အ္စာ၊ အ္စာၝောံ မယိုက်ဂၠၚ်ကေတ်မံၚ်တာလျိုၚ် ပ္ဍဲဘာကောန်ဂကူမန်၊ မၞုံသၟဝ်ဌာနပရေၚ်ပညာကောန်ဂကူမန်ဂှ် ကောန်ညးဍုၚ်ကွာန်တံ ဆက်ထံက်ပၚ်အာကဵုသြန်ရောၚ် ဂွံတီကေတ်ရ။
အ္စာ၊ အ္စာၝောံ မယိုက်ဂၠၚ်ကေတ်မံၚ်တာလျိုၚ် ပ္ဍဲဘာကောန်ဂကူမန်ဂမၠိုၚ်ဝွံ သၟာၚ်နူသြန်ဂိတု ဌာနပရေၚ်ပညာကောန်ဂကူမန် ကဵုထံက်ပၚ်ဂှ်တုဲ နကဵုသြန်ကောန်ညးဍုၚ်ကွာန်မန်တံလေဝ် ကလိဂွံမံၚ်သြန်ထံက်ပၚ်အပဵုနွံရ။
သြန်ထံက်ပၚ်အပဵု သွက်အ္စာ၊ အ္စာၝောံဂမၠိုၚ်ဂှ်ဝွံ ကောန်ညးဍုၚ်ကွာန်တံ ကဵုထံက်ပၚ်မံၚ်နွံတုဲ တန်တဴလ္တူပမာဏ ကလိဂွံသြန်ဂအုံဂှ်တုဲ လၟိဟ်ပမာဏ သြန်ထံက်ပၚ်အပဵု အ္စာ၊ အ္စာၝောံဂမၠိုၚ် ကလိဂွံဂှ်လေဝ် အကြာမွဲပွိုၚ်ဍုၚ်ကဵု မွဲပွိုၚ်ဍုၚ် ဟွံတုပ်သၟဟ်ရ။
“သြန်ထံက်ပၚ်အပဵုဂှ်တှေ် ကွာန်လ္ၚဵုတံဂှ် မွဲကိုဋ်၊ ၜါကိုဋ် ဂွံမံၚ်နွံရ။ အ္စာ၊ အ္စာၝောံ ဂွံမံၚ် ၜိုတ်ၜါဠက်၊ ပိဠက်ဟေၚ်ဂှ်လေဝ် နွံရ။ ကွာန်ကဵုဂၠိုၚ်မာန်ဂှ်တှေ် အ္စာ၊ အ္စာၝောံတံ ပြေပြံၚ်ကီုလေဝ် အ္စာ၊ အ္စာၝောံ ဂွံမံၚ် ၜိုတ်ၜါဠက်၊ ပိဠက်တံဂှ်တှေ် ဟွံပြေပြံၚ်ပုဟ်” သာ်ဝွံ အ္စာၝောံမွဲတၠဂှ် ဟီုရ။
လ္ပာ်ဌာနပရေၚ်ပညာကောန်ဂကူမန်တံလေဝ် သွက်အ္စာ၊ အ္စာၝောံတံဂှ် ဟွံထ္ပိုတ်လဝ်သြန်ထံက်ပၚ် မွဲဒကေဝ်မွဲခတှေ်မွဲသာ် ကဵုလဝ်ထံက်ပၚ် ဍိုက်ဍိုက်ပေၚ်ပေၚ်ရောၚ် ဌာနပရေၚ်ပညာကောန်ဂကူမန် လလောၚ်ပ္တိတ်လဝ်ရ။
ပ္ဍဲသၟဝ်ဌာနပရေၚ်ပညာကောန်ဂကူမန်ဝွံ ဘာတန်မူလ၊ တန်လဒေါဝ်၊ တန်သၠုၚ်ကီု သီုဖအိုတ် ဘာကောန်ဂကူမန် (၁၄၀) ပြၚ်နွံတုဲ အ္စာ၊ အ္စာၝောံ မယိုက်ဂၠၚ်ကေတ်မံၚ်တာလျိုၚ် (၈၀၀) တၠပြၚ်နွံရောၚ် ဂွံတီကေတ်ရ။