ပရေၚ်ပြံၚ်လှာဲသ္ကိုပ်အုပ်ဓုပ် ကွာန်ကြုက်ပိ၊ ပွိုၚ်ဍုၚ်ဇြပ်ဗု၊ တွဵုရးဍုၚ်မန်ဂှ် ကတဵုဒှ်မံၚ်မွဲနှေံနှေံတုဲ ညးစုက်လုက်ကဵု ဒပ်ပၞာန်မွဲတၠ ဖန်ဇန်မံၚ်လ္ပာ်လက္ကရဴ အတိုၚ်ပၟိက်စိုတ်ရောၚ် ဂွံတီကေတ် နူညးဒေသတံရ။
အပ္ဍဲဂိတုဂျူလာၚ်၊ သၞာံ (၂၀၂၆) ဏံဝွံ ပရေၚ်ပြံၚ်လှာဲသ္ကိုပ်အုပ်ဓုပ် ကွာန်ကြုက်ပိ ကတဵုဒှ်ကၠုၚ် စဵုကဵု (၃) ဝါနွံရောၚ် ဂွံတီကေတ်ရ။
ဗွဲတၟေၚ်မ္ဂး သ္ကိုပ်အုပ်ဓုပ်ဂမၠိုၚ် ဆက်စပ်မံၚ်ကဵု ဒပ်ပၠန်ဂတးရောၚ် ဒးဒုၚ်တေၚ်တုဲဂှ် ဒးဒေံါဇူနူတာလျိုၚ်ရောၚ် ညးဒေသဇြပ်ဗု ဟွံမိက်ဓမံက်ယၟုမွဲတၠ ဟီုရ။
“ညးနွံလက္ကရဴဒပ်ပၞာန်မွဲတၠဂှ် ဒၞာဲသ္ကိုပ်အုပ်ဓုပ်ဂှ်တှေ် ညးမိက်ဂွံခါန်ကၞက် မၞိဟ်ညးဗဂေတ်မာန်ဂှ်တုဲ သ္ကိုပ်အုပ်ဓုပ်တံ ဒးဒုၚ်တေၚ်ရ။ ဆက်စပ်မံၚ်ကဵု AD ဂးတုဲ တေၚ်ကဵု ရုၚ်ပၞာန်ခရိုၚ်ရးဂှ်ရ ဒးဒုၚ်စၟဳစၟတ်မံၚ်” သာ်ဝွံ ဟီုရ။
သ္ကိုပ်အုပ်ဓုပ်ဂမၠိုၚ် ဒးဒုၚ်ဆေၚ်မုက်ကဵု အမှုကီုလေဝ် ဒုၚ်ဒဏ်ဟွံပြာကတ်မ္ဂး က္လေၚ်ဗၠးကၠုၚ်မံၚ်ရောၚ် ဂွံတီကေတ်ရ။
ဒၞာဲသ္ကိုပ်အုပ်ဓုပ်သၠးမံၚ်တံဂှ် သ္ကိုပ်အုပ်ဓုပ်တြေံ နွံလက္ကရဴဒပ်ပၞာန်မွဲတၠ ဖန်ဇန်ဒၟံၚ် အတိုၚ်ပၟိက်စိုတ်တုဲ ပရေၚ်တေၚ်ဗစိုပ်ဟွံဍာံပြ ဇရေၚ်ရုၚ်စၟဳစၟတ်ခရိုၚ်ဂှ်လေဝ် ကၠောန်သ္ပမံၚ်ရောၚ် ညးဒေသမွဲတၠပၠန်ဂှ် ဟီုရ။
“ဍေံဂှ် အဝဵုနွံမံၚ်။ နွံမံၚ်လက္ကရဴဒပ်ပၞာန်ရ။ မုဍေံကၠောန်ကၠောန် ညးမွဲဟွံဂံၚ်ဟီုပုဟ်။ ဍေံဂှ် ကၠာတေံလေဝ် ဗီုဏံရ။ ကၠာသၞာံ (၂၀၂၀) ဂှ်လေဝ် ကေၚ်ပလှ်ဖျေံလဝ် သ္ကိုပ်အုပ်ဓုပ်မွဲတၠရ” သာ်ဝွံ ဟီုရ။
ညးဒေသဟီုဂးပရူပရာ ပရေၚ်ယှုက်ထုဲ သ္ကိုပ်အုပ်ဓုပ်ကွာန်ဂှ် ဒှ်ဓဝိၚ် ဂဝိၚ်ဖေက် ဒးဒုၚ်ကေတ်အရေဝ်တုဲ ဟွံဂံၚ်ဟီုဓမံက်ပ္တိတ်မွဲသာ်ရဂှ်လေဝ် ဂွံတီကေတ်ရ။
ညးနွံလက္ကရဴဒပ်ပၞာန်ဂှ်ဝွံ သၟာၚ်နူသီ၊ သွံတိကၠအ်ဍာ်ဒဳဂှ်မ္ဂး ပံၚ်ကဵုဂကောံသ္ကံရဲတုဲ ပၠောပ်မံၚ်ကပေါတ်ဒမၠုက် ဟွံလုပ်သၞောဝ်ဂှ်ရောၚ် ဂွံတီကေတ် နူညးဒေသတံ ဟီုဂးလဝ်ရ။
သၞာံ (၂၀၂၄) တုဲကၠုၚ်တေံဂှ်လေဝ် ဒးဒုၚ်ကေၚ်ရပ်လဝ်သီုလွဟ် ကြပ်မွဲဂိတု ပ္ဍဲဇရေၚ်ဂကောံကရောၚ်ပၞာန်တံၚ်ညိုဝ်နွံရဂှ်လေဝ် ဂွံတီကေတ်ရ။