ပ္ဍဲဘာသဇိုၚ်အဆံၚ်တန်မူလ မၞုံပ္ဍဲတွဵုရးဍုၚ်မန်ဝွံ သွက်သ္ဂောံဗ္တောန်လိက်ပတ်မန် စဵုကဵု Grade 5 မာန်ဂှ် ညးစၞးကၠတ်ထဝ်တွဵုရး ညးစၞး စၟတ် (၂) ပွိုၚ်ဍုၚ်ပံၚ် ပ္တိုန်ထ္ၜးဂလာန် ပ္ဍဲပေဲါကောံဓရီုကၠတ်ထဝ်တွဵုရးရ။
ပ္ဍဲပေဲါကောံဓရီုလၟေၚ်ဍာံဒုတိယ ကၠတ်ထဝ်တွဵုရးဍုၚ်မန် အလန်တတိယ တ္ၚဲပထမ မကၠောန်ဗဒှ် ဂိတုဂျောန် (၉) နူတနေံဏံဝွံ ညးစၞးကၠတ်ထဝ်တွဵုရး ညးစၞး စၟတ် (၂) ပွိုၚ်ဍုၚ်ပံၚ် နာဲသာန်တေန် ပ္တိုန်ထ္ၜးဂလာန်သာ်ဝွံရ။
နာဲသာန်တေန်ဝွံ ပွမဗ္တောန်မံၚ်လိက်ပတ်မန် အဆံၚ်မူလဂှ်မ္ဂး သွက်ဂွံလေပ်အဆံၚ်သဇိုၚ်ဟွံသေၚ်မွဲသာ် သွက်ဂွံလေပ်ပေၚ်ပေၚ် နူကဵုဗ္တောန်မံၚ် စဵုကဵု Grade 3 ဂှ် ဗ္တောန်စဵုကဵု Grade 5 ထေက်ရောၚ် ဂးရ။
ဂလာန်ပ္တိုန်ထ္ၜးဂှ်ဝွံ ညးစၞးကၠတ်ထဝ်တွဵုရး ညးစၞး စၟတ် (၂) ပွိုၚ်ဍုၚ်ၜဳက္လေၚ်၊ ဥက္ကဌကမ္မတဳ ဆေၚ်ကဵုကေၚ်ကာကောန်ဂကူကောန်ဍုၚ်အရၚ် ဥူကျဝ်ဇြေယာမေန်ဂှ် ဒုၚ်တဲသဳကၠဳ ပ္ဍဲကၠတ်ထဝ်ထေက်ရောၚ် ထံက်ဂလာန်သဳကၠဳဏာရ။
ဥူကျဝ်ဇြေယာမေန်ဂှ် “ဗ္တောန်ဒဵုကဵု Grade 5 မှဟေၚ် လေပ်ပေၚ်ပေၚ်တုဲ ဒှ်ညံၚ်ရဴထိၚ်ဒက်လိက်ပတ်မန်ဂှ်ရ ဂလာန်ပ္တိုန်ထ္ၜးဏံဂှ် ဒုၚ်တဲသဳကၠဳ ပ္ဍဲကၠတ်ထဝ်ထေက်ရောၚ်” ထံက်ဂလာန်သဳကၠဳဏာရ။
ဂလာန်ပ္တိုန်ထ္ၜးဂှ်ဝွံ ပ္ဍဲတ္ၚဲတတိယကောံဓရီုကၠတ်ထဝ်ဂှ် ဆက်သဳကၠဳအာရောၚ်တုဲ ဖျေံသ္ဂုတ်သွာတ် သ္ပဒတန်ဂလာန်ပ္တိုန်ထ္ၜးဂှ်မ္ဂး ကိစ္စဗ္တောန်လိက်ပတ်မန်အဆံၚ်တန်မူလဂှ် သၠုၚ်ဗ္တောန်အာ စဵုကဵု Grade 5 ရောၚ်။
အခိၚ်လၟုဟ်ဏံဝွံ ပ္ဍဲအဆံၚ်တန်မူလသဇိုၚ်ဂှ် ဗ္တောန်မံၚ်လိက်ပတ်မန် စဵုကဵု Grade 3 ဟေၚ်တုဲ ဟွံစိုပ်တရဴရဂှ် ဂွံတီကေတ် နူအ္စာ/အ္စာၝောံ ဗ္တောန်လိက်ပတ်မန်တံရ။