အပ္ဍဲကွာန်ဒေသကၞောတ်ၜဳရေဝ်မွဲကွာန်၊ ပ္ဍဲပွိုၚ်ဍုၚ်ရေဝ်၊ တွဵုရးဍုၚ်မန်ဝွံ တ္ၚဲဏံ ဂိတုဂျောန် (၃)၊ အခိၚ်နူဂယးပြဟ်ဂှ် နူဒပ်ကမ္မယှေန်ပၞာန်တံ ထပ်ထောံဖျေံဗမ်ကဵုက္ၜၚ်ကျာပၠန်ရောၚ် ဂွံတီကေတ် နူညးဒေသတံ ဟီုဂးလဝ်ရ။
တ္ၚဲဏံ ဂိတုဂျောန် (၃)၊ အခိၚ်နူဂယးပြဟ် ၜိုတ် (၁) နာဍဳဂှ် နူဒပ်ကမ္မယှေန်ပၞာန်တံ ကၠုၚ်ထောံဖျေံဗမ်ၜါမ နကဵုက္ၜၚ်ကျာ Y8 တုဲ အခိၚ်တ္ၚဲဂှ်လေဝ် ဂေတ်ပဝ်မံၚ်ကၚ်ဏောၚ် ဂွံတီကေတ်ရ။
“မွဲနာဍဳဂှ် (၁) မ၊ မွဲနာဍဳပြၚ်ဂှ် (၁) မ၊ သက်သက်ဂှ် ကၠုၚ်ထောံဖျေံဏာရ။ ချိုတ်အာမွဲတၠကီု ဂွံမိၚ်ရ။ ညးဒးဘဲဝပ်ဂှ်တှေ် ဟွံတီချိုတ်ပၠိုတ်ဏီပုဟ်”သာ်ဝွံ ဟီုရ။
ပ္ဍဲကဵုကွာန်ဒးဒုၚ်ထောံဖျေံဗမ်ဂှ်ဝွံ အကြာဒပ်ကမ္မယှေန်ပၞာန်ကဵု ဒပ်ပံၚ်ကောံပၠန်ဂတးတံ ဟွံဒှ်ပေဲါဗ္တိုက်မွဲသာ် နကဵုတၚ်ရန်တၟံနွံနွံ ကၠောန်သ္ပဏာလဝ်ရောၚ် ဂွံတီကေတ်ရ။
အတိုၚ်တၚ်နၚ်ပရိုၚ်ကိုပ်ကၠာဏံမ္ဂး ဟိုတ်နူဒးဒုၚ်ဖျေံဗမ်ဂှ် မၞိဟ်မွဲတၠချိုတ်အာတုဲ သ္ၚိဒၟံၚ်လေဝ် လီုလာ်အာနွံကီု ဂွံတီကေတ်ရ။
ဂိတုမေ (၂၇) တုဲကၠုၚ်ဏံ အခိၚ်နူဂယးပြဟ် ၜိုတ် (၁) နာဍဳဂှ်လေဝ် ဒၞာဲဗဒိုပ်ဒပ်လကိုဟ်ရေဝ် ဖျေံလဝ်သဇိုၚ် ပ္ဍဲပွိုၚ်ဍုၚ်ရေဝ်ဂှ် ဒပ်ကမ္မယှေန်ပၞာန်တံ ထောံဖျေံဗမ် နကဵုက္ၜၚ်ကျာဗ္တိုက် Y-12 ကေုာံ Jet Fighter ဏီရ။
ဟိုတ်ဂှ်ရ အပ္ဍဲတ္ၚဲအကြာတဏံ ညးဒေသကၞောတ်ၜဳရေဝ်ဂမၠိုၚ် ဒှ်မံၚ်ဂဝိၚ်ကဵု ဘဲအန္တရာဲက္ၜၚ်ကျာရောၚ် ဂွံတီကေတ်ရ။