အပ္ဍဲကၟိန်ဍုၚ်ဗၟာဝွံ ကောန်ညးဍုၚ်ကွာန် မံၚ်တန်တဴဒၟံၚ် ပ္ဍဲဒၞာဲဒေသ ဒးဆဵုဂဗ ကုခက်ခုဲပရေၚ်ဆက်စၠောံတံဂှ် ဟိုတ်နူဒးဒုၚ်ဗ္တိုက်ကဵုက္ၜၚ်ကျာတုဲ အကာဲအရာ ပရေၚ်ဒးဘဲဝပ် ကေုာံ ဘဲအန္တရာဲချိုတ်ဂျိုၚ် နွံသၠုၚ်အိုတ်မံၚ်ဖိုဟ်ရောၚ် ဂွံတီကေတ်ရ။
အတိုၚ်စရၚ်စၟတ်သမ္တီ ပွိုၚ် (၃) ဂိတု နူဂိတုအေဗရဴ စဵုကဵုဂိတုဂျောန် ဂကောံမျာန်မာအေန်တာနိတ်ပရဝ်ဂျိတ် MIP ဂှ်မ္ဂး ဘဲအန္တရာဲဗ္တိုက်ကဵုက္ၜၚ်ကျာ ကတဵုဒှ်လဝ် (၅၂၀) ဝါတုဲ အောန်အိုတ် ကောန်ညးဍုၚ်ကွာန် (၃၁၄) တၠ ချိုတ်အာလဝ်နွံရောၚ် ဓမံက်ထ္ၜးလဝ်ရ။
ညးချိုတ်သီုဖအိုတ် (၉၅) က္ဍိုပ်ကၠံဂှ်ဝွံ ကတဵုဒှ်လဝ် ပ္ဍဲဒေသ ဒးဒုၚ်ထ္ပိုတ်လဝ်အေန်တာနိတ်တုဲ အောန်အိုတ် ညးဗြဴ (၅၈) တၠ၊ ကောန်ၚာ် (၄၁) တၠ ကေုာံ ညးအာယုက်ဇၞော် (၁၅) တၠ ချိုတ်အာလဝ်ရောၚ် ဂွံတီကေတ်ရ။
နကဵုပရေၚ်ပၞာန် မိက်သ္ဂောံဂွံမာန်၊ မိက်သ္ဂောံဂွံဗဗွဲဓဝ် ကေုာံ မိက်သ္ဂောံက္လေၚ်အုပ်ဓလီုတိဍာ်တုဲ မွဲကရောံကဵုထ္ပိုတ်အေန်တာနိတ်ဂှ်မ္ဂး စကာဗ္တိုက်မံၚ်ကဵုက္ၜၚ်ကျာ ဗွဲမဂၠိုၚ်ဂၠၚ်ရောၚ် ညးမၞုံအခေါၚ်ဟီုဂး MIP ကိုဝ်တေတ်ညာဏ် ဟီုရ။
“သွက်သွာၚ်ဇဳဏံ ဂွံဗ္တိုက်ကဵုၜၚ်ကျာဂှ် ထ္ပိုတ် Shut Down အေန်တာနိတ်ရ။ ဟိုတ်ဂှ်ရ အေန်တာနိတ်ပိုတ်တုဲ ညးချိုတ် စဵုကဵု (၉၅) က္ဍိုပ်ကၠံနွံရ။ ပ္ဍဲကဵုလိက်ဒုၚ်စဳရေၚ်ဂှ်လေဝ် အကာဲအရာပဵုနူပိုဲတီနွံမံၚ်ဏောၚ်” သာ်ဝွံ ညးဟီုရ။
ပ္ဍဲတိဍာ်ဗော်ဍုၚ်မန်တၟိထိၚ်ဒဝ် မနွံခက်ခုဲကဵု လာၚ်ဖုၚ် ကေုာံ အေန်တာနိတ်ပါလုပ်ကီု သီုပ္ဍဲဒေသမန်ဝွံ အပ္ဍဲပွိုၚ် (၃) ဂိတု တုဲကၠုၚ်ဏံ ပရေၚ်ဗ္တိုက်ကဵုက္ၜၚ်ကျာ ကတဵုဒှ်အာ စဵုကဵု (၂၂) ဝါရ။
အခိၚ်တ္ၚဲဝွံ ဂေတ်ပဝ်အထံက်ကၚ်တုဲ နဲဗျူဟာလုပ်စိုပ်ဗ္တိုက် အခိၚ်သဂါဗ္တံ တိက်လှိၚ်မံၚ်ဂှ်လေဝ် ကၠောန်သ္ပဂၠိုၚ်ကၠုၚ်တုဲ ဖဵုတိုန်စိုပ်ဆေၚ်ကဵုပရေၚ်မၞိဟ် နွံဗွဲမဂၠိုၚ်ရဂှ်လေဝ် ကိုဝ်တေတ်ညာဏ် ဆက်ဟီုရ။
“ပရေၚ်ဇီုကပိုက် ဆေၚ်စပ်ကဵုစိုတ်၊ ရုပ်တံ ပဵုဂၠိုၚ်ကၠုၚ်ရ။ ဟွံဂံၚ်တိက်ၜိုဟ်ၜိုဟ်ပုဟ်။ ကၠောန်ကမၠောန် ဗွဲမဂီုကၠီုဗၠးၜး ဟွံမာန်ပုဟ်။ အခိၚ်လဵု မုဒှ်ရောဟီုဂှ် ဟီုဟွံမာန်ပုဟ်” သာ်ဝွံ ဟီုကဵုဌာန်ပရိုၚ်ဗၠးၜးမန် IMNA ရ။
ဒေသဒးဒုၚ်ဗ္တိုက်ကဵုက္ၜၚ်ကျာဂှ်ဝွံ ဒှ်ဒေသ ပရေၚ်ဆက်စၠောံပိုတ်သ္ကုတ်ဂှ်ရ သွက်သ္ဂောံဂွံရီုဗၚ် ဓဝ်ဗ္စာရဏာဆာန်ဍူမၞိဟ်ဂှ် ခက်ခုဲမံၚ်ရောၚ် ဂးရ။
ဟိုတ်နူဗ္တိုက်ကဵုက္ၜၚ်ကျာ အပ္ဍဲပွိုၚ် (၃) ဂိတုဂှ်တုဲ စမြိုၚ်ဘာသာ (၂၂) မ၊ ရုၚ်ဂဥုဲ၊ ခဒံဂဥုဲ (၂) မ၊ ဘာဗ္တောန်လိက် (၁၇) ဘာ၊ ဗဒိုပ်ညးပဲါဒဴဘဲပၞာန်၊ ဒဒန်မွဲတၞုၚ်လီုလာ်လဝ်နွံရောၚ် ဓမံက်ထ္ၜးလဝ် ပ္ဍဲလိက်လလောၚ်ရ။
ရုၚ်ဂဥုဲ၊ ခဒံဂဥုဲ ကေုာံ ဗီုကဵုစမြိုၚ်ဘာဗ္တောန်လိက်တံ ဒးဒုၚ်ပလီုပလာ်ဏာဂှ်ရ ပွမမၚ်မွဲရံၚ်စံၚ် ပရေၚ်ထတ်ယုက်ကဵု အခေါၚ်ဗ္တောန်ပညာတံ သကဵုဒှ်အာ ပရေၚ်ဒၞာတာရောၚ် နူ MIP ထံက်ထ္ၜးလဝ်ရ။
ပရူဒဒှ်ဗ္တိုက်ကဵုက္ၜၚ်ကျာသီုဖအိုတ် ၜိုတ် (၆၂) က္ဍိုပ်ကၠံဂှ်ဝွံ ကတဵုဒှ်လဝ် ပ္ဍဲဒေသရခေၚ်၊ သေတ်ဂိုၚ်ကဵု ချေၚ် ဒၞာဲပဋိပက္ခပၞာန်သ္ကာတ်မြဟ်ကဵု ဂကောံကမ္မယှေန်ပၞာန်တံရ။