်ရ ဒုၚ်လွဳလွတ်ဒၟံၚ် ပ္ဍဲခဒံကဵုဂဥုဲ နွံဗဒဲါဂှ်တုဲ သွက်ဂွံဒးဒှ်ဂဝိၚ်ဟွံမွဲရောၚ် ညးဆက်ဟီုရ။
ဒပ်ပၞာန်တံဝွံ ဂြာတ်ထောံဖျေံဗမ် ပ္ဍဲပွဳဗွိုၚ်ကွာန် (ဧကနိ) တုဲဂှ် ပ္ဍဲကဵုမွဲဒမြိပ်ဒေသ (နာဘုလယ်)၊ ဒေသပိုန်ဒြပ်တၟေၚ်ထဝဲါဂှ်လေဝ် နူတနေံဏံ စဵုကဵုအခိၚ်သဝ်တ္ၚဲဂှ် က္ၜၚ်ကျာၜါဖ္ဍိုက် ဆက်ပဝ်ဂေတ်မံၚ်ဖိုဟ်တုဲ ညးဒေသတံဒှ်ဂဝိၚ် ဂွိၚ်ဖေက်ဒးဒုၚ်ဗ္တိုက်ပၠန်ရ။
အပ္ဍဲတ္ၚဲအကြာတဏံ ပ္ဍဲရးတၞၚ်သဳဝွံ က္ၜၚ်ကျာဒပ်ပၞာန် ကၠုၚ်နူလ္ပာ်နာနာဂမၠိုၚ် ဂေတ်ပဝ်မံၚ်ရောၚ် ညးတြုံဒေသဂှ် ဆက်ဟီုလဝ်ရ။
“အကြာတဏံ ၜၚ်ကျာဂေတ်မံၚ်ကွေံကွေံရ။ တိုန်ကၠုၚ်နူလ္ပာ်ဗိက်လေဝ်နွံရ။ ကၠုၚ်နူလ္ပာ်လ္ဂုၚ်လေဝ်နွံရ။ တိုန်ကၠုၚ်မံၚ်သီုဖအိုတ်ရ။ ညးဒေသတံဂှ်တှေ် ဒှ်ဓဝိၚ်ရ။ ဂွိၚ်ဖေက်ထပ်ဂြာတ်ဖျေံနၚ်ပၠန်ရ။ ဂြာတ်ဂှ်တှေ် တန်တဴလ္တူအကာဲအရာပၞာန်တုဲ ကၠောန်သ္ပမံၚ်ဏောၚ်။ ကိုန်ဂစိုတ်ဟွံမွဲပုဟ်” သာ်ဝွံ ညးဟီုရ။
ဟိုတ်ဂှ်ရ ဂိတုဂျောန် (၃)၊ နူတနေံဏံမွဲတ္ၚဲဓဝ်ဂှ် နူဒပ်ကမ္မယှေန်ပၞာန်တံ ဂြာတ်ထောံဖျေံဗမ် ပ္ဍဲဒေသပယျဵုဓနက် ဒေသမန်ကဵု ရးဒေသဇၞော်တၞၚ်သဳ (၂) ဝါပေၚ်ပေၚ်ရ။
အပ္ဍဲကိုန်စဳဇန် (၁၀၀) တ္ၚဲဏံဝွံ ပ္ဍဲသ္ကုတ်သၠုၚ်ကျာကၟိန်ဍုၚ်ဗၟာဂှ် ပွကမ္မယှေန်ပၞာန်ဗ္တိုက်ကဵုက္ၜၚ်ကျာ သ္ကာတ်မြဟ်ဂၠိုၚ်ကၠုၚ်နူကၠာတေံတုဲ သၟာၚ်နူဗမ် (၅၀၀) ပံၚ်ဂှ်မ္ဂး ဒးထေၚ်ကေတ် ဗမ်ဓာတုဂမၠိုၚ်ဂှ်လေဝ် ဂွံဆဵုကေတ်မံၚ်ကီုရောၚ် ဓမံက်ထ္ၜးလဝ် ပ္ဍဲတၚ်နၚ်ပရိုၚ်ဗလးတိရ။
ဂိတုအေဗရဴတုဲကၠုၚ်တေံဝွံ ဟိုတ်နူဒပ်ကမ္မယှေန်ပၞာန် ဗ္တိုက်ကဵုက္ၜၚ်ကျာ ကေုာံ ဗလးတိဂှ်တုဲ အလုံမွဲကၟိန်ဍုၚ်ဗၟာ ညးဗြဴဒးဆောံလေၚ်အာလမျီု (၄၄) တၠနွံရဂှ် ဂွံတီကေတ် နူတၚ်နၚ်ဂကောံသမဂ္ဂညးဗြဴဗၟာရ။