ပ္ဍဲတွဵုရးကရေၚ် ပွိုၚ်ဍုၚ်ကအ်ကြိက်၊ ဍုၚ်ဘာအၚ်တေအ် ကၠေၚ်ဟွံပိုတ်ကီုလေဝ် စနူဂိတုဂျူလာၚ်သတ္တာဟတတိယဏံ ရာန်ကၠေၚ်ဝါတ်မံၚ်တုဲ ၚုဟ်ကၠေၚ်သၠုၚ်တိုန်မံၚ်ရောၚ် ညးဒေသတအ်ဟီုရ။
ဟိုတ်နူတၠဆေၚ်ကၠေၚ်ကဵု ညးပလံၚ်ကၠေၚ်တအ် ဒးဒုၚ်စၟဳစၟတ်မံၚ်ဗွဲမတေၚ်ဂြတ်ကီု၊ ညးပလံၚ်ကၠေၚ်တအ် ကၠတ်သွံပ္တိတ်မံၚ်ကၠေၚ် ဗွဲဟွံလုပ်သၞောဝ်ကီု၊ ကၠေၚ်လ္ပာ်ပယျဵုသေံကဵုဗၟာ လုပ်အောန်စှေ်ကီုတုဲ ပ္ဍဲတွဵုရးကရေၚ် ကၠေၚ်ၚုဟ်က္ဍၚ်တိုန်နွံရ။
ၜိုန်ၚုဟ်က္ဍၚ်တိုန်မံၚ်ကီုလေဝ် ဟိုတ်နူဒးရပ်စပ်စကာမံၚ် ပ္ဍဲပရေၚ်တဵုလွဳ၊ ပရေၚ်အာကၠုၚ်တအ်လၟိုန်တုဲ ညးဍုၚ်ကွာန်တအ် ဂစာန်ရာန်ပကောံမံၚ်ကၠေၚ်ရောၚ် ဂွံတီကေတ်ရ။
“ကၠေၚ်က္ဍၚ်တှေ်က္ဍၚ်လေဝ် ဗီုလဵုဂွံပရော။ ဇကုဒးသုၚ်စောဲမံၚ်ဍေံတှေ် ဍေံဟွံမွဲလေဝ်အာကၠုၚ်ဟွံဂွံ ကလောန်လေဝ်ဟွံတုဲ ဟဂှ်ရ ဒၞာဲဍေံနွံဂှ် ဒးအာရာန်ရလေဝ်။ လ္ပာ်ပိုယ်တှေ် သ္ၚိဗွဲမဂၠိုၚ်ဂှ် ရာန်ပကောံမံၚ်ကၠေၚ်ဖအိုတ်ရ” သာ်ဝွံ သၟာဗ္ၚနူပွိုၚ်ဍုၚ်ကအ်ကြိက်ဂှ် ဟီုရ။
မွဲသာ်ပၠန် လ္တူဍုၚ်ဘာအၚ်ဂှ် ကွဳလိုန်ဓာတ်တအ် ရပ်စကာနဲ Scan QR code တုဲ အခိၚ်ဟွံရုဲ မွဲသတ္တာဟမ္ဂး စဵုကဵု (၈) လဳတာ စုတ်မာန်တုဲ သွက်ကွဳစက်တအ်ဂှ် ဆက်စကာမံၚ်နဲစုံ၊ မတုဲ သွံမံၚ်ကၠေၚ် အပိုၚ်အခြာနွံရောၚ် ဂွံပရိုၚ်ရ။
“ကၠေၚ်ဟွံပိုတ်ဏီပုဟ် ပြဟ်ဟ်ဏံ။ ကွဳလိုန်ဓာတ် သီုလာၚ်ဇြေန်တအ်တှေ် ဒးၚုဟ်ဒးညိ၊ ယဝ် without တှေ် ဒး (၇၀၀၀၊ ၈၀၀၀) နွံမံၚ်။ ကွဳစက်ကာတအ်တှေ် ဒးဗက်မံၚ်သၞောဝ် စုံ၊ မ ဖိုဟ်ဏီ” သာ်ဝွံ ညးလ္တူဍုၚ်ဘာအၚ်မွဲတၠ သ္ဂးရ။
နူကမ္မတဳကောပ်ကာဲတြးခြိုၚ်ကၠေၚ်တအ် လလောၚ်တြးလဝ်ၚုဟ်ကၠေၚ် ပ္ဍဲစၟတ်တ္ၚဲ (၂၂)၊ ဂိတုဂျူလာၚ် (၂၀၂၆) ဏံမ္ဂး ပ္ဍဲတွဵုရးကရေၚ် 92 မွဲလဳတာဂှ် (၃၃၁၀) ဒကေဝ်၊ 95 မွဲလဳတာ (၃၃၈၅) ဒကေဝ် နွံရ။ ဆဂး ပ္ဍဲတွဵုရးကရေၚ် ဒေသလ္ၚဵုဂှ် ညးဍုၚ်ကွာန်တအ် ဒးကဵုၚုဟ် (၂) ဆ၊ (၃) ဆ တုဲ ဒးရာန်ကေတ်မံၚ် နူဆေၚ်ဗွိုၚ်မ္ၚးတအ်နွံရ။
ကၠေၚ်ပၠောပ်နၚ် ပ္ဍဲတွဵုရးကရေၚ်ဂမၠိုၚ်ဂှ် နူသၞေဟ်သဳလဝါ ဗဒါဲဍုၚ်လ္ဂုၚ်မွဲကဆံၚ် အတိုၚ်ဂၠံၚ် လ္ဂုၚ်−ဗဂေါ−သဓီု−ဘာအၚ်−ကအ်ကြိက်−ဗြဝတဳဂှ် တြးပ္တိတ်မံၚ်ကၠေၚ်ရ။
သၟာၚ်နူဂှ်ပၠန် ကၠေၚ်သွက်တွဵုရးကရေၚ်ဂှ် နူလပါ်ဍုၚ်သေံ လုပ်မံၚ်ကီုတုဲ ဟိုတ်နူပဋိပက္ခ ပရေၚ်ပၞာန်ကဵု ပယျဵုဒှ်ကၠုၚ်နွံဂှ်ရ သွက်ပရေၚ်ပလံၚ်ဗစိုပ်ကၠေၚ်တအ် ဒးဆဵုမံၚ်တၚ်ခက်ခုဲ မွဲဏှေံမွဲဏှေံရ။
ပ္ဍဲတွဵုရးဍုၚ်မန်လေဝ် စပ္တံနူဂျူလာၚ်သတ္တာဟဒုတိယဏံ ၜိုန်ရၚုဟ်ကၠေၚ်စှေ်အာကီုလေဝ် ကၠေၚ်ပိုတ်မံၚ်တုဲ ညးဒေသတအ် ဒးဆဵုမံၚ်တၚ်ခက်ခုဲ ပ္ဍဲကိစ္စလၟေၚ်တ္ၚဲကီုရ။