ဒပ်ကမ္မယှေန်ပၞာန် ထ္ပက်ကၠုၚ်ကရောၚ်ပၞာန် ပ္ဍဲသ္ကုတ်ဂၠံၚ် ကမမံၚ် – ဖာပေါန်၊ ခရိုၚ်ဖာပေါန်၊ တွဵုရးကရေၚ်ဂှ်ကဵု ဒပ်ပံၚ်ကောံပၠန်ဂတး မပါလုပ်သီုဒပ်ပၞာန်ဗၠးၜးကရေၚ် (KNLA) တံ စပ္တံနူလဒေါဝ်ဂိတုဂျူလာၚ်ဏံတုဲ ကတဵုဒှ်မံၚ်ပေဲါဗ္တိုက်ကြပ်ရိုဟ်တ္ၚဲရောၚ် ဂွံတီကေတ် နူတမ်ရိုဟ်ပရိုၚ်ပၠန်ဂတး အပ္ဍဲဒေသရ။
ဗဒိုပ်ဗျူဟာဖာပေါန် ဒပ်ပံၚ်ကောံပၠန်ဂတးတံ ဗိုၚ်တၟာတ်ဆိုအ်လဝ်ဂှ် ကမ္မယှေန်ပၞာန်တံ သွက်ဂွံဗပေၚ်ဇြဟတ်ပၞာန်၊ ဇွောံမစၞစ ကေုာံ လွဟ်လနက်ဂမၠိုၚ်ဂှ်မ္ဂး စကာဂၠံၚ်ဍာန် ကမမံၚ် – ဖာပေါန်တုဲ ဗလးမံၚ်ကရောၚ်ပၞာန်အဆက်ဆက်ရ။
အပ္ဍဲကရောၚ်ပၞာန်ဂှ် ကောန်သ္ဂံၚ်နူတမ်ဒပ်နာနာ မၞုံအပ္ဍဲတွဵုရးကရေၚ် မပါလုပ်ဂှ်ရ ဇြဟတ်နွံလၟိဟ်ကဵုလ္ၚီရောၚ် တမ်ရိုဟ်ပရိုၚ်ပၠန်ဂတး မၞုံဒေသဖာပေါန်မွဲတၠ ဟီုရ။
“ဗျူဟာဖာပေါန်ဂှ် ဒပ်ပံၚ်ကောံပၠန်ဂတးတံ ဗိုၚ်ဗ္တိုက်မံၚ်လအ်ရ။ ဗျူဟာညံၚ်ဟွံဂွံစှေ်ဂှ်တှေ် ကမ္မယှေန်ပၞာန်တံလေဝ် ဒုၚ်ဒဝ်မံၚ်ကဵုဇြဟတ်ပေၚ်ပေၚ်ရ။ ဗျူဟာဂှ်လေဝ် စှေ်ဏောၚ်။ ဟိုတ်ဂှ်ရ စနူတမ်ဂိတုမေဂှ်တုဲ သွက်ဂွံပလံၚ်ပၞာန်ရီု နူသ္ကုတ်ဂၠံၚ်ကမမံၚ် – ဖာပေါန်ဂှ် စဂိုတ်ဂ္စာန်မံၚ်ရ” သာ်ဝွံ ဟီုရ။
ပ္ဍဲဒၞာဲကုန်ကျာ် (ဘုရားကုန်း)၊ ကြပ်ကွာန်ဖာလုၚ်လေဝ်၊ မၞုံအကြာဗဒိုပ်ဒပ်ကမမံၚ်ကဵု ကတိတိုၚ်ဂှ် ဟိုတ်နူဒပ်ပံၚ်ကောံပၠန်ဂတးတံ ကြတ်ဗ္တိုက် ကေုာံ ဒုၚ်ဒဝ်ဗ္တိုက်မံၚ်အဆက်ဆက်ဂှ်ရ ကရောၚ်ပၞာန်ကမ္မယှေန်ဂမၠိုၚ် ဆက်တိုန်ဂတဟွံမာန်ဏီ ဂးရ။
“ဍေံတံ တိုန်ဂတဟွံဂွံတှေ် ပ္ဍဲကဵုကွာန်ကြပ်ကြပ်တံဂှ် ဂြာတ်ထောံဖျေံဗမ်ဂေတ်ကၠောံရ။ လၟုဟ်လေဝ် သွက်ဂွံပလံၚ်ဇွောံမစၞစကဵု လွဟ်လနက် အရၚ်ကရောၚ်ပၞာန်တံဂှ်တှေ် နကဵုရီုဗၚ် BGF တုဲ နူကဵုကမမံၚ်ဂှ် ပလေဝ်ပလေတ်လဝ် လၟိဟ်ကွဳစက်ဗွဲမဂၠိုၚ်ရ” သာ်ဝွံ ညးတမ်ရိုဟ်ပရိုၚ်လ္တူဂှ် ဆက်ဟီုလဝ်ရ။
ပ္ဍဲဂိတုဂျူလာၚ် စၟတ်တ္ၚဲ (၁၂) တုဲကၠုၚ်ဏံ ပ္ဍဲကွာန်ပိုဝ်ဂါ မၞုံပ္ဍဲသ္ကုတ်ဂၠံၚ်ကမမံၚ် – ဖာပေါန်ဂှ် ဗ္တိုက်ထောံဖျေံဗမ်ကဵုက္ၜၚ်ကျာတုဲ ပ္ဍဲဂိတုဂျူလာၚ် (၁၆) ဂှ်လေဝ် နကဵုက္ၜၚ်ကျာဗ္တိုက် ထပ်ထောံဖျေံဗမ် (၄) မ ပ္ဍဲကွာန်ထဳလဝ်တဳထဂှ်ပၠန်ရောၚ် ဇာနှိက်ထံက်ရီုၜိုဟ်လလမ်ကရေၚ် လလောၚ်ပ္တိတ်လဝ် ပ္ဍဲဂိတုဂျူလာၚ် (၂၀) ဏံရ။
ဟိုတ်နူဗ္တိုက်ကဵုက္ၜၚ်ကျာဂှ်ရ ညးဒေသလၟိဟ်ကဵုကၠံ ဟွံအောန်နူကွာန် (၆) ကွာန်တံ ဒးဂြိပ်ပဲါဒဴဒၟံၚ်ကီု သ္ၚိဒၟံၚ် (၁၃) မ၊ ဘာဗ္တောန်လိက် (၁) ဘာကဵု ဘာကျာ် (၁) ဘာ လီုလာ်ဆောံလေၚ်အာတုဲ ကောန်ညးဍုၚ်ကွာန် ဒးဘဲချိုတ်ဂျိုၚ်ဟွံမွဲဏီရောၚ် ဂွံတီကေတ်ရ။
ခရိုၚ်ဖာပေါန်ဝွံ ပါလုပ်မံၚ် အပ္ဍဲတိဍာ်မဟာဒပ် (၅)၊ ဗော်သွးကရေၚ် (ကေအေန်ယူ) ထိၚ်ဒဝ်ဂှ်တုဲ ဗွဲကြဴနူဒပ်ပၞာန်သီအဝဵု သၞာံ (၂၀၂၁) တုဲဂှ် အကြာဒပ်ကမ္မယှေန်ပၞာန်ကဵု ဒပ်ပံၚ်ကောံပၠန်ဂတး KNLA က္ဍိုက်က္ဍိုပ်တံ ဒှ်မံၚ်ပေဲါဗ္တိုက်အဆက်ဆက်ရ။
အပ္ဍဲပေဲါဗ္တိုက်လၟုဟ်ဏံဝွံ နူဂကောံဒပ်ပၞာန်တံဂှ် သ္ကိုပ်တမ်ဒပ်ပါလုပ်ကီု သီုဖအိုတ် ညးဒးဘဲဝပ်ချိုတ်ဂျိုၚ် ဗွဲမဂၠိုၚ်နွံရောၚ် ဂွံတီကေတ်ရ။