ဂိတုဂျူလာၚ် စၟတ်တ္ၚဲ (၁၅) နူတနေံဏအ်ဝွံ ပ္ဍဲကၟိန်ဍုၚ်သေံ အကြာဝၚ်ကကဵု ကမ္မရဳဂှ် ဗၠာဲသၟိၚ်သေံတအ် ထပ်ရပ်ဂွံကောန်ဍုၚ်ဗၟာ ကၠတ်လုပ်ဍုၚ်သေံ (၁၀) တၠပၠန်ရောၚ် ဂွံတီကေတ်ရ။
နူတနေံဏအ် ၜိုတ်အခိၚ်လဒေါဝ်တ္ၚဲဂှ်မ္ဂး နကဵုကွဳစက် (၁) ဖ္ဍိုက် အဃောမၚ်မံၚ် ကြပ်ကဵုဂၠံၚ်တိုန် ဍုၚ်ကမ္မရဳမွဲဒၞါဲဂှ် ဗၠာဲသၟိၚ်သေံတအ် ရပ်ဗဒေါံစၟဳစၟတ်တုဲ ဂွံဆဵုကေတ် ကောန်ဍုၚ်ဗၟာ ကၠတ်လုပ်ဍုၚ်သေံ မၞိဟ်တြုံ (၄) တၠကဵု မၞိဟ်ဗြဴ (၆) တၠနွံရ။
ပယျဵုသေံ-ဗၟာ ဒေသကျာ်ပိဏအ်ဝွံ မွဲဒမြိပ်ဂၠံၚ်လုပ်ဍုၚ်သေံ လ္ပါ်ဝၚ်က၊ ထံၚ်ခၞောန်၊ ကမ္မရဳဂှ်မ္ဂး ဒှ်ပၠော်ဂၠံၚ်အဓိကမွဲတုဲ ကောန်ဍုၚ်ဗၟာတအ် သွက်သ္ဂောံလုပ်စိုပ် အာကၠောန်စကမၠောန်ပ္ဍဲဍုၚ်သေံဂှ် နူကဵုဒေသပယျဵုသေံ-ဗၟာ ကျာ်ပိဂှ်မွဲတဆံၚ် အဃောကၠတ်လုပ်အာဂှ် ဗၠာဲသၟိၚ်သေံတအ် ရပ်စပ်ဂွံဏာ ညးတအ်ရ။
ကောန်ဍုၚ်ဗၟာတအ်ဂှ် ဒးကဵုကၠုၚ်စရိတ်ဂၠံၚ် ကုဃံၚ်ထပၠုပ်မၞိဟ်တအ် ညးမွဲတၠမ္ဂး ဩန်သေံ အကြာ (၁၄,၀၀၀) ၝာတ်ကဵု (၁၈,၀၀၀) ၝာတ်နွံကၠုၚ်တုဲ ညးလ္ၚဵုတအ် ဟွံစိုပ်ဒၞာဲကမၠောန်ဇကုကၠောန်ဂှ်မွဲသာ် အကြာဂၠံၚ်ဍာန်ဂှ်ဟေၚ် ဒးဒုၚ်ရပ်စပ် ကုဗၠာဲသၟိၚ်သေံတအ်တုဲ လှုဲသြန်တအ်ဂှ်လေဝ် ဟွံကလေၚ်ဂွံမွဲသာ် ဒးဆောံလေၚ်ကၠုၚ်ညးသ္ကအ်အိုတ် ဂးရ။
ပြဟ်ဟ်ဏအ်ဝွံ သၟာကမၠောန်ကောန်ဍုၚ်ဗၟာ ကၠတ်လုပ်ဍုၚ်သေံ (၁၀) တၠကဵု သီုညးတၠဒဳကွဳစက် ကောန်ဍုၚ်သေံဂှ် ဗၠာဲသၟိၚ်သေံတအ် ရပ်စပ်ကေတ်လဝ်အရေဝ်နွံရ။
အပ္ဍဲပယျဵုသေံ-ဗၟာ လ္ပါ်ဒေသပယျဵုကျာ်ပိဂှ်ဝွံ ပ္ဍဲဂိတုဂျူလာၚ်ဏအ်သၟးဂှ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ရပ်စပ်ဂွံမံၚ် ကောန်ဍုၚ်မန်ဗၟာ ကၠတ်လုပ်ဍုၚ်သေံတအ် အဆက်က်တုဲ သရောပ်မ္ဂး လၟိဟ် (၅၀) တၠပြၚ်နွံဂှ် ဂွံတီကေတ်ရ။