ပြဒ္ဒညာၜက်ၜေတ်လုပ်တိဍာ် ပ္ဍဲပွဳဗွိုၚ်ခန်လွာဒဒန်ဆု(မန်) “ဒဒန်နော်ကျာ်ဥတ္တမ” ၊ ပ္ဍဲပွိုၚ်ဍုၚ်သၚ်ခဠၝုရဳ၊ ခရိုၚ်ကာန်ချနၝုရဳ၊ ကၟိန်ဍုၚ်သေံဂှ် နူကဵုညးတာလျိုၚ်သေံတံ သွက်ဂွံပသောၚ်အာနွံတုဲ ဂကောံ ကေုာံ သ္ကိုပ်စၟဳစၟတ် ဌာနက္ဍိုက်က္ဍိုပ်စရၚ်တိ ကၠုၚ်စိုပ်စၟဳစၟတ်လဝ် ပ္ဍဲဗလးတိနွံရောၚ် ဂွံတီကေတ်ရ။
သွဟ်မကလိဂွံလဝ်ဂမၠိုၚ်ဂှ်ဝွံ ပြဒ္ဒညာၜက်ၜေတ်လုပ်တိဍာ် ကေုာံ ဗလးဍာ်ပရေၚ်ပိုၚ်ပြဳနှဴရဴ ပ္ဍဲပွဳဗွိုၚ်ဒဒန်ဆု(မန်)ဂှ် ဂွံဆဵုကေတ်တုဲ သ္ၚိဒၟံၚ်၊ ခဒံဇၞူ ကေုာံ ဆေၚ်စသုၚ် (၉၀၀) ပြၚ် ဂွံဆဵုကေတ်လဝ်နွံရောၚ် ဂးရ။
ပြဒ္ဒညာအကြာပွဳဗွိုၚ်ဒဒန်ဆု(မန်)ဂှ်ဝွံ ဆေၚ်စပ်မံၚ်ကဵု ဌာနပံၚ်ကောံဇဳတုဲ သၞောဝ်ဥပဒေထပ်မံၚ်ဂှ်ရ ဒှ်အရာကိစ္စပသောၚ်ဝါတ်မွဲရ။
တၚ်နၚ်ဗလးတိ မကလိဂွံလဝ် နူပရေၚ်စၟဳစၟတ်ဂမၠိုၚ်ဂှ်ဝွံ ပ္ဍဲပေဲါကောံဓရီုပံၚ်ကောံ မကၠောန်ဗဒှ်လဝ် ပ္ဍဲဂိတုဂျူလာၚ် (၂၁) ဂှ် ပ္တိုန်ထ္ၜးသဳကၠဳလဝ် နဒဒှ်ကိစ္စကာတၟေၚ်ရဂှ်လေဝ် ဂွံတီကေတ်ရ။
ဟိုတ်ဂှ်ရ လ္ပာ်ညးတာလျိုၚ်တံ သွက်ဂွံဖန်ဇန်ကောပ်ကာဲ တိဍာ်ပိုၚ်ပြဳနှဴရဴဂမၠိုၚ်ကဵု ၜက်ၜေတ်လုပ်တိဍာ် ကၟိန်ဍုၚ်ပိုၚ်ပြဳကီု၊ သွက်ဂွံကောပ်ကာဲ ကမၠောန်အာတရဴ ပ္ဍဲအကြာပွဳဗွိုၚ်ဒဒန်ဆု(မန်)ကီု၊ ကိစ္စဍာ်ကၠိပပ်အပ္ဍဲဒေသကီု ကေုာံ ကိစ္စတၞဟ်ဂမၠိုၚ်ကီုဂှ် နူကဵုညးတာလျိုၚ်တံ ရပ်စပ်အာရောၚ် ဂးရ။
သၟာၚ်နူကိစ္စထိၚ်ဒဝ်ဍာ်ဒကေဝ်ဍာ်တုဲ ကိစ္စဒက်ပ္တန်ဌာနဗဟဵု (One Stop Service) ရေၚ်တၠုၚ်ကဵုမွဲဒၞာဲဓဝ် သွက်ညးဍုၚ်ကွာန် ကေုာံ ညးအာတရဴဂမၠိုၚ်တံဂှ်လေဝ် သ္ဂောံဓမံက်ရုပ်ရဴနွံရ။
ပရေၚ်ပံၚ်ကောံရေၚ်တၠုၚ် ဌာနပံၚ်ကောံဇဳ နူခရိုၚ်ကာန်ချဏၝုရဳလၟုဟ်ဏံဝွံ နကဵုတၚ်ရန်တၟံ သွက်သ္ဂောံထိၚ်ဒဝ် ဒဒန်ဆု(မန်) “ဒဒန်နော်ကျာ်ဥတ္တမ” မဒှ်ဒၞာဲဒယှ်တှ် ကိစ္စဇၞော်အာတရဴဂှ်ကီု၊ ပရေၚ်ဘဝညးဍုၚ်ကွာန်ဒေသတံ သ္ဂောံဖောအ်ဗြေဝ်တောတက်ကီု လလောၚ်ပ္တိတ်လဝ်ရ။