အခိၚ်ကရောၚ်ပၞာန်ကမ္မယှေန်ပၞာန်တံ ထ္ပက်ကၠုၚ်ကရောၚ်ပၞာန် လ္ပာ်ကွာန်နှေဟ်ခရေၚ်၊ ပွိုၚ်ဍုၚ်ရေဝ်၊ တွဵုရးဍုၚ်မန်ဂှ် ရပ်ကော်ဏာလဝ် ညးတြုံဒေသမွဲတၠနွံရောၚ် တမ်ရိုဟ်ပရိုၚ်ပၠန်ဂတးတံ ဟီုရ။
နကဵုဗီုပြၚ်ပသောၚ်တိဍာ် ကရောၚ်ပၞာန်ကမ္မယှေန်ပၞာန် ဇြဟတ်ဗဒဲါ (၂၀၀) နူကွာန်တၟံကၞေၚ်ဂှ် စနူဂိတုဂျောန် စၟတ်တ္ၚဲ (၈) တုဲကၠုၚ်ဏံ ထ္ပက်လုပ်ကၠုၚ်ကရောၚ်ပၞာန် လ္ပာ်ကွာန်နှေဟ်ခရေၚ်၊ ကွာန်(သပြေရွာသစ်) ကေုာံ လ္ပာ်ကွာန်ကအ်ဍောတ်တေံရ။
ယၚ်ကရောၚ်ပၞာန်ဂှ်ဝွံ အဃောလုပ်စိုပ်ကၠုၚ် အပ္ဍဲကွာန်နှေဟ်ခရေၚ်ဂှ် ရပ်ကော်ဏာ ညးတြုံဒေသဂှ်မွဲတၠတုဲ ဂိတုဂျောန် (၉) ဏံ က္လေၚ်ဆုတ်တိတ်အာလဝ်ရောၚ် သ္ကိုပ်တမ်ဒပ် ဂကောံဒပ်စဵုဒၞာညးဍုၚ်ကွာန်ရေဝ် YPDF ဗိုလ်ယာန်နာၚ် ဟီုရ။
“ကရောၚ်ပၞာန်ဍေံတံလုပ်ကၠုၚ်ဂှ် ဍာံမံၚ်ရ။ ကၠုၚ်ရပ်မၞိဟ်ဏောၚ်။ ကာလလုပ်စိုပ်ကၠုၚ် လ္ပာ်နှေဟ်ခရေၚ်ဂှ်တှေ် ရပ်ဏာညးတြုံပ္ဍဲကွာန်ဂှ်မွဲတၠရ။ ရပ်တုဲတှေ် ဍေံတံ တိတ်အာနူကွာန်ရ” သာ်ဝွံ ဟီုရ။
ညးတြုံဒေသဂှ်ဝွံ သွက်သ္ဂောံပလံၚ်ဗ္စိုပ်တန်ဗ္တောန်ပၞာန်ဂှ် နူကရောၚ်ပၞာန်ကမ္မယှေန်တံ ကၠုၚ်ရပ်နကဵုဇြဟတ်ရောၚ် ညးဒေသတံဟီုကီုလေဝ် နကဵု IMNA သ္ပဒတန်တၞဟ်ခြာ ဟွံမာန်ဏီရ။
အတိုၚ်အကာဲအရာလၟုဟ်ဏံမ္ဂး အပ္ဍဲပွိုၚ်ဍုၚ်ရေဝ်ဝွံ သၟာၚ်နူကမ္မယှေန်ပၞာန်တုဲ ဂကောံဒပ်ပၠန်ဂတးတံ ချဳဓရာၚ်ပရေၚ်ပၞာန်အောန်မံၚ်ဂှ်ရ ဟွံဒးဒှ်ဂဝိၚ် အကာဲအရာ ကတဵုဒှ်ပေဲါဗ္တိုက်ရဂှ်လေဝ် ညးဆက်ဟီုရ။
“ပရေၚ်ချဳဒရာၚ်ပၞာန်ဂှ်တှေ် သ္ၚိတ်ဇြမံၚ်အိုတ်ရ။ ဂကောံကမ္မယှေန်ပၞာန်ဂှ်တှေ် ဗီုကၠာတေံဟေၚ် အာတေံ အာဏံနွံရ။ ဆဂး ဗီုကဵုထ္ပက်ကရောၚ်ပၞာန်ဂှ် ဟွံသေၚ်ပုဟ်။ ဗီုကဵုဂေတ်မံၚ်နေဝ် သွက်ပရေၚ်ဂီုကၠီုရ။ အဃောဍေံတံအာကၠုၚ်ဂှ်တှေ် စၟဳစၟတ်မံၚ်နွံရ” သာ်ဝွံ ညးဟီုရ။
ဟိုတ်နူအကာဲအရာဂှ်တုဲ အဃောအာမံၚ်တရဴမ္ဂး သ္ပသတိ ညံၚ်ဟွံဂွံဆဵုဂဗကဵု ကရောၚ်ပၞာန်ကမ္မယှေန်ပၞာန် ဂေတ်မံၚ်ဒေသ (နေဝ်) ညိဂှ်လေဝ် ဖတိုက်ဖအောဝ်လဝ်ရ။
ပွိုၚ်ဍုၚ်ရေဝ်ဝွံ ဒှ်ဒေသ ဂကောံပၠန်ဂတးတံ ချဳဓရာၚ်ဇြဟတ်ခိုဟ်တုဲ ဂကောံသၟဝ်တဲ ကမ္မယှေန်ပၞာန်ဂမၠိုၚ်ဂှ် ဂကောံဒပ်ပၠန်ဂတးတံ ရပ်မံၚ်မွဲနှေံမွဲနှေံနွံတုဲ လ္ပာ်ကမ္မယှေန်ပၞာန်တံလေဝ် လုပ်စိုပ်ရပ်ဒၟံၚ် ညးဆက်စပ်ကဵု ပၠန်ဂတးတံ မွဲနှေံမွဲနှေံကီုရ။
အတိုၚ်တၚ်နၚ်ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် (AAPP) ကေုာံ တၚ်နၚ်တၞဟ်တၞဟ်တံဂှ်မ္ဂး စနူသီအဝဵုတုဲ စဵုကဵုတ္ၚဲဏံဝွံ အလုံမွဲဍုၚ်ဂှ် ကောန်ညးဍုၚ်ကွာန် ကေုာံ ညးချဳဓရာၚ်ပရေၚ်ဍုၚ်ကွာန် ဒးဒုၚ်ရပ်ဟွံဗဗွဲဓဝ် သီုဖအိုတ် နွံလၟိဟ်ကဵုဠက်ရဂှ်လေဝ် ဓမံက်ထ္ၜးလဝ်ရ။