သ္ဂောံဗ္တိုက်သရိုဟ်သၞောတ်တၠအဝဵုအိုတ်သီုကီု သီုသၞောတ်တၠအဝဵုပၞာန် ကေုာံ သွက်ဂွံဒက်ပ္တန် ကၟိန်ဍုင်ဖေဝ်ဒရေဝ်ဒဳမဝ်ကရေဇြဳမာန်ဂှ်မ္ဂး ဂကောံဇြဟတ်ပၠန်ဂတး (၇) ဂကောံတံ တုပ်စိုတ်သ္ပဒတန် တင်တုပ်စိုတ်ပရေင်ဍုင်ကွာန် မူပထမ(အပြောံ)ရဂှ် လလောင်ပ္တိတ်လဝ် ပ္ဍဲဂိတုဂျူလာင် (၃၀)၊ နူတနေံဏံရ။
ပ္ဍဲကဵုတင်တုပ်စိုတ် ဆေင်စပ်ကဵုပရေင်ပၠန်ဂတးဂှ်ဝွံ သၞောတ်တၠအဝဵုပၞာန်ကီု သီုသၞောတ်တၠအဝဵုအိုတ်သီု သ္ဂောံအိုတ်ကၠေံအာဂှ် ပံင်တောဲမွဲစွံတုဲ နကဵုရီုဗင်ထံက်ပင် ပရေင်ပၞာန်၊ ပရေင်ဍုင်ကွာန် ဂတးဂတန်ဂှ် စဵုကဵုကလိဂွံပေဲါအံင်ဇၞး ပံင်ကောံလုပ်အာပေဲါဗ္တိုက်ရောင် တုပ်လဝ်စိုတ်ရ။
ပရေင်တန်ကြန် ကေုာံ ဂုဏ်သိက္ခာ ဂကောံဇြဟတ်ပၠန်ဂတးနာနာဂှ် ရှေ်သှေ်သ္ပစၟတ်သမ္တီ ကဵုရီုဗင်ဂတးဂတန်တုဲ သွက်ဂွံပံင်ကောံရေင်တၠုင်အာကီု၊ ပရေင်လညာတ်ဟွံတုပ်သၟဟ် ကတဵုဒှ်ကၠုင် အကြာဂကောံဇြဟတ်ပၠန်ဂတးမွဲစွံတံဂှ် သွက်ဂွံပသောင်အာ နကဵုဂၠံင်ဍာန် ဆဵုဂဗသဳကၠဳ ဗွဲမၜိုဟ်လလမ်ဟေင်ရ။
တုဲပၠန် မွဲဂကောံကုမွဲဂကောံဂှ် သွက်ဒေသတိဍာ်မွဲ ဗၠးၜးဟွံသေင်မွဲသာ် စဵုကဵုအလုံမွဲကၟိန်ဍုင် ဂွံဗၠးၜးဂှ် သွက်ဂွံလုပ်အာပေဲါဗ္တိုက်မွဲကရောံဓဝ်ကီု၊ နကဵုပရေင်ဍုင်ကွာန် သွက်ဂွံသဳကၠဳကဵု ဂကောံဒပ်ပၞာန်နွံကၠုင်မ္ဂး ဒုင်သဇိုင်လ္တူတင်စိုတ် ပရေင်ဍုင်ကွာန်ဂှ်တုဲ အကြာဂကောံဇြဟတ်ပၠန်ဂတးတံ သွက်ဂွံသဳကၠဳကေတ်လညာတ် က္လေင်ပလန်အာနွံရ။
ကၟိန်ဍုင်ပံင်ကောံရေင်တၠုင်မံင်ကဵု ဂကောံဒပ်ပၞာန်တံ ဘပဠကဵုကၠုင်ဇြဟတ်ဓရိုဟ် လ္တူဂကောံဇြဟတ်ပၠန်ဂတးဂမၠိုင်မ္ဂး သွက်ဂွံပံင်ကောံကက္လေင်ပလန် ဗွဲမညဳသၟဟ်ကီု၊ သွဟ်ပေဲါရုဲမာဲ (၂၀၂၀) ဝွံ သွက်ဂွံဓမံက်ရုပ်ရဴ သၞောတ်ပရေင်ဍုင်ကွာန် သၟဝ်သဇိုင်သၞောဝ်ဒက်ပ္တန်ဍုင် (၂၀၀၈) ဟွံသေင်မွဲသာ် သွက်ဂွံဒက်ပ္တန် ကၟိန်ဍုင်ဖေဝ်ဒရေဝ်ဒဳမဝ်ကရေဇြဳ ကေုာံ ပၠန်ဂတးဂွံအံင်ဇၞးဂှ် သ္ပစၟတ်သမ္တီတုဲ သွက်ဂွံစကာရပ်စပ်အာ ဍိုက်ဍိုက်ပေင်ပေင်ဂှ် တုပ်လဝ်စိုတ်ရ။
နကဵုတင်တုပ်စိုတ် ဆေင်စပ်ကဵုပရေင်ဍုင်ကွာန်မ္ဂး ပဲါပ္တိတ် ပရေင်ပၞာန်သီအဝဵုတုဲ ပ္ဍဲအနာဂတ်ဏံ ကိစ္စဒပ်ပၞာန်ပါလုပ်မံင် ပ္ဍဲပရေင်ဍုင်ကွာန်ဂှ် ညံင်သ္ဂောံအုပ်ကၠေံအာနိဂီုတုဲ သွက်ဂွံဗ္တိုက်ပလီု ပွမရုန်ဂစာန် က္လေင်ပၠောပ်မံင်လမျီု သဇိုင်သၞောဝ်ဒက်ပ္တန်ဍုင် (၂၀၀၈) မလလောင်လဝ်ပလီုထောံလဝ်ဂှ်လေဝ် တုပ်လဝ်စိုတ်ရ။
သွက်ဂွံချူဓဇက် သဇိုင်သၞောဝ်ဒက်ပ္တန်ဍုင် မဒုင်သဇိုင်ကဵု သၞောတ်ဖေဝ်ဒရေဝ် ကေုာံ ဒဳမဝ်ကရေဇြဳ ဂကောံဇြဟတ်မဆေင်စပ်သီုဖအိုတ် ဒုင်တဲမာန်ဂှ်ကီု၊ အတိုင်သဇိုင်သၞောဝ်ဖေဝ်ဒရေဝ်ဒဳမဝ်ကရေဇြဳ မံက်ကၠုင်ဏံ သွက်ဂွံဒက်ပ္တန် ကၟိန်ဍုင်ဖေဝ်ဒရေဝ်ဒဳမဝ်ကရေဇြဳတၟိ မဒှ်ရ။
တင်တုပ်စိုတ်ဂမၠိုင်ဏံဂှ်ဝွံ ကမ္မတဳသ္ပစၞးကၠတ်ထဝ်ကၟိန်ဍုင် (CRPH)၊ ကံင်ဇြဳမဒုင်ချပ်ဂၞန် ပရေင်ညဳသၟဟ်ကောန်ဂကူ (NUCC)၊ အလဵုအသဳညဳသၟဟ်ဂကူ (NUG)၊ ကၠတ်ထဝ်ယူဏေတ်ဖေဝ်ဒရေဝ်သေတ်ဂိုင် (SFUH)၊ အလဵုအသဳအကြာ ယူဏေတ်ဖေဝ်ဒရေဝ်သေတ်ဂိုင် (SFUIG)၊ ကၠတ်ထဝ်ဒေသအဝ (MRH) ကေုာံ ကံင်ဇြဳအုပ်ဓုပ်ကာလအကြာဒေသအဝ (MIGC) တံ တုပ်စိုတ်သ္ပလဝ်ဒတန်ရ။