ညးတြုံကၠောန်မံၚ်ကမၠောန် ပံက်ဆေၚ်ဍာ်လက်ဖက် ပ္ဍဲအရာပ်ကအ်သာန်နာၚ်၊ ဍုၚ်ကျာ်ထဝ်၊ တွဵုရးဍုၚ်မန် မွဲတၠဂှ်ဝွံ နူကဵုသၟာရပ်လွဟ်ဟွံတီယၟုၜါတၠတံ လုပ်စိုပ်ကၠုၚ်အပ္ဍဲဆေၚ်တုဲ ပန်ဏာကဵုလွဟ်စုက်စုက်ရောၚ် ဂွံတီကေတ် နူညးဒေသကျာ်ထဝ်တံရ။
တ္ၚဲဏံ ဂိတုဂျောန် (၄)၊ အခိၚ်နူဂယး ၜိုတ် (၆) နာဍဳပြၚ်ဂှ်ဝွံ ပ္ဍဲကဵုဆေၚ်ဍာ်လက်ဖက် ကေုာံ (ရေႊချိုးဖြူထမၚ်း) မၞုံဂတမုက်ဘာ (အ ထ က ၂) ၊ ပ္ဍဲဂၠံၚ် (ဗိုလ်ချုပ်) ၊ အရာပ်ကအ်သာန်နာၚ်၊ ဍုၚ်ကျာ်ထဝ်ဂှ် ညးတြုံၜါတၠ လုပ်စိုပ်ကၠုၚ်နကဵုကွဳလိုန်ဓာတ် ဗီုညးရာန်ဖျာရ။
ဗွဲကြဴဂှ်ဝွံ တၠဆေၚ်ဖျာ ဥူကျဝ်ဇြဲ အာယုက် အကြာ (၄၅) သၞာံဂှ် ပန်ဂစိုတ်ဏာကဵုလွဟ်ဂၠေံဂၠေံ ၜိုတ် (၅) တဲ စုက်စုက်ရောၚ် ဂးရ။
“ကိုဝ်ကျဝ်ဇြဲဂှ်တှေ် နွံကောန်ဇာတ် (၃) တၠကဵု သမ္ဘာမွဲတၠရ။ ညးဂှ် ပံက်ဆေၚ်ဖာနူဂယးတုဲ ပလေဝ်ပလေတ်မံၚ်။ ကောန်ၚာ်တြုံၜါဂှ် လုပ်ကၠုၚ်ကဵု ကွဳလိုန်ဓာတ်ရ။ ဗီုကဵုရာန်ၜံက်၊ အခိၚ်ပသောၚ်လှုဲဂှ် ပန်ဂစိုတ်ဏာရ။ တုဲတှေ် ဍေံတံဂြိပ်တိတ်အာကဵု ကွဳလိုန်ဓာတ်ရ” သာ်ဝွံ ညးဒၟံၚ်တန်တဴမံၚ် ပ္ဍဲအရာပ်သာန်နာၚ်မွဲတၠ ဟီုရ။
ဥူကျဝ်ဇြဲဝွံ ဒးအာဘဲဝပ် ပ္ဍဲမုက်၊ တဲ၊ သြိုဟ်တုဲ ချိုတ်အာပ္ဍဲဒၞာဲ ဒးဒုၚ်ပန်ဂှ်ရောၚ် ညးဆက်ဟီုရ။
တုဲပၠန် သ္ကိုပ်အုပ်ဓုပ် ကေုာံ ဂကောံဒပ်ဗၠာဲသၟိၚ်တံ အာစိုပ်စၟဳစၟတ် ပ္ဍဲကဵုဒၞာဲကတဵုဒှ်ပရူပရာဂှ်ကီုလေဝ် ဆေၚ်စပ်ကဵု ပရူဒဒှ်ဂှ်တုဲ ဟွံဟီုဂးသောၚ်ကလးမွဲသာ် ကေုာံ ဟွံရေၚ်တၠုၚ်ကေတ်အရေဝ်မွဲသာ်ရောၚ် ညးဒေသတံ ဟီုရ။
“ဒှ်အာတှေ် ဇကုရ ဒးဒုၚ်၊ ကၠုၚ်ကျောဝ်တုဲတှေ် မုဟွံဟီုမွဲသာ် က္လေၚ်စဴအာရ။ ကိုဝ်ကျဝ်ဇြဲဂှ်တှေ် ၜိုတ်ပိုဲတီဂှ် မၞိဟ်ဓမ္မတာမွဲရ။ ဂွံဆက်စပ်ကဵု ဒပ်ပၞာန်ဂှ်လေဝ် ဟွံဂွံဆဵုကေတ်ပုဟ်။ ဂွံဒှ်သၞကဵု ညးတၞဟ်ဂှ်လေဝ် ဟွံဆဵုပုဟ်။ ဆဂး မုညးပၞုက်လဝ်တုဲ ဒှ်အာဗီုဏံဂှ် ဟွံတီပုဟ်” သာ်ဝွံ ညးဒေသမွဲတၠ ဟီုရ။
ဇွညးချိုတ်အာဂှ်ဝွံ ပလံၚ်ဗ္စိုပ်စၟဳစၟတ် ပ္ဍဲရုၚ်ဂဥုဲကျာ်ထဝ်တုဲဂှ် အခိၚ်လၟုဟ်ဏံ က္လေၚ်စိုပ်အာ ပ္ဍဲသ္ၚိဒၟံၚ်ယျရောၚ် ဂွံတီကေတ်ရ။
ညးလုတ်လောန်ဒုဟ်တံဂှ်ဝွံ ကတဵုဒှ်ပရူပရာတုဲဂှ် ဂြိပ်ဗၠးတိတ်အာ နကဵုကွဳလိုန်ဓာတ်တုဲ ဆေၚ်စပ်ကဵုအမှုဂှ်မ္ဂး ပရေၚ်စၟဳစၟတ်ဂၠိုက်ဂၠာဲဟွံမွဲဏီရောၚ် ဂွံတီကေတ်ရ။
ဂိတုမေ (၂၈) တုဲကၠုၚ်တေံဂှ်လေဝ် ပ္ဍဲလ္တူဂၠံၚ်ကွဳစက် လ္ဂုၚ် – မတ်မလီု၊ အရာပ် (ဒေါက်ရပ်) ၊ ပွိုၚ်ဍုၚ်ၜဳက္လေၚ်ဂှ် ဂကောံဒပ်ကမ္မယှေန်ပၞာန်တံ ပန်စုတ်ညးတြုံဒေသဍုၚ်ၜဳက္လေၚ်မွဲတၠတုဲ ဒးချိုတ်အာလဝ်ကီုရ။