ကွာန်မၞုံပ္ဍဲဇိုင်ၜဳဂြာင် အဆက်စပ်တွဵုရးဍုင်မန်ကဵု ကရေင် မပ္တံကွာန်ကြေဝ်ဏာ၊ သင်ကၠံ၊ ဓမ္မသ၊ ကအ်ဗိန် မွဲဒမြိပ်သ္ကုတ်ဂၠံင်ကွာန်ဆက်စၠောံတံဂှ် ဂကောံဒပ်ကမ္မယှေန်ပၞာန်တံ စၟဳစၟတ်တေင်ဂြတ်ဂှ်ရ ညးဒေသတံ အာကၠုင်အောန်မံင်ရောင် ဂွံတီကေတ်ရ။
စပ္တံနူသတ္တဟဒုတိယဂိတုဂျူလာင်ဏံတုဲ ညးဒေသမံင်တန်တဴဒၟံင် အပ္ဍဲကဵုကွာန်ဂမၠိုင်ဂှ်ဝွံ နူ (၆) နာဍဳသဝ်တ္ၚဲ စဵုကဵုနူဂယးပြဟ် (၄) နာဍဳ လ္ပတိတ်မ္ၚးအာကၠုင်ညိဂှ် နူဒပ်ကမ္မယှေန်ပၞာန် ချဳဓရာင်အာကၠုင်မံင် အပ္ဍဲဒေသတံ ဟီုဂးလဝ်ရ။
ဟီုဂးဏာသာ်ဂှ်တုဲမ္ဂး ပ္ဍဲသၞေဟ်ကင်စၟဳစၟတ်ကမ္မယှေန်ပၞာန် မၞုံအပ္ဍဲကွာန်/မ္ၚးကွာန်တံဂှ် စၟဳစၟတ်ဒၟံင်ကာဒ်ကောန်ဍုင် တေင်တေင်ဂြတ်ဂြတ်ကီု၊ စွံပွန်ကဵုညးတြုံတံတုဲ စၟဳစၟတ်မံင်ရောင်ဂှ်လေဝ် ညးဒေသကျာ်မြဟ်မွဲတၠ ဟီုရ။
“ကၠာတေံတှ်ေ မံင်ဒၟံင်ပ္ဍဲသၞေဟ်ကင် ဂကောံဒပ်ပၠန်ဂတးတံတုဲ စၟဳစၟတ်မံင်ရ။ ညးတြုံတံတှ်ေ စၟဳစၟတ်ကွေံကွေံဟဂှ်ရ။ ကဵုပံက်ဗုင်ကွဳလိုန်ဓာတ်ရ။ စၟဳစၟတ်ဏောင်၊ ယျေတ်ဏောင်၊ ဍေံတံ ဟွံစၟဳစၟတ်ဗီုဏံ တၟာလအ်ရ။ လၟုဟ်ဏံ သာတုဲတေင်ဂြတ်ကၠုင်ရ” သာ်ဝွံ ဟီုရ။
ဟိုတ်နူအကာဲအရာဂှ်ရ ညးဒေသတံ ဒးလုပ်စိုပ်ကၠုင်အပ္ဍဲကွာန် ညံင်ဂွံဂတာပ်အခိင်တုဲ ပ္ဍဲကဵုအခိင်တ္ၚဲလေဝ် တိတ်အာကၠုင်မ္ၚးအောန်မံင်ရောင် ဂွံတီကေတ်ရ။
ကမ္မယှေန်ပၞာန်တံဝွံ ဒၞာဲဖျေံလဝ်ဒပ်ဂမၠိုင်ဂှ် သၠုင်ပ္တိုန်လဝ်ဇြဟတ်ဂီုကၠီုတုဲ အခိင်အကြာ (၈) နာဍဳဗ္တံဂှ်လေဝ် ဂေတ်မံင်ကင်အပ္ဍဲကွာန် အဆက်ဆက်နွံရောင် ညးဒေသတံဟီုရ။
ဟိုတ်နူသၞေဟ်ကင်စၟဳစၟတ်ဂှ်တုဲ ညးဒေသနူကွာန်ကအ်ဗိန် မၞုံမွဲဒမြိပ်ဂၠံင်ဇၞော်ကွာန်ဒဵုခရီုတံ အာတရဴခက်ခုဲရ။
“သၞေဟ်ကင်ဂၠိုင်တှ်ေ ညးဒေသတံ အာကၠုင်တှ်ေ ခက်ခုဲကွေံရ။ လ္ၚဵုတံဂှ် ဟိုတ်နူအကာဲအရာ ပရေင်ထတ်ယုက်တုဲ အာနကဵုကာတၟေင်ဂှ်လေဝ် ယျေတ်ရ။ ဂၠာဲပြဿနာရ။ သီဖုင်တံ၊ ကေတ်လှုဲတံလေဝ် ဗွဲမဂၠိုင်ရ။ အခိင်လေဝ်အိုတ်ရ” သာ်ဝွံ ညးဒေသၜဳဂြာင်မွဲတၠ ဟီုရ။
ဂိတုဂျောန် (၂၁) တုဲကၠုင်တေံ ဂကောံကမ္မယှေန်ပၞာန် ဖျေံလဝ်ဒပ် ပ္ဍဲကျာ်ပါင်ၜဳ၊ ကွာန်ကအ်ဗိန်ဂှ် ဒးဒုင်ဗ္တိုက်ကဵု ဂကောံရပ်လွဟ်ဟွံတီယၟုတံတုဲ ပရေင်စၟဳစၟတ်တေင်ဂြတ်ကၠုင်ရောင် ညးဒေသတံ ဟီုဂးသ္ၚဳဂၠိပ်မံင်အိုတ်ရ။
နူစပ္တိတ်အမိင်တိတ်ဗ္တံဟွံဂွံတုဲဂှ် ပရေင်စၟဳစၟတ်တေင်ဂြတ်တုဲ ဂေတ်မံင်ကင်နွံကီုလေဝ် ပရေင်ညးဒေသတံ ဒးဒုင်ရပ်ဟွံမွဲဏီရောင် ဂွံတီကေတ်ရ။
ပ္ဍဲအကြာပယျဵုဆက်စပ် တွဵုရးဍုင်မန်ကဵု ကရေင်ဂှ် သၞေဟ်ကင်ဟွံလုပ်သၞောဝ် နွံလၟိဟ်ကဵုကၠံတုဲ နူကဵုသၞေဟ်ကင်စၟဳစၟတ်ဂမၠိုင်ဂှ် အာတ်ကေတ်မံင်သြန် ဟွံမွဲကဵုသၞောတ်ဗ္ၜတ်နွံရောင် ကာလညးစၞးကျာ်မြဟ် သၟာန်လဝ်တင်သၟာန် ပ္ဍဲကၠတ်ထဝ်တွဵုရးဍုင်မန်ဂှ်ဝွံ အတိုင်တင်နင်ဟီုဂးလဝ်ဂှ် ဂွံတီကေတ်ရ။