ပ္ဍဲဍုၚ်မန် ဒေသလ္ၚဵုတံဂှ် ရဲကမၠတ်ဒမြိပ်ပၠံၚ်ကွဳလိုန်ဓာတ်တအ် သ္ပပၞထောံတြးလဝ်ဩန် ပ္ဍဲဂၠံၚ်မၞိဟ်အာကၠုၚ်ဂှ်တုဲ ညးအာပ္ဍဲဂၠံၚ်တအ် အဃောကပှ်ဩန် ဒးဒုၚ်ၜုၚ်တက်ဂှ် ဒးဒုၚ်ပၠံၚ်ဒမြိပ်ဏာကွဳလိုန်ဓာတ် နွံကၠုၚ်မံၚ်အဆက်ဆက်ရောၚ် ညးဒေသပွိုၚ်ဍုၚ်မုဟ်ဍုၚ်မွဲတၠ ဟီုလဴထ္ၜးရ။
သၟာကမၠတ်ပၠံၚ်ၜးကွဳလိုန်ဓာတ်တအ်ဂှ် ကေတ်အခေါၚ်ခိုဟ်ကဵု ဍုၚ်ကွာန်ဟွံၜိုဟ်ဩိုဟ်ဂှ်တုဲ ဒၞာဲဂၠံၚ်ဍာန်မၞိဟ်ပိုတ်တအ်ဂှ် သ္ပပၞထောံတြးလဝ်တၞးဩန်တုဲ ညးအာပ္ဍဲဂၠံၚ်တအ် အဃောကပှ်ဒၟံၚ်တၞးဩန်ဂှ် ၜုၚ်တက်တုဲ ဒမြိပ်ပၠံၚ်ကေတ်ဏာ ကွဳလိုန်ဓာတ်ဂှ် ဒှ်ကၠုၚ်ဒၟံၚ်အဆက်ဆက်ရောၚ် သ္ဂးရ။
“မုဟ်ဍုၚ်သၠုၚ်ကျာပိုဲ ခတှေ်ကၠအ်သတ်၊ ဘာဒေါဝ်၊ ကၟာဝက်ဂှ် က္တဵုဒှ် ဒးကၠုၚ်အဆက်ဆက် (၃) တၠ တုဲရ၊ ဍေံသ္ပပၞ ထောံတြးလဝ်ဩန်တုဲ ရဲအာပ္ဍဲဂၠံၚ်ဂှ် ဆဵုတၞးဩန်ပ္ဍဲဂၠံၚ်တှေ် ဗဒေါံကွဳတုဲကပှ်လေဝ်၊ အဃောကပှ်မံၚ်ဩန် အဃောဝိုတ်မံၚ်သတိဂှ် ဍေံလုပ်ၜုၚ်တက် တုဲတှေ် အဃောဇကု ဒးဘဲၜုၚ်တက်ဂှ် ဍေံပၠံၚ်ဒမြိပ်ဏာကွဳဇကု၊ ဗီုဏံ ဒှ်ကၠုၚ်ဆက်ဆက်နွံ မံၚ်” သာ်ဝွံ နာဲဗလေဝ် (ဗလေတ်လဝ်ယၟု) နူပွိုၚ်ဍုၚ်မုဟ်ဍုၚ်သကုတ်သၠုၚ်ကျာဂှ် ဟီုထ္ၜးရ။
အခိၚ်ပရေၚ်ဍုၚ်ကွာန် ရုသံၚ်ဒၟံၚ်လၟုဟ်ဏံဂှ် ကမၠတ်ဒမၠမတာတအ် ကေတ်အခေါၚ်လတူပရေၚ်ဍုၚ်ကွာန် ဟွံညိၚ်ဝတ်ဂှ်တုဲ ပၠံၚ်ၜးကပေါတ်အကြာဂၠံၚ်ဍာန်ကီု၊ ဒမြိပ်ပၠံၚ်ၜးကွဳလိုန်ဓာတ်ကီု၊ ကၠတ်ဂၠံက်ဒြပ်ပိုန်ဟာန် ညးဍုၚ်ကွာန်နာနာသာ်ကီု က္တဵုဒှ်ဂၠိုၚ်တုဲ လတူက္တဵုဒဒှ်ဒၟံၚ်ဏံဂှ် ဂကောံဂွံစၟဳစၟတ်ဂၠိုက်ဂၠာဲရပ်စပ်လေဝ် ဟွံမွဲရ။
“လၟုဟ်ဏံဂှ် ဒှ်အာမွဲမွဲ တုဲအာတုဲတှေ် တုဲအာအတိုၚ်ဂှ်သၟးရ၊ ညးဒးတှေ် ညးဒုၚ်ရ၊ ဂွံအာတေၚ် ဂွံအာလ္ၚတ်ဂၠိုက်ဂၠာဲ ဂွံအာရပ်စပ်ဂှ် ဟွံမွဲပုဟ်၊ ကွဳလိုန်ဓာတ်ကၠေံကၠုၚ်ဒၟံၚ်ဂၠိုၚ်ကဵုဖ္ဍိုက်ရ၊ ဂကောံလဵုလေဝ် ရပ်ဟွံဂွံဏီပုဟ်၊ ကၠေံအာတုဲတှေ် တုဲရ၊ ဒးဒုၚ်ပၠံၚ်ဏာတုဲတှေ် တုဲအာရ” သာ်ဝွံ ကလောမသ မၞိဟ်ဒးဒုၚ်ဒမြိပ်ပၠံၚ်လဝ် ကွဳလိုန်ဓာတ် အကြာဇြပ်ဗုကဵု မုဟ်ဍုၚ်မွဲတၠဂှ် ဟီုထ္ၜးရ။
ပ္ဍဲဍုၚ်မန်ဝွံ ဗွဲမဂၠိုၚ်ဂှ် ရပ်စပ်သုၚ်စောဲ ကွဳလိုန်ဓာတ်သေံသၟးဂၠိုၚ်တုဲ ကွဳလိုန်ဓာတ်သေံမွဲမွဲဖ္ဍိုက်ဂှ် ယဝ်ဒှ်ကွဳလိုန်ဓာတ်တၟိတၟိမ္ဂး (၁၀၀) ကိုဋ်ပြၚ်၊ ဒဵုကဵု (၂၀၀) ကိုဋ်ပြၚ်နွံဒၟံၚ်တုဲ သွက်ရဲကမၠတ်ပၠံၚ်ၜး ကွဳလိုန်ဓာတ်တအ်ကဵု အကာဲအရာ ပရေၚ်ဍုၚ်ကွာန်တ္ၚဲဏံမ္ဂး ဒှ်ကမၠောန်တော်ကိတ်၊ ကမၠောန်ခိုဟ်မွဲရ။
ညးဍုၚ်ကွာန်မန်၊ သၟတ်မန်တအ်လေဝ် ဇၟာပ်မၞိဟ်ဂှ် သ္ဒးသ္ပဒၟံၚ်အဖဝ်ကဵု ကွဳလိုန်ဓာတ်ဇၟာပ်မၞိဟ်တုဲ အကြာသ္ၚိကီု၊ အကြာဂၠံၚ်ကီု ပွိုၚ်ဍုၚ်ဗွဲမဂၠိုၚ်ဂှ် ကွဳလိုန်ဓာတ်ကၠေံဒၟံၚ် နွံအရိုဟ်ဒဒှ်တ္ၚဲရောၚ်ဂှ်လေဝ် ဂွံတီကေတ်ရ။