ပ္ဍဲပွိုၚ်ဍုၚ်ကအ်ကြိက်၊ တွဵုရးကရေၚ်ဂှ် ဗြဲဂူဆက်မံၚ်ဂှ်ရ ဍာ်ၜဳဂြာၚ်သၠုၚ်တိုန်တုဲ ဍာ်ဟွံက္လေၚ်စှေ်ဏီဂှ်ရ ညးဒေသမၞုံကြပ်ဇိုၚ်ၜဳတံ ဒးအာကၠုၚ်မံၚ်ကဵု ဂၠုၚ်ဍောတ်ဍောတ်ရောၚ် ဂွံတီကေတ်ရ။
ဗွဲတၟေၚ်မ္ဂး ပ္ဍဲကွာန်ကာန်နဳ၊ ဂြိုပ်ကြုက်(သရက်တော)၊ ကအ်မိတ်၊ ကအ်ဗိန်၊ (ခရစ်ကျောက်တန်း) မၞုံကြပ်ဇိုၚ်ၜဳဂြာၚ်ဂှ် ဍာ်ဇၞော်တုဲ ဗၠိုက်မံၚ်စဵုကဵု (၃) တ္ၚဲရောၚ် ဂွံတီကေတ်ရ။
ညးဒေသ နူ (ခရစ်ကျောက်တန်း) မွဲတၠဂှ် “အခိၚ်လၟုဟ်ဏံ ဒးအာကၠုၚ်ချဳဓရာၚ်မံၚ်ကဵုဂၠုၚ်ရ။ တ္ၚဲဏံလေဝ် ဗြဲဂူမံၚ်ဖိုဟ်။ သၠုၚ်ဍာ်ဂှ်တှေ် စိုပ်မံၚ်ဒဵုကဵုကအ်မၞိဟ်ရ။ ကွာန်ပိုဲတံဂှ် ပါမံၚ်ပ္ဍဲဒေသတိသဝ်တှေ် ဗၠိုက်ဂၠိုၚ်နူကွာန်ညးတၞဟ်ရ။ ဍာ်လေဝ် ဟွံစှေ်လောဲလောဲပုဟ်။ သၞာံတုဲကၠုၚ်ဂှ် ဍာ်ဇၞော် ကြပ်မွဲဂိတု” သာ်ဝွံ ဟီုရ။
စဵုကဵုတ္ၚဲဏံ ပရေၚ်အာကၠုၚ်ချဳဓရာၚ် ကေုာံ ပရေၚ်စသုၚ် ပြေပြံၚ်ကီုလေဝ် ဗြဲဆက်ဂူမံၚ်တုဲ ယဝ်ဍာ်ထပ်သၠုၚ်တိုန်ကၠုၚ်မ္ဂး အကာဲအရာ ဒးထပ်တၟာတ်ဘာဗ္တောန်လိက်နွံရောၚ် ညးဒေသလ္တူဂှ် ထပ်ဟီုလဝ်ရ။
အတိုၚ်ဌာနက္ဍိုက်က္ဍိုပ်စၞောန်ပ္ညုၚ်ဗြဲကျာ သၟဝ်တဲကမ္မယှေန်ပၞာန် လလောၚ်တြးလဝ် ပ္ဍဲဂိတုဂျူလာၚ် စၟတ်တ္ၚဲ (၁၆)၊ တ္ၚဲဏံမ္ဂး ပ္ဍဲတွဵုရးဍုၚ်မန်ကီု သီုတွဵုရးကရေၚ်ဂှ် စဵုကဵုၜါတ္ၚဲဂတဏံ ဒၞာဲဒေသလ္ၚဵု ဗြဲဆက်ဂူမာန်ရောၚ် ဓမံက်ထ္ၜးလဝ်ရ။
အတိုၚ်သၟာန်သၟုက်လဝ် ဇရေၚ်ညးဒေသ မၞုံပ္ဍဲကွာန်ကအ်မိတ်၊ ကအ်ဗိန်၊ ကာန်နဳကဵု ဂြိုပ်ကြုက်ဂှ်မ္ဂး ဍာ်ၜဳဂြာၚ်ဝွံ သၠုၚ်တိုန်ဒၟံၚ်ဇၟာပ်တ္ၚဲနွံကီုလေဝ် ဟွံစိုပ်စၟတ်ဍာ်ဒှ်ဓဝိၚ်ဏီဂှ်ရ နကဵုညးဒေသဂမၠိုၚ် စဵုကဵုအခိၚ်လၟုဟ် ပြံၚ်ဆုဲအာဟွံမွဲဏီ ဂွံတီကေတ်ရ။
“ဗြဲဂူဆက်မံၚ် ၜိုတ်မွဲအဒိုတ်နွံရ။ လၟုဟ်ဏံ အာကၠုၚ်ဂွံမံၚ်ဏီရ။ ဆဂး ဍာ်ၜဳဂှ် သၠုၚ်တိုန်ကၠုၚ်မံၚ်ရ” သာ်ဝွံ ညးဗြဴဒေသကအ်မိတ်မွဲတၠ ဟီုရ။
မွဲကရောံကဵုဗြဲဂူဇၞော်ဂှ်မ္ဂး ဘဲအန္တရာဲ လဗိုတ်ကျာမေလံၚ်၊ ဍာ်ဇၞော် ကေုာံ တိလာ်စှေ် မာန်ဂှ်ရ ညးမံၚ်တန်တဴ ပ္ဍဲဒေသတိသၠုၚ်တံ စွံသတိကဵု ဘဲအန္တရာဲတိလာ်ကီု၊ ညးမံၚ်တန်တဴ ကြပ်ကြုၚ်လဂေါဝ်တံ စွံသတိကဵု ဍာ်ဇၞော်၊ ဍာ်ကလိုပ်ညိဂှ် နူဌာနက္ဍိုက်က္ဍိုပ်စၞောန်ပ္ညုၚ်ဗြဲကျာတံ ကဵုသမ္တီ ဆဝ်မ္ၚုဟ်လဝ်ရ။
ပ္ဍဲတွဵုရးကရေၚ်ဝွံ အကာဲအရာဍာ်ၜဳ ဆက်သၠုၚ်တိုန်မာန်နွံဂှ်ရ ကိစ္စကၠောန်သ္ပဒစးဒုၚ် ပရေၚ်စဵုဒၞာ ဘဲအန္တရာဲဍာ်နွံရဂှ်လေဝ် ဂွံတီကေတ်ရ။