စရၚ်စၟတ်သမ္တီကဵုသြန်ဂိတု (Pay Slip) ကေုာံ သြန်ဂိတု အ္စာ၊ အ္စာၝောံလ္ၚဵု မၞုံသၟဝ်ကမ္မတဳပရေၚ်ပညာကောန်ဂကူမန် MNEC ဂှ်ဝွံ လၟိဟ်ပမာဏဟွံတုပ်သၟဟ်ဂှ်ရ မိက်ဂွံကဵုပရေၚ်ကၠးဖ္ဍးနွံရောၚ် အ္စာ၊ အ္စာၝောံတံ ဟီုကဵုဌာန်ပရိုၚ်ဗၠးၜးမန် IMNA ရ။
အတိုၚ်အ္စာ၊ အ္စာၝောံတံ ဟီုလဝ်ဂှ်မ္ဂး သၟာၚ်နူသြန်ထံက်ပၚ် ညးတၠဒါန်ကၟိန်ဍုၚ်နာနာတုဲ နကဵုသြန်ဒါန်ညးဍုၚ်ကွာန်မန်တံ သြန်ထံက်ပၚ်အပဵု (၄၅၀၀၀) ဒကေဝ် မွဲကရောံကဵုသြန်ဂိတုဂှ် ကဵုမံၚ်လၟေၚ်ဂိတုနွံရ။
သၞာံဗ္တောန်ပညာ (၂၀၂၆-၂၀၂၇) ဏံဝွံ သြန်ထံက်ပၚ်ညးတၠဒါန်ကၟိန်ဍုၚ်နာနာ အောန်စှေ်ကၠုၚ်တုဲ ဒေံါဇူလဝ် သြန်ထံက်ပၚ်အပဵု (၄၅၀၀၀) ဒကေဝ်ဂှ်ရ အခေါၚ်ဒုၚ်စသိုၚ်သြန်ဂိတု အ္စာ၊ အ္စာၝောံတံလေဝ် အောန်စှေ်အာရ။
ၜိုန်ဂှ်ကီုလေဝ် ပ္ဍဲစရၚ်စၟတ်သမ္တီကဵုသြန်ဂိတု (Pay Slip) ဂှ် ဆက်ဓမံက်ထ္ၜးလဝ် သြန်ထံက်ပၚ်အပဵု (၄၅၀၀၀) ဒကေဝ်တုဲ လ္တူဒးထ္ပက်မံၚ်စၟတ်တဲဂွံဒုၚ်တဲဂှ် မိက်ဂွံကဵုသောၚ်ကလးရောၚ် အ္စာဘာကောန်ဂကူမန် ဟွံမိက်ဓမံက်ယၟုမွဲတၠ ဟီုရ။
“သၞာံဏံ သြန်ဒါန်ကၟိန်ဍုၚ်နာနာ အောန်စှေ်ကၠုၚ်တုဲ နူကဵုသြန်ထံက်ပၚ်ညးဍုၚ်ကွာန်မန် ကဵုမံၚ် (၄၅၀၀၀) ဒကေဝ်ဂှ် ဒေံါထောံရ။ ဆဂး ပ္ဍဲ (Pay Slip) ဂှ်တှေ် ဆက်စုတ်လဝ်သြန်ဂှ်ရ သြန်ပါကၠုၚ်ကဵုစရၚ်ဂှ်ကဵု သြန်ဂိတုဂွံဇေတ်ဇေတ်ဂှ် ဟွံတုပ်သၟဟ်ပုဟ်။ သြန်ဏံဂှ် ဟွံဆေၚ်စပ်ကဵု သြန်ဂအုံကွာန်ပုဟ်။ သြန်ထံက်ပၚ်အပဵု နူ MNEC ကဵုမံၚ်ဂှ်ရ” သာ်ဝွံ ညးဟီုရ။
အ္စာၝောံတၞဟ်မွဲတၠပၠန်ဂှ်လေဝ် သြန်ထံက်ပၚ်အပဵု (၄၅၀၀၀) ဒကေဝ် ဒေံါဇူလဝ်ဂှ် ဆက်ဓမံက်ထ္ၜးလဝ် ပ္ဍဲ Pay Slip ဂှ်ရ အကြာကမ္မတဳပရေၚ်ပညာကောန်ဂကူမန် MNEC ကဵု အ္စာ၊ အ္စာၝောံမန်တံ ကၠိုဟ်ဗၠေတ်အာမာန်တုဲ အတိုၚ်လၟိဟ်ပမာဏ ဂွံဒုၚ်တဲဍာံဍာံဂှ်ရ ဒးပလေဝ်ကဵုထေက်ရောၚ် ဂးရ။
“အခိၚ်ပ္တိတ်သြန်ဂိတုဂျောန်ဂှ်တှေ် ပ္ဍဲကဵု Pay Slip ဂှ် ချူလဝ် သြန်ထံက်ပၚ်အပဵု (၄၅၀၀၀) ဒကေဝ်ရ။ ဆဂး သြန်ဏံဂှ် အ္စာ၊ အ္စာၝောံတံ ဟွံဂွံပုဟ်။ အ္စာ၊ အ္စာၝောံလ္ၚဵုတံ ရံၚ်ဒး Pay Slip ဂှ် ချိုတ်ချိုတ်ပၠိုတ်ပၠိုတ်တုဲ ဟွံထ္ပက်စၟတ်တဲဏီမွဲသာ် မၚ်မံၚ် သွက်ဂွံသၟာန်သၟုက်သဳကၠဳရ။ လ္ၚဵုဂှ်တှေ် ဟွံဂွံပသတိမွဲသာ် ထ္ပက်စၟတ်တဲတုဲ ပ္တိတ်ဏာသြန်ဂိတုလေဝ်နွံ” သာ်ဝွံ ညးဟီုရ။
ဆေၚ်စပ်ကဵုကိစ္စဝွံတုဲ အ္စာ၊ အ္စာၝောံမန်တံ သၟာန်သၟုက်ဏာ ဇရေၚ်ညးတာလျိုၚ် အဆံၚ်ပွိုၚ်ဍုၚ် MNEC ကီုလေဝ် ဒးဒုၚ်စၞောန်လဝ် သွက်ဂွံဆက်သၟာန်သၟုက် ဇရေၚ်ညးတာလျိုၚ်အဆံၚ်လ္တူတံဟေၚ် ဂးရ။
ဟိုတ်ဂှ်ရ နကဵု MNEC ဝွံ ပ္ဍဲကဵုလၟေၚ်ကမၠောန်ကဵုသြန်ဂိတု ကုအ္စာ၊ အ္စာၝောံတံဂှ် ညံၚ်သ္ဂောံနွံကဵု ပရေၚ်ကၠးဖ္ဍးကီု၊ လၟိဟ်ပမာဏဓမံက်ထ္ၜးလဝ် ပ္ဍဲ Pay Slip ကဵု လၟိဟ်ပမာဏကဵုမံၚ်ဇေတ်ဇေတ်ဂှ် ညံၚ်ဂွံတုပ်သၟဟ်ကီု၊ ပရေၚ်ပြံၚ်လှာဲသြန်ဂိတု (ဝါ) ယဝ်နုက်ကေတ်နွံမ္ဂး ဟိုတ်ဖဵုကဵု ဗီုပြၚ်တော်ဂှ် ဒးပသောၚ်ကဵုသောဲသောဲဗြောဲဗြောဲရောၚ် အ္စာ၊ အ္စာၝောံဂမၠိုၚ်တံ ဖ္တိုက်ဖၟောဝ်လဝ်ရ။
ပ္ဍဲသၞာံဗ္တောန်ပညာဏံဝွံ နူ MNEC ဟိုတ်နူထပ်ဖအောန်ဖျေံ အခေါၚ်ဂွံဒုၚ်စသိုၚ်သြန်ဂိတု ဂှ်ရ မိမ အ္စာ၊ အ္စာၝောံလ္ၚဵုတံ ကဵုဇြဟတ်ဓရိုဟ် သွက်ဂွံဒေံါဇူကမၠောန် နွံကၠုၚ်ရဂှ်လေဝ် ဂွံတီကေတ် နူပွဳဗွိုၚ်ပရေၚ်ပညာမန်တံရ။