ပ္ဍဲကဵုကၟိန်ဍုၚ်သေံ အကြာထံၚ်ခၞောန် ကဵု ဝၚ်ကဂှ်ဝွံ ကောန်ၚာ်ဗြဴ အာယုက် (၇) သၞာံ ကၠေံမံၚ်ပွိုၚ် (၂) တ္ၚဲပြၚ် ဂှ် ဂိတုဂျောန် စၟတ်တ္ၚဲ (၁) တ္ၚဲဏအ် ဂွံကလေၚ်ဆဵုကေတ် ချိုတ်မံၚ်ဣရရောၚ် ဂွံတီကေတ်ရ။
ကောန်ၚာ်ဗြဴဏအ်ဝွံ ယၟုဂှ် မိအၚုန် မိကီု အပါကီု ဂကူမန်တုဲ မိမကောန်ၚာ်ဗြဴဏအ်ဂှ် နွံတန်တဴမံၚ်ပ္ဍဲကွာန်ဝၚ်က ဇာတိ နူကဵုကွာန်အနေၚ် ပ္ဍဲကဵုဍုၚ်ပိုဲရ။
တုဲကၠုၚ်ဂိတုမေ၊ စၟတ်တ္ၚဲ ၃၀ အခိၚ်ဒေါဝ်တ္ၚဲ ၁ နာဍဳဂှ် မိက်ဂွံအာတိတ်ရာန်စကွာၚ်ဂးတုဲ ကောန်ၚာ်ဗြဴဂှ် တိတ်အာနူသ္ၚိတုဲ ကၠေံအာအကြာဂၠံၚ်ဍာန်ဂှ်ရ။
စနူအခိၚ်ကောန်ၚာ်ဏံ ကၠေံအာတုဲ ဂကောံသ္ၚိကၟိန်တအ်ကီု၊ ပွဳူပွိုၚ်သ္ၚောဲကြပ်တအ်ကဵု ဗၠာဲသၟိၚ်သေံဒေသတအ် ဗက်ဂၠိုက်ဂၠာဲမံၚ်အဆက်က်တုဲ ပ္ဍဲကဵုတ္ၚဲဏအ် အခိၚ်နူဂယး (၁၀) နာဍဳကဝိုက်ဂှ် ဂွံကလေၚ်ဆဵုကေတ်ကီုလေဝ် ချိုတ်မံၚ်ဣရတုဲ ဂကောံရီုဗၚ်မၞိဟ်သေံတအ် ဇွကောန်ၚာ်ဗြဴဏအ်ဂှ် ဂွံဆဵုကေတ်လဝ် ပ္ဍဲကဵုကြပ်ဘာလကျာ် နွံဗ္ဒါဲကၠအ်မွဲဒၞါဲဂှ်တုဲ ဇွကောန်ၚာ်ဗြဴဂှ် အုဲအေၚ်မံၚ်အိုတ်ရ။
ပြဟ်ဟ်ဏအ်ဝွံ မၞိဟ်တြုံ အာယုက် (၃၅) သၞာံ ဒှ်မံၚ်သံသယမွဲတၠဂှ် နွံကြပ်မံၚ်ကဵုသ္ၚိဂှ်တုဲ အခိၚ်စၟဳစၟတ်ဂှ် ဂွံဆဵုကေတ်လဝ် မဂဥုဲၜူမာဲကီု ပ္ဍဲကဵုဇွကောန်ၚာ်ဗြဴဏအ်ပၠန်ဂှ် ပဍေတ်ပတ်ဂစိုတ်လဝ် ပ္ဍဲကအ်နွံတုဲ ပရူဒဒှ်ဏအ် ညံၚ်ဂွံမံက်အာပြဟ်ဟ်မာန်ဂှ် ညးတာလျိုၚ်တအ် ဂ္စာန်ဂၠိုက်ဂၠာဲမံၚ်ဖိုဟ်ရောၚ် ဂွံတီကေတ်ရ။
တုပ်သာ်ဂှ်ကီု ပ္ဍဲကၟိန်ဍုၚ်သေံ၊ ဒၞါဲကဵုဒေသဖါန်ၚာဂှ်လေဝ် ကောန်ၚာ်ဗြဴ မၞုံယၟုမိအေမန် အာယုက် (၂) သၞာံပြၚ် ကၠေံမံၚ်ပွိုၚ် (၄) တ္ၚဲပြၚ်ဂှ် ဟွံဂွံကလေၚ်ဆဵုဏီတုဲ အကြာမွဲၜါတ္ၚဲဏအ် ပရေၚ်ကောန်ၚာ်မန်တအ်ကၠေံ က္တဵုဒှ်မံၚ်ပ္ဍဲဍုၚ်သေံဂှ် အဆက်က်နွံကၠုၚ်တုဲ နကဵုဂကူမန်နွံတန်တဴဍုၚ်သေံတအ် စွံသတိကဵုပရေၚ်ဂီုကၠီုကောန်ၚာ်တအ်ညိဂှ် နူကဵုဌာန်ပရိုၚ်မန်ပိုဲ မိက်ဂွံကဵုဏာသမ္တီကီုရ။
