ဍုၚ်မဝ်တံၚ်၊ ပွိုၚ်ဍုၚ်တၞၚ်သဳ၊ ပယျဵုသေံဗၟာဂှ်ဝွံ ဟိုတ်နူပရိုၚ် ဒပ်ပၠန်ဂတးတံ က္လေၚ်ဗ္တိုက်ဂှ်ရ လ္ပာ်ကမ္မယှေန်ပၞာန်တံ ပတေၚ်လဝ်ဂီုကၠီုတုဲ ကၠောန်သ္ပဗပေၚ်ကၠုၚ်မံၚ်ဇြဟတ်ပၞာန်နွံရောၚ် ညးဒေသတံ ဟီုရ။
ဒပ်ပံၚ်ကောံပၠန်ဂတး ဒးဗလးတဲကျဗြမ်လဝ် ဍုၚ်မဝ်တံၚ်ဂှ်ဝွံ ကောန်သ္ဂံၚ်ဂမၠိုၚ် ကေတ်လၟောၚ်ဇူ ကေုာံ အရာနွံပၟိက်ဂမၠိုၚ်ဂှ် ပလေဝ်ပလေတ်ဖန်ဇန်တုဲ သွက်ဂွံက္လေၚ်လုပ်ပေဲါဗ္တိုက်ဂှ် အကာဲအရာ ဒှ်မံၚ်ဒတုဲဒတုဲယျရောၚ် ပ္ဍဲဂိတုဂျူလာၚ် (၁၀) ဏံ ကဵုသတိလလောၚ်ပ္တိတ်လဝ်ရ။
လိက်လလောၚ်တိတ်ကၠုၚ်တုဲဂှ်မ္ဂး ပ္ဍဲဒၞာဲပွဳဗွိုၚ်ဗဒဲါဍုၚ် ကေုာံ လုပ်တိတ်ဍုၚ်မဝ်တံၚ်ဂှ် သၠုၚ်ပ္တိုန်လဝ် ပရေၚ်ဂီုကၠီုတုဲ ဗပေၚ်လဝ် ဇြဟတ်ပၞာန်ကီုရောၚ် ညးဒေသမဝ်တံၚ်မွဲတၠ ဟီုကဵုဌာန်ပရိုၚ်ဗၠးၜးမန် IMNA ရ။
“ဒၞာဲဗဒိုပ်ဒပ်ဍေံတံဂှ်လေဝ် ပလေဝ်ပလေတ်မံၚ် ချိုတ်ချိုတ်ပၠိုတ်ပၠိုတ်ရ။ ပေဲါဗ္တိုက်ထပ်ဒှ်ကၠုၚ်မာန်ကီုလေဝ် ဗီုအလန်ကၠာတေံ ဟွံသ္ကာတ်မြဟ်ပုဟ် ထေၚ်ရ။ အလန်ကၠာတေံတှေ် ဂကောံဒပ်ပၠန်ဂတးတံ သွက်ဂွံသီကေတ် လွဟ်လနက် ပ္ဍဲဗဒိုပ်မာန်ဂှ် ဗ္တိုက်ကၠုၚ်နကဵုဇြဟတ်ဂှ်ရ ပေဲါဗ္တိုက်သ္ကာတ်မြဟ်ကၠုၚ်ရ။ လၟုဟ်ဏံ မုဟွံမွဲရပုဟ်” သာ်ဝွံ ညးဟီုရ။
ဒပ်ပၞာန်ဗၠးၜးကရေၚ် KNLA ကေုာံ ဒပ်ပံၚ်ကောံပၠန်ဂတးတံဝွံ ပ္ဍဲဂိတုနဝ်ဝေမ်ဗာ၊ သၞာံ (၂၀၂၅) ဂှ် သီကေတ်ဍုၚ်မဝ်တံၚ်မာန်တုဲ ပ္ဍဲကဵုလလအ် ပွိုၚ် (၆) ဂိတု၊ ဂိတုအေဗရဴ၊ သၞာံ (၂၀၂၆) ဏံဂှ် ကမ္မယှေန်ပၞာန်တံ ပြုပြေၚ်ထ္ပက်ကၠုၚ်ပၞာန် နကဵုဇြဟတ်ဂှ်ရ ဒပ်ပံၚ်ကောံပၠန်ဂတးတံ ဒးဆုတ်တိတ်လဝ်ရ။
အပ္ဍဲတ္ၚဲအကြာတဏံ ဟိုတ်နူအကာဲအရာ သၠုၚ်ပ္တိုန်လဝ်ဇြဟတ်ပၞာန်ဂှ်ရ ညးဒေသက္လေၚ်စိုပ်မံၚ်ဌာန်ဒၟံၚ်တံ ဒးဂွိ်ၚ်မံၚ်ကဵု အကာဲအရာပရေၚ်ဂီုကၠီုရ။
ပ္ဍဲဍုၚ်မဝ်တံၚ်ဝွံ ဘဲအန္တရာဲလွဟ်ဇၞော်၊ စက်ဗရုသာဲ ကေုာံ ပေဲါဗ္တိုက် အခိၚ်ဟွံရုဲ ဒှ်ကၠုၚ်မာန်ဂှ်ရ က္လေၚ်စဴဌာန်ဒၟံၚ်ဟွံမာန်ဏီတုဲ သ္ၚိဒၟံၚ်လီုလာ်မံၚ်ဂမၠိုၚ်ဂှ်လေဝ် ဟွံဂွံက္လေၚ်ပလေဝ်ဏီရောၚ် ညးပဲါဒဴဘဲပၞာန်မဝ်တံၚ် စိုပ်မံၚ်လ္ပာ်ဒေသမန်မွဲတၠဂှ် ဟီုရ။
“ကၠာတေံမွဲအလန်ဂှ် ဟိုတ်နူပေဲါဗ္တိုက်တုဲ သ္ၚိတံလေဝ် ဒးအာဗွဲမဂၠိုၚ်ရ။ ညးလ္ၚဵုတံ က္လေၚ်ပလေဝ်မံၚ်ကီုလေဝ် ပိုဲတံဂှ်တှေ် အကာဲအရာဟွံညိၚ်ဝတ်ဏီတုဲ အစဳဇန်က္လေၚ်ပလေဝ် ဟွံမွဲဏီပုဟ်။ ပ္ဍဲကဵုဂၠံၚ်ဂှ်လေဝ် သီုၜါလ္ပာ် စၟဳစၟတ်မံၚ်ကွေံကွေံဏောၚ် ညးက္လေၚ်လုပ်တံ ဟီုကၠုၚ်ရ။ ကဵုကာတှေ် ဟွံကဵုအာပုဟ်။ ကဵုကွဳလိုန်ရ အာဂွံ၊ ဂွံမိၚ်ကေတ် ဗီုဂှ်” သာ်ဝွံ ဟီုရ။
လ္ပာ်ဒပ်ပံၚ်ကောံပၠန်ဂတးတံလေဝ် သ္ကုတ်ဂၠံၚ် နူလုပ်ဍုၚ်မဝ်တံၚ် စဵုကဵုကွာန် စၟတ် (၉) ဂှ် ဟွံကဵုအခေါၚ်ကွဳစက်ဖ္ဍိုက်ကပေါတ်တတ်ကၠောံတုဲ နူကဵုသွာၚ်ဂၠံၚ်(ထုံခါး) သ္ကုတ်ဂၠံၚ်ကွာန် စၟတ် (၉) ဂှ်လေဝ် ဟွံကဵုအခေါၚ်တတ်ကၠောံအာကၠုၚ်ရောၚ် ကဵုသတိ လလောၚ်ပ္တိတ်လဝ်ရ။
အပ္ဍဲဒေသသၞောတ်ဗ္ၜတ်လဝ်ဏံ ယဝ်တတ်ကၠောံအာကၠုၚ်မ္ဂး ပရေၚ်စွံပွန်ပၞာန် ကေုာံ ပရေၚ်ဗ္တိုက်ဗၠေတ်မှာ ဒးဒုၚ်မာန်ဂှ်ရ ဒ္ဂေတ်ဗက်ချိုတ်ချိုတ်ပၠိုတ်ပၠိုတ်ညိဂှ်လေဝ် နူဒပ်ပံၚ်ကောံပၠန်ဂတးတံ ကဵုလဝ်သတိရ။
မွဲလ္ပာ်ဂှ်လေဝ် ဟိုတ်နူပေဲါဗ္တိုက်တုဲ သၞာဲဒဴဌာနမဆေၚ်စပ် ညးဒးပဲါဒဴနူသ္ၚိဌာန်တံ ညံၚ်သ္ဂောံက္လေၚ်လုပ်စိုပ်ဂှ် နူဂကောံကမ္မယှေန်ပၞာန်တံ ကဵုမံၚ်ဇြဟတ်ဓရိုဟ် ဗွဲမတေၚ်ဂြတ်နွံရ။