ပ္ဍဲကဵုကွာန်လ္ၚဵု မၞုံအပ္ဍဲဒေသၜဳဂြာၚ်၊ အဆက်စပ်တွဵုရးဍုၚ်မန်ကဵု ကရေၚ်ဂှ်ဝွံ ညးဒေသဒှ်သံသယ ဆက်စပ်ကဵုဂဥုဲၜူမာဲဂမၠိုၚ်ဂှ် ဂကောံဒပ်ပၞာန်ကရေၚ် DKBA တံ ရပ်ဒၟံၚ်အဆက်ဆက်နွံရောၚ် ဂွံတီကေတ် နူညးဒေသတံရ။
ပ္ဍဲဂိတုဂျူလာၚ် စၟတ်တ္ၚဲ (၂၂၊ ၂၃) တုဲကၠုၚ်ဏံ ညးတြုံဒေသမွဲတၠ၊ ညးအုပ်ကာမွဲတၠ နူကွာန်လိုင်၊ မၞုံပ္ဍဲဂကောံကွာန် (ခရစ်ကျောက်တန်း) ကဵု ညးတြုံမွဲတၠ နူကွာန်ကအ်ဗဳ၊ မၞုံဗဒါဲကွာန်ကျာ်ကဗၚ် ပွိုင်ဍုင်ကအ်ကြိက်တအ်ဂှ် ဂကောံ DKBA မချဳဓရာၚ်မံၚ်အပ္ဍဲဒေသတံ ကၠုၚ်ရပ် စဵုကဵုအပ္ဍဲသ္ၚိဒၟံၚ်ရ။
ညးဒးဒုၚ်ရပ်တံဂှ်ဝွံ ညးအုပ်ကာကွာန် နာဲအနာၚ်၊ ကောန်ကွာန် နာဲခေန်မာၚ်တာန် ကေုာံ နာဲအဍာတံ မဒှ်ရ။ ကုညးတံဂှ်ဝွံ ဒှ်သံသယ ဆက်စပ်မံၚ်ကဵု ပရေၚ်သွံရာန်ဂဥုဲၜူမာဲတုဲ ကော်ရပ်ဏာရောၚ် ညးဒေသၜဳဂြာၚ်မွဲတၠ ဟီုရ။
“ညးတံ သီုညးပိတၠဂှ် ဒှ်မံၚ်ရဲညးသ္ကံရ။ ညးအုပ်ကာဂှ်တှ်ေ မၞိဟ်မၞုံယၟုခိုဟ်မွဲဏောၚ် ပိုဲတံတီလဝ်ရ။ ဆဂး ဍေံတံ ဒှ်သံသယတုဲ ရပ်ဏာဏောၚ် ဂးရ။ ပ္ဍဲကဵုနာဲအဒါဂှ်တှေ် ဂွံဆဵုကေတ် လွဟ်မွဲဇကိုအ်ကဵု ဂဥုဲၜါဓုပ် ဂွံမိၚ်ကေတ်ရ” သာ်ဝွံ ညးဟီုရ။
ပ္ဍဲဂိတုအေဗရဴတုဲကၠုၚ်တေံဝွံ နူကဵုနဲဗျူဟာကောပ်ကာဲ (၂) ၊ လ္ပာ်သ္ကုတ်ပလိုတ်ဒေါန စၟတ် (၂)၊ DKBA ဂှ် ညးလဵုမွဲဟွံဟီု ပွမသွံတြး၊ ဂိုၚ်ဒေပ်၊ ဒုဟ်ဒဏ် ဂဥုဲၜူမာဲ နွံကၠးဖ္ဍးမ္ဂး ကေတ်အရေဝ်ကဵုဒုဟ်ဒဏ် စဵုကဵုထံၚ် (၃) သၞာံရောၚ် လလောၚ်ပ္တိတ်လဝ်ရ။
ဗွဲကြဴဂှ်မ္ဂး DKBA တံဝွံ ပ္ဍဲကဵုကွာန် မၞုံမွဲဒမြိပ်ၜဳဂြာၚ်ဂမၠိုၚ်ဂှ် ဗ္တိုက်သရိုဟ်ဂဥုဲၜူမာဲဂးတုဲ ကၠောန်သ္ပကၠုၚ် ပရေၚ်စၟဳစၟတ် ကေုာံ ပရေၚ်ရပ်စပ်ဂမၠိုၚ်အဆက်ဆက်တုဲ ကုညးဒှ်သံသယဂမၠိုၚ်ဂှ် ကော်စၟဳစၟတ် ရပ်ထိၚ်ဒၟံၚ်နွံရောၚ် ဂွံတီကေတ်ရ။
တုဲပၠန် အပ္ဍဲကဵုတ္ၚဲလောန်ကၠုၚ်အကြာဏံဂှ်လေဝ် ညးတြုံ (၃) တၠ သီုကဵုသက်သဳဂဥုဲၜူမာဲ နူကွာန် (ကော့လျှံ၊ တံတားဦး) ၊ ကာန်နဳ မၞုံပ္ဍဲပွိုၚ်ဍုၚ်ကအ်ကြိက်ဂှ် ဂကောံ DKBA တံ ရပ်ဂွံလဝ် ပ္ဍဲကဵုမွဲတ္ၚဲဓဝ်ရောၚ် ညးဒေသမွဲတၠဂှ် ဟီုရ။
“ပ္ဍဲကွာန်ကာန်နဳဂှ်တှ်ေ ရပ်ဂွံ ၜိုတ် (၄၀၀) မရ။ ညး (တံတားဦး) မွဲတၠဂှ် ၜိုတ်အကြာ (၈၀၀) မ၊ (ကော့လျှံ) ဂှ်တှေ် မူစိမဟီုဂှ် ဟွံတီချိုတ်ပၠိုတ်ပုဟ်။ အေ (၃) ကွာန်ဂှ်လေဝ် မွဲအဆက်ဓဝ်ဟေၚ်” သာ်ဝွံ ညးဟီုရ။
ကၠာတေံမ္ဂး ညးဒးဒုၚ်ရပ်တံဂှ် ထိၚ်ဒဝ်လဝ် ပ္ဍဲဗဒိုပ် DKBA မၞုံပ္ဍဲကွာန် (ပိုၚ်ရပ်) ဂှ်ကီုလေဝ် ညးဒးဒုၚ်ရပ်လဝ်လၟုဟ်ဏံ ထိၚ်ဒဝ်လဝ်ဒၞာဲလဵုရောဂှ် နကဵုဌာန်ပရိုၚ်ဗၠးၜးမန် ဆက်ဂၠိုက်ဂၠာဲ သွက်သ္ဂောံသ္ပဒတန်ဖိုဟ်ရ။
ဂိတုဂျူလာၚ် စၟတ်တ္ၚဲ (၃) တုဲကၠုၚ်ဏံဂှ်လေဝ် ပ္ဍဲကွာန်ကြေဝ်ဏာ၊ ပွိုၚ်ဍုၚ်ကျာ်မြဟ်ဂှ်ဝွံ သၟတ်ဒေသ (၃) တၠ သုၚ်စောဲမံၚ်ဂဥုဲၜူမာဲဂှ် ဂကောံ DKBA တံ ရပ်ကော်ဏာတုဲ အဃောရပ်ထိၚ်ဒဝ်လဝ်ဂှ် ပရူဒဒှ်သၟတ်မွဲတၠချိုတ်အာဂှ်လေဝ် နွံကၠုၚ်လဝ်ရ။
ဟိုတ်ဂှ်ရ သွက်ဂွံထိၚ်ဒဝ် ပြဒ္ဒညာဂဥုဲၜူမာဲဂှ် နွံပၟိက်ရောၚ် ဒုၚ်တဲကီုလေဝ် ပရေၚ်စၟဳစၟတ်ရပ်စပ်ဂမၠိုၚ်ဂှ် ဗွဲမညဳသၟဟ်ကဵု နဲကဲသၞောဝ်ဥပဒေဟေၚ် ဒးကၠောန်သ္ပရေၚ်တၠုၚ် ဗွဲမကၠးဖ္ဍးထေက်ရောၚ်ဂှ် ညးဒေသလ္ၚဵုတံ ဟီုဂးသ္ၚဳဂၠိပ်မံၚ်အိုတ်ရ။