ပ္ဍဲတွဵုရးဍုၚ်မန်ဝွံ ပ္ဍဲကဵုဘာတန်အလဵုအသဳ ပွိုၚ်ဍုၚ်နာနာဂှ် ပံက်ကဵုလဝ်အခေါၚ် ဂၠာဲစပၞော်ဩန်ဂၠံၚ်သ္ကဲနွံဂၠိုၚ်ဒၟံၚ်ရောၚ် ကမ္မတဳရေၚ်တၠုၚ်ဖဵုဘာ အဆံၚ်ဘာတန်သၠုၚ် ပွိုၚ်ဍုၚ်မုဟ်ဍုၚ်မွဲတၠ ဟီုရ။
ပါဲနူဩန်ဂိတုတုဲ ပၞော်ဩန်လုပ်သွက်အ္စာဂမၠိုၚ်တအ်ဂှ် ပံက်ကဵုလဝ်အခေါၚ် မပ္တံကဵု ပံက်ဗ္တောန်အခိၚ်ပဵုကီု၊ ပံက်ဗ္တောန်လိက်မ္ၚးအခိၚ်ဘာ ကော် ဂျူယှေန်ကီုဂှ် ကဵုလဝ်အခေါၚ်နွံရောၚ် ကမ္မတဳရေၚ်တၠုၚ်ဖဵုဘာဂှ် ဟီုထ္ၜးဗီုဏံရ။
“အ္စာတအ် သြန်ဂိတုသၟးဂှ် စသုၚ်ရပ်စပ်ဟွံရုမ်ဂပ်၊ ဟိုတ်ဂှ်ရ ပၞော်ဂၠာဲစဩန်ဂၠံၚ်သ္ကဲ စရိတ်အခိၚ်ပဵု၊ စရိတ်ဗ္တောန်လိက်မ္ၚးအခိၚ်ဘာ ပံက်ဂျူယှေန် ဗီုဏံဂှ် စှေ်အာအခိုက်အလေအ်ကွေံရ၊ လဆောဝ်တှေ် လိက်တေၚ်တိုန်တှေ် မွဲလစုတ်ဂှ် စၟဳစၟတ် တိုန်ၜိုတ်ဝတ်ပြေနွံလေဝ် တုဲညိတှေ် ဆက်အာအတိုၚ်တြေံပၠန်၊ ဗီုဏံဂှ် က္တဵုဒှ်ဒၟံၚ်ဇၟာပ်ဘာရ” သာ်ဝွံ ညးဟီုရ။
ဘာလ္ၚဵုဂှ် ပါဲနူစရိတ်အခိၚ်ဗ္တောန်လိက်ပဵုကီု၊ ပါဲနူစရိတ်ဗ္တောန်လိက်မ္ၚး စရိတ်ဂျူယှေန်ပၠန်ဂှ် တၚ်ဍိုပ်လိက်မွဲမွဲသာ်တုဲ ဗက်ဒၟံၚ်လ္တူကွးဘာတအ် မွဲဏှေအ်မွဲဏှေအ်လေဝ် နွံရောၚ်ဂှ် ကမ္မတဳရေၚ်တၠုၚ်ဖဵုဘာ ပွိုၚ်ဍုၚ်ဇြပ်ဗုမွဲတၠပၠန်ဂှ် ဟီုထ္ၜးဗီုဏံပၠန်ရ။
“စရိတ်ဗ္တောန်လိက်အခိၚ်ပဵုတအ်၊ စရိတ်ဗ္တောန်လိက်ဂျူယှေန်တအ်ဂှ် ကလၚ်ခိုဟ်မံၚ်ညိဏီ၊ ပါဲနူဏံတုဲတှေ် မွဲဏှေအ်ညိ ကၟဳဘာဓဇူတုဲ ဗက်လှုဲရာန်သောတ် သွက်ဂွံကၟဳဘာဂး၊ မွဲဏှေအ်ညိ အ္စာၝောံပြံၚ်တုဲ စရိတ်ကလအ်စအ္စာၝောံဂး၊ မွဲဏှေအ်ညိ ကၠောန်အတေံ ကၠောန်အဏံတုဲ ဗက်မံၚ်လှုဲလ္တူကွးဘာတအ် မွဲဏှေအ်မွဲဏှေအ်လေဝ် နွံမံၚ်ပေၚ်ထာတ်၊ ဗီုဏံဂှ် နွံဂၠိုၚ်ကွေံကွေံ” သာ်ဝွံ ညးဟီုရ။
နူကဵုအ္စာဘာတအ် တၚ်ဍိုပ်လိက်နာနာတုဲ ဗက်ကေတ်ဒၟံၚ်ဩန် လ္တူကွးဘာဂမၠိုၚ်တအ်ဂှ် နူကဵုညးတာလျိုၚ်အဆံၚ်လ္တူတအ် ဗၜေက်လဝ်မတ်တုဲ တုပ်ပၟာညံၚ်ရဴ ပံက်ကဵုလဝ်အခေါၚ် ဂၠာဲစဩန်ဂၠံၚ်သ္ကဲကီုရ။
သၞောတ်ပရေၚ်ပညာ အလဵုအသဳကၟိန်ဍုၚ်ဗၟာဂှ် ၜိုန်ရလလောၚ်တြးကြီုပ္တိတ်လဝ် သၞောတ်ဗ္တောန်ပညာ မသက္ကုၚုဟ် (သၞောတ်ဗ္တောန်ပညာမးမး) ကီုလေဝ် ကွးဘာမွဲမွဲတၠ ပွိုၚ်မွဲသၞာံမ္ဂး မိမကွးဘာတအ် အိုတ်မံၚ်ဟွံသာရောၚ် ဇၟာပ်မိမကွးဘာတအ် ကရောတ်မံၚ်ဖအိုတ်ရောၚ် ဂွံတီကေတ်ရ။