ညးဗြဴၜါတၠ နူကဵုကွာန် (ညောၚ်ကုန်း)၊ ပွိုၚ်ဍုၚ်ဘာအၚ်၊ တွဵုရးကရေၚ်ဂှ် လိုန်ဒးမာၚ်တိုပ်တိခတိုဟ်အာတုဲ ဒးအာဘဲဝပ် ဗွဲမသကာတ်မြဟ်ရောၚ် ဂွံတီကေတ် နူညးဒေသတံရ။
ဂိတုဂျူလာၚ် စၟတ်တ္ၚဲ (၁၈) တုဲကၠုၚ်ဏံ အခိၚ်နူဂယး ၜိုတ် (၁၀) နာဍဳဂှ် ဒဝ်နဝ်လှကူ အာယုက် (၄၅) သၞာံကဵု ဒဝ်နအ်တဒူ အဃောအာဂၠာဲၜၚ်ပ္ဍဲဂြိုပ်ကြပ်ကွာန်ဂှ် လိုန်ဒးမာၚ်တိုပ်တိရ။
ဟိုတ်နူလိုန်ဒးမာၚ်တိုပ်တိခတိုဟ်အာဂှ်ရ ညးဗြဴၜါတၠဂှ် ဒးအာဘဲဝပ် ပ္ဍဲတဲ၊ ပ္ဍဲဇိုၚ် ဗွဲမသကာတ်မြဟ်ရောၚ် ညးဒေသမွဲတၠ ဟီုရ။
“သီုညးၜါတၠ ဒးဘဲဝပ်သကာတ်မြဟ်ရ။ ညးၜါတၠဂှ် ပလံၚ်ဗစိုပ်ဏာ ရုၚ်ဂဥုဲညးဍုၚ်ကွာန်ဘာအၚ်ရ” သာ်ဝွံ ညးဒေသဂှ် ဟီုရ။
ကွာန် (ညောၚ်ကုန်း) ဂှ်ဝွံ မၞုံဒၟံၚ်ပ္ဍဲသ္ကဲဂၠံၚ်ကွဳက် (ဝါးဘိုးတော – ကမမောၚ်း) တုဲ လၟိဟ်သ္ၚိ ၜိုတ် (၉၀၀) နွံရောၚ် ဂွံတီကေတ် နူညးဒေသတံရ။
ပ္ဍဲကဵုဗဒဲါပွဳဗွိုၚ် ကွာန် (ညောၚ်ကုန်း) ဂှ် ဒပ်ကမ္မယှေန်ပၞာန်တံ အာကၠုၚ်ချဳဓရာၚ်မံၚ်တုဲ ဒပ်မၚ်ပယျဵု BGF၊ ဒပ်ဗၠးၜးကရေၚ် KNLA ကဵု ဒပ်ပံၚ်ကောံပၠန်ဂတးတံ ချဳဓရာၚ်အာကၠုၚ်မံၚ်ရောၚ် ဂွံတီကေတ်ရ။
မာၚ်တိုပ်တိ ညးဗြဴၜါတၠလိုန်ဒးဂှ်ဝွံ နူဂကောံလဵုတိုပ်လဝ်ဂှ် သ္ပဒတန်ဟွံမာန်ဏီရ။
ဗွဲကြဴနူဒပ်ပၞာန်သီအဝဵုတုဲဂှ်မ္ဂး အပ္ဍဲတွဵုရးကရေၚ်ဝွံ ပရူဒဒှ်လိုန်ဒးမာၚ်တိုပ်တိ ကတဵုဒှ်မံၚ် မွဲနှေံမွဲနှေံတုဲ ပရေၚ်ဒးဘဲဝပ်ချိုတ်ဂျိုၚ်ဂှ်လေဝ် နွံမံၚ်ကီု ဂွံတီကေတ်ရ။