ပ္ဍဲကဵုအခိင်ကသီုဗြဲဂူဇၞော် အကြာဂိတုဂျူလာၚ် သၞာံ (၂၀၂၆) ဏအ်ဝွံ လၟိဟ်မၞိဟ်ကၠတ်လုပ်ဍုၚ်သေံ နူဂၠံင်ပယျဵုကျာ်ပိဂှ် အောန်စှ်ေဒၟံၚ်နွံရောၚ် ညးပၠုပ်မၞိဟ်မွဲတၠ ဟီုရ။
လၟိဟ်သၟာကမၠောန်ကောန်ဍုင်မန်ဗၟာ လုပ်စိုပ်ဍုၚ်သေံ နကဵုနဲကဲဟွံလုပ်သၞောဝ် (လုပ်ဂၠံင်ကမၠတ်) နူဒေသပယျဵုကျာ်ပိ ပ္ဍဲအခိင်ကသီုဏအ်ဂှ် တၟော်ရံၚ်ကဵု နူအခိၚ်က္ညၚ်တေံမ္ဂး လၟိဟ်အောန်စှ်ေအာ ကဝက်ပြင်ရောၚ် ညးပၠုပ်မၞိဟ်ဂှ် ဆက်ဟီုရ။
“ပြဟ်ဟ်ဏံ ပ္ဍဲဍုၚ်သေံဂှ် ပရိုၚ်မဳဒဳယာဂမၠိုၚ် ပ္တိုန်ထ္ၜးဒၟံၚ်ဂှ် ဟိုတ်နူရပ်ဒၟံၚ်သၟာကမၠောန်ကောန်ဍုၚ်ဗၟာ စၟတ်ကာဒ်သက်သဳဟၟဲတုဲ ပလံၚ်ဖျဴဒၟံၚ် ဒေသပယျဵုဒိုဟ်ဇဳနွံဒၟံၚ်အဆက်က်ဂှ်ရ ညးလုပ်ဍုၚ်သေံတံ တိုန်စိုပ်အောန်ဒၟံၚ်နွံဏောၚ်” သာ်ဝွံ ဟီုရ။
ဂိတုတုဲတုဲကၠုၚ်တေံမ္ဂး ရဲနွံကဵုတၞးလိက် (ပါတ်သပတ်) ကီု ရဲဟွံမွဲကဵုတၞးလိက်သက်သဳမွဲသာ်တအ်ကီု နူပၞော်ဂၠံင်ပယျဵုကျာ်ပိမွဲအဆံင် လုပ်စိုပ်မံင်ဍုင်သေံ ပွိုင်မွဲတ္ရဲ လၟိဟ်မၞိဟ်အကြာ ၜါကၠံ ပိကၠံတၠနွံကၠာလေဝ် ပ္ဍဲဂိတုဂျူလာင်ပွိုင်မွဲဂိတုဏအ်ဂှ် လၟိဟ်မၞိဟ်ဟွံပေင်ကၠံတၠရောင် သ္ဂးပၠန်ရ။
ပၞော်ဂၠံင်ပယျဵုကျာ်ပိဂှ် ၜိုန်ရဟွံဒှ်ဍာန်လုပ်သၞောဝ် လုပ်တိတ်အကြာၜါဍုင် (ဗၟာ-သေံ) ကၠာလေဝ် ညးပၠုပ်မၞိဟ်တံ ကေတ်ဓဝ်ကၠိုဟ်ခၠၚ်ကဵု သၞေဟ်ကၚ်ဒပ်ဗၠာဲသၟိၚ်သေံဂမၠိုင်တုဲ ပလံၚ်ဗစိုပ်ဒၟံၚ် သၟာကမၠောန်တအ်နွံရ။
“အခိၚ်က္ညၚ်ဂှ်တှ်ေ ဟိုတ်နူဂၠံၚ်ဍာန်ခိုဟ်တုဲ ရဲပါတ်သပတ်နွံကီု၊ ဟွံမွဲကီု လုပ်တိတ်ဂၠိုၚ်ဒၟံၚ်ရ။ လၟုဟ်ဏံ အခိၚ်ကသီုဗြဲဂူတုဲ ဂၠံၚ်ဍာန်ပရေံကီု၊ ပ္ဍဲဍုၚ်သေံတေံ ရပ်ဒၟံၚ်မၞိဟ်သ္ကာတ်မြဟ်ဒၟံၚ်ကီုတုဲ ပါဲနူရဲပါတ်သပတ်နွံတုဲ ရဲသက်သဳမုဟၟဲတအ်ဂှ်တှ်ေ ပ္ဍဲဂိတုဂျူလာၚ် ပွိုၚ်မွဲဂိတုဏံ လုပ်စိုပ်အောန်ဒၟံၚ်ရောၚ်” သာ်ဝွံ ညးပၠုပ်မၞိဟ်ဍုင်သေံ နူဒေသပယျဵုကျာ်ပိမွဲတၠဂှ် ထပ်ဟီုပၠန်ရ။
တၟော်ကဵုပရေင်ဒးအာကၠုင်ကွာ်တရဴ အကြာဂၠံင်ပယျဵုဟွံလုပ်သၞောဝ်ကျာ်ပိကဵု ပယျဵုလုပ်သၞောဝ် ဂၠံင်ဗြဝတဳတအ်မ္ဂး ရဲလုပ်ဍုင်သေံ နဲကဲလုပ်သၞောဝ်ကီု ဟွံလုပ်သၞောဝ်ကီုတအ် စကာဂၠံင်ပယျဵုကျာ်ပိဂၠိုင်မံင်ရောင် ဂွံတီကေတ်ရ။
ဗီုရုပ် – ကၠတ်လုပ်ဍုင်သေံ နူဂၠံင်ပယျဵုကျာ်ပိတုဲ ဗၠာဲသၟိင်သေံတအ် ရပ်ထိင်ဂွံဏာအကြာဂၠံင် (ပရိုင်ကမ္မရဳ)