ပ္ဍဲကြပ်ခရိုၚ်တက်၊ ပယျဵုသေံဗၟာဂှ်ဝွံ စဵုကဵုဂိတုဂျူလာၚ် (၂၃) ဏံ အကြာဒပ်ကမ္မယှေန်ပၞာန်ကဵု ဒပ်ပံၚ်ကောံပၠန်ဂတးတံ ပေဲါဗ္တိုက်ဆက်သ္ကာတ်မြဟ်မံၚ်ကီုလေဝ် အခိၚ်လၟုဟ်ဏံ ဘာဗ္တောန်လိက်မၞုံအပ္ဍဲခရိုၚ်တံ က္လေၚ်ပံက်ဘာအတိုၚ်တြေံ (ဓမ္မတာ) ယျရောၚ် ဂွံတီကေတ် နူဌာန်ပရိုၚ်သေံ (Thai PBS North) ဓမံက်ထ္ၜးလဝ်ရ။
ဟိုတ်နူပေဲါဗ္တိုက်ကြပ်ပယျဵုဂှ်ရ ဘာဗ္တောန်လိက်လ္ၚဵု မၞုံပ္ဍဲဂကောံကွာန်မဟာဝါန်၊ ပွိုၚ်ဍုၚ်မာဲချံက်၊ ခရိုၚ်တက်ဂှ်ဝွံ ကၠာတေံ နူကဵုဆုဲပြံၚ်ဗ္တောန်မံၚ်ယာယဳ ပ္ဍဲဇြပ်သဘၚ်ဓရ်ကဵု ဘာလကျာ်ဂှ် အခိၚ်လၟုဟ်ဏံ က္လေၚ်ဗ္တောန်ဒၟံၚ် အပ္ဍဲအရှာံဘာမူလဂှ်ရ။
ဘာဝွံ က္လေၚ်ပံက်အတိုၚ်တြေံ (ဓမ္မတာ) ကီုလေဝ် ကမ်လွဟ်လ္ၚဵု နူပယျဵုမွဲလ္ပာ်တေံ ဒတုံစှေ်မံၚ်လ္ပာ်သေံနွံဂှ်ရ နကဵုအ္စာ၊ အ္စာၝောံ ကေုာံ ကွးဘာတံ စွံသတိဗွဲတၟေၚ်တုဲ နွံပၟိက်ကဵု အကာဲအရာဒးမၚ်ရံၚ်ဒၟံၚ် ကြပ်ကြပ်ဖိုဟ်ရ။
သွက်ပရေၚ်ဂီုကၠီုကွးဘာဂမၠိုၚ်ဂှ်ဝွံ ညးတာလျိုၚ်ဘာ ကေုာံ အ္စာဂမၠိုၚ်တံ ဟွံကဵုအခေါၚ် ကုကောန်ၚာ်တံ ဝေၚ်လ္ပာ်မ္ၚးတုဲ သွက်ဂွံမံၚ်တန်တဴ အပ္ဍဲစမြိုၚ်ဟေၚ်ဂှ် ကဵုလဝ်စၞောန်နွံရောၚ် ဂွံတီကေတ်ရ။
တုဲပၠန် သွက်ကွးဘာ ကေုာံ အ္စာ၊ အ္စာၝောံဂမၠိုၚ် သ္ဂောံဇူဒီုကာတၟေၚ်မာန်ဂှ်လေဝ် ဒပ်ပၞာန်သေံတံ ဖန်ဇန်လဝ်ကဵု သွက်ပရေၚ်ဂီုကၠီု အပ္ဍဲအရှာံဘာဂှ် ချိုတ်ချိုတ်ပၠိုတ်ပၠိုတ်ရ။
အတိုၚ်အကာဲအရာ ပရေၚ်ပၞာန်လၟုဟ်ဏံမ္ဂး ဒပ်ကမ္မယှေန်ပၞာန်တံဝွံ သွက်ဂွံဗပေၚ်ဇြဟတ် ပ္ဍဲဇရေၚ်ဗဒိုပ် ပွိုၚ်ဍုၚ်ဝဝ်လေဝ်မျာၚ်၊ တွဵုရးကရေၚ် မသ္ၚောဲခြာနူ ပွိုၚ်ဍုၚ်ဖုတ်ဖရ၊ ခရိုၚ်တက် (၃) ကဳလိုဝ်မဳတာဂှ် ဂိုတ်ဂ္စာန်ဒၟံၚ်ရ။
ဒပ်ကမ္မယှေန်ပၞာန်တံဝွံ ပြုပြေၚ်ထ္ပက်မံၚ်ပၞာန် ကုဒပ်ပံၚ်ကောံပၠန်ဂတးတံ နကဵုလွဟ်ဇၞော်၊ က္ၜၚ်ကျာ ဗွဲမသ္ကာတ်မြဟ်ကီုလေဝ် စဵုကဵုအခိၚ်လၟုဟ်ဏံ သီကေတ်ဗဒိုပ်ဟွံမာန်ဏီတုဲ လ္ပာ်ကမ္မယှေန်ပၞာန်တံဂှ် ကောန်သ္ဂံၚ်ဗွဲမဂၠိုၚ် ဒးဘဲဝပ်ချိုတ်ဂျိုၚ်နွံရ။
မွဲလ္ပာ်ဂှ်လေဝ် ညးတာလျိုၚ်သေံတံ ဗပေၚ်လဝ်ဇြဟတ်ဂီုကၠီုပယျဵုတုဲ မၚ်ရံၚ်ဒၟံၚ်ရောၚ် ဂွံတီကေတ်ရ။