လိက်လညာတ် – စေတနာ (လှာၜိုပ်)
ကောန်ဂကူ စွံၚုဟ်မးကဵုဂကူ ပ္ဍဲပ္ၚံက်ပရေၚ်ဍုၚ်ကွာန်ပြံၚ်သၠာဲဏံဂှ် ဒှ်ဇြဟတ်ကေတ်ဗၠးၜးဂကူဍာံဇေတ် ရောၚ်။ ပၠန်ဂတးကလၚ်ရမျာၚ်ညးဍုၚ်ကွာန် ကေတ်ကသပ် လညာတ်နူမိမညးဍုၚ်ကွာန် ကောန်ဂကူ ဇကုဍာံဇေတ်မ္ဂး ဘဝဂကူပၠန်ဂတးမံၚ်တ္ၚဲဏံ ဟွံဒးဂွိၚ်ကဵုဇြဟတ် ဂီုကၠီုစဵုဒၞာဂကူ ဇြဟတ်လုပ်ပေါဲဗ္တိုက်ရ။
ပ္ဍဲကဵုဇၟောဝ်ဍာ်ပရေၚ်ဍုၚ်ကွာန် ပြံၚ်သၠာဲဏံ က္ဍိုပ်သ္ကိုပ်ကောန်ဂကူ ဂွံသတိပြဟ်တံ ထ္ၜးဏာသက်သဳ စေတနာယဵုယဵုလ္ဂူလ္ဂူ တပ်ပ်တးတး ပ္ဍဲကောန်ဂကူဇကု တၟံ (၁၀၀%) မ္ဂး ကောန်ဂကူဂှ် ဂွံဇြဟတ်စိုတ် ကလၚ်ရမျာၚ်က္ဍိုပ်သ္ကိုပ်ပေၚ်ပေၚ်ရောၚ်၊ ညးဍုၚ်ကွာန်သၟတ်တၠပညာတံလေဝ် မၚ်ဒုၚ်တၠုၚ်မံၚ် က္ဍိုပ်သ္ကိုပ် ခိုဟ်ခိုဟ် ပ္ဍဲဂကူဇကုရောၚ်။
အခေတ်ဏံ ဇၟာပ်ဂကူရ တၠပညာ ဂၠိုၚ်တဴဒၟံၚ်ရောၚ်၊ ပ္ဍဲကဵုဇွိုန်လပှ်ပရေၚ်ဍုၚ်ကွာန် ဂေတ်မံၚ်တ္ၚဲဏံ ကောန်ဂကူဇြဟတ်ဍောတ်တ်တံ ညံၚ်ဂွံဗၠးတိတ်နူကဵု ဘဝမ္ဒးမံၚ်ဒၟံၚ်သၟဝ်တဲ ညးဂွံလဝ်အဝဵုဂှ် ဂကူညးမ္ဂး ညးဆာန် ကောန်ဂကူညးမ္ဂး ညးသ္ပသမ္တီ ညံၚ်ဂကူညးတၞဟ်တံ ပ္ဍဵုပ္ဍိုက်ဂကူဇကုဟွံမာန် လုပ်ပၠန်ဂတး ဂၠာဲအခေါၚ်ဗၠးၜး သွက်အခေါၚ်အရာဂကူ ဒှ်အဓိက ပ္ဍဲဂကူဂှ်ရ။
ယွံ ဂကူမန်တံ “ဝၚ်ဂကူဂွံကျေဝ် ညးအဲဒးပယျေဝ်” ဒုၚ်သ္ဇိုၚ်ကဵုကြက်ဂလာန်ဏံတုဲ ဇၟာပ်ဂကူရ နွံပၟိက်မံၚ် ဇၞော်ကဵုဇြဟတ်ရောၚ်၊ ညးဍုၚ်ကွာန်ခမဳသၚ်တၠပညာတံလေဝ် နွံပၟိက်မံၚ်ကဵု ဝၚ်ဂကူကျေဝ်ဝ် ပ္ဍဲဂၠးကဝ်ဏံရ ညးဂၠးကဝ်တံ မၚ်ချူမံၚ် ဝၚ်ကောန်ဂကူ နွံကဵုအခေါၚ်အရာ ဇၞော်ကဵုဇြဟတ်ရ။
ကမၠောန်ဂကူဂှ် ဒှ်ကမၠောန်ကေတ်ဍုၚ်ရ၊ ဝါဗ္ၚကောန်ပၞာန်ဂှ် ပေါဲဗတိုက်ရ၊ ကမၠောန်ကၠောန်ဝါတ်အိုတ် ပ္ဍဲ ဂကူဂှ် ဒှ်ကမၠောန်ကေတ်ဍုၚ်ရ၊ အဓိကဇြဟတ်ကောန်ဂကူဇကု ကောံကဠောံညးသာရေၚ်သ္ကံ ပ္ဍဲအရာ ကမၠောန် ကေတ်ဍုၚ်ဂှ် ညိဟွံဇြိုၚ်စိုတ် ဒးစိုပ်တိုၚ်ပ္ကဴဍာံဍာံရောၚ်။
အကာဲအရာတ္ၚဲဏံ သၞတံ ဂွံတဲကေတ်တဲ ဂွံဇိုၚ်ကေတ်ဇိုၚ် ဍေံမၚ်ၚိတ်ကမၠက်မံၚ် ဂကူပိုဲဂျိုၚ်ဂျိုၚ်ဏောဝ်၊ စိုပ်ကၠုၚ်အခိၚ်ကာလတ္ၚဲဏံ ဇၟာပ်မန်တံ ဒးရပ်လဝ်စိုတ်တၠထေက်ရ၊ မအရေဝ်တၠအဝဵုတံ ပၠုပ်မံၚ်ကတောဝ် လ္တူပၠန်ဂတးကောန်ဂကူကောန်ဍုၚ်အရေၚ်ဂှ် မအရေဝ်ဍေံ ဟီုမံၚ်ကၠးကၠး ဍေံတံဂှ် ရပ်လဝ်စိုတ်ဓါတ် “ဓဝ်ပၞာန် စိုတ်ဒမၠ” ဂကူမန်ပိုဲတံ ထေက်ကဵုဒးပသတိဇၞော်ဇၞော်ရောၚ်။
ယွံ မန် ကောန်စဴတၠဍုၚ်မန် အဝဵုမန် အခေါၚ်မန် မၚ်မံၚ်မန်တံရ ဒၟာနူမန် ဇြဟတ်ဟွံဒှ်မွဲ ဇြဟတ်စိုတ်ဓါတ် လညာတ်ပြးဗီုညးမံၚ်ဂွံ ညးမံၚ်အာ ဗီုညးကၠောန်ဂွံ ညးကၠောန်အာ ညးလ္ၚဵုဆာန်ဂကူကဵုပါၚ် ညးလ္ၚဵုလုပ် ယိုက်ဂၠေၚ်တာလျိုၚ်ဂကူ နကဵုဇြဟတ် ကာယ (လုပ်တဴမံၚ်ပေါဲဗတိုက်) ညးဍုၚ်ကွာန်မန် (ကွာန်မန်ဍုၚ်ကွာန်လ္ၚဵု) ဆာန်တဴမံၚ်ဗော် ဆာန်တဴမံၚ်ဂကောံပၠန်ဂတး သၟာကမၠောန် တၠပညာ ညးဍုၚ်ကွာန်မန်လ္ၚဵု ပူဗိုၚ်မံၚ်ဗော် ပူဗိုၚ်မံၚ်ဂကောံပၠန်ဂတး ထံက်ပၚ်မံၚ်အရာဝတ္ထုနာနာသာ် ဂၠိုၚ်ကဵုဂိတုသၞာံ သွဟ်ဍာံ မိမတၠပညာ ခမဳသၚ်တံ ဟွံဆဵုဏီဂှ်ရ တိုၚ်ပ္ကဴဘဝဂကူပိုဲ ဒးလ္ဇုဲမံၚ်အကြာပ္ၚံက် သံၚ်သာရောၚ်။
က္လေၚ်သ္ၚဳဂၠိပ်ရံၚ် တိုၚ်ပ္ကဴဘဝဂကူပိုဲ မုဟိုတ်ဂွံလ္ဇုဲလ္ဇရော?
◼ ကောန်ဂကူပိုဲ ဇြဟတ် ဟွံဒှ်မွဲ
◼ ပွမလွဳလဝ်စိုတ် အတ္တပူဂဵု ဂၠိုၚ်အာ
◼ ကသပ်လညာတ် ဟွံဒှ်မွဲရမျာၚ်
◼ ပူဂဵု ချူမံၚ်ဝၚ် ပ္ဍဲဂကူ ခိုဟ်ခိုဟ်အောန်
◼ မန်တံဟီုပ္တိုန်စ ဂကူညးတၞဟ်ဂၠိုၚ် ဂကူဇကုမ္ဂး အထေၚ်သောဲ
◼ ပရေၚ်ထံက်ဂလာန် ဂကူဇကု ကဵုဇကုအောန်
◼ မန်တံပြိုၚ် ယၟုလ္တူလပှ်ကျာ သၟိၚ်အိန်ရဂွံဏာယၟု
ပ္ဍဲဂကူပိုဲတံ ထေက်ကဵုဒးဂၠာဲသွဟ် လညာတ်ဍာံဂွံရ၊ လ္ပဇမၠိၚ်မံၚ် ဘဝဍိက်အခိၚ်မဂျိုၚ်တဴမံၚ်ညိ၊ မုဟိုတ် လက္ချန်ကွာ် ပ္ဍဲဂကူပိုဲ ဂွံပြးရော ထေက်ကဵုဒးချပ်အိုတ်ရ၊ တ္ၚဲဏံ လက္ချန်ဂကူပိုဲ အေဲဇြမံၚ်ဂှ် ညးအဲဒးချူပယျေဝ် တာလျိုၚ်နွံမံၚ် ဇၟာပ်ညးအဲရောၚ်။
အပ္ဍဲဂကူပိုဲ ၜိုန်ရဗော်ဂၠိုၚ် ပၠန်ဂတးဂၠိုၚ် မွဲလညာတ် မွဲဂၠံတရဴ ၜိုန်ဟွံဒှ်တဴကီုလေဝ် တိုၚ်ပ္ကဴဂကူဂှ် တုပ်ပ်ရ၊ ဂကောံမွဲမံက်ကၠုၚ် ဂကောံဇြဟတ်ဇၞော်တဴမံၚ်လၟိုန် မၚ်ပ္ဍဵုပ္ဍိုက် မၚ်ၚိတ်ထောံဂျိုၚ်ၚ်ဂှ် ဒှ်ဟွံထေက် အလုံပၠန်ဂတး မံက်မံၚ်ပ္ဍဲဂကူပိုဲဂှ် မံၚ်အာသၟဝ်ပၠတရဴ ကလၚ်ရမျာၚ်ညးဍုၚ်ကွာန်တံဖအိုတ်ရ၊ ပူဂဵုလ္ၚဵု ဟွံညာတ်သာ်ဏံလေဝ်နွံ မၚ်ရပ်မံၚ်ဇိုၚ် မွဲဂကောံကဵုမွဲဂကောံဂှ် ဂၠိုၚ်နူ ဒးပ္တိတ်ကသပ် ဝေၚ်ဗျူဟာပၞာန်မွဲမွဲပေါဲဏီ ဣဏံလေဝ် ဝါဒပူဂဵု ဒးလဝ်ကၠာ်ဗဵုသ္ကဲ မိက်ဂွံသ္ဂးရ။
◼ ကလၚ်အရေဝ်သၞဂှ် ဇြဟတ်ကောန်ဂကူဇကုပြး ဇကုပြး ဂကူလေဝ် ကၠက်ဒှ်မာန်ရောၚ်။
◼ ကလၚ်အရေဝ်ညးကၠောန်ပရေၚ်ဂကူဇေတ်တ်ဂှ် ဇြဟတ်ပၞာန်ဂၠိုၚ် ဇြဟတ်ညးဆာန်ဂကူလေဝ် ဂၠိုၚ်။
သၟတ်လ္ၚဵုတံလေဝ် ဂၠံၚ်ကၠက် စိုတ်ဆာန်ဂကူလေဝ် ဝိုတ်တၠိၚ်အာအိုတ် တီဆ ကၠောန်ကမၠောန် ပရေၚ်ပိုန်ဒြပ် ဗပေၚ်အာဗုၚ်ဂၞဴ ဒဴအာဍုၚ်ညးသ္အာၚ်ဂှ် ဂၠိုၚ်ရ။ မံၚ်ဍုၚ်ဇကုပၠန်လေဝ် ဒးမံၚ်အာသၟဝ် သကေံတဲညး စိုပ်အာဍုၚ်သ္အာၚ်ပၠန်လေဝ် ဒးမံၚ်အာသၟဝ်တဲညး က္လေၚ်သ္ၚဳဂၠိပ်ရံၚ်ဘဝဇကု ၜိုန်ဒှ် မံၚ်ဂကူ နွံကဵုၚုဟ်မး ပ္ဍဲဂၠးကဝ်မွဲကီုလေဝ် ဟွံစွံအဓိက ဒးကၠောန်ပရေၚ်ဂကူဂှ် ညးစိုတ်သာ အဲစိုတ်သာ သီုက္လေၚ်ဖျေံမံၚ်သိက္ခာ ဂကူဇကု ဇကုကဵုဇကုလေဝ် ဓဝ်ညဳသာ်ဟွံမွဲ မွဲဂကောံကဵုမွဲဂကောံလေဝ် မၚ်ရပ်မံၚ်ဇိုၚ် မၚ်ဂၠဟ်မံၚ်ဇိုၚ် ဂကောံအဲမှ အဲကၠောန်ဒး အဲကၠောန်ခိုဟ်အိုတ်၊ ဂကောံမံက်ကၠုၚ်မွဲတှ်ေ အထေၚ်သောဲ စိုတ်ဓါတ်ဂွံစှ်ေ ဂစာန်ပ္တိတ်မံၚ် ဗျူဟာအတ္တ ပ္ဍဲဂကူဇကုကဵုဇကုလေဝ်နွံ။
အဓိက သရောပ်မိက်ဂွံဟီုဂှ် ဂကောံမံက်ကၠုၚ်မွဲမွဲဂှ် ကေတ်အခေါၚ်အရာဂကူ ကေတ်ဗၠးၜးဂကူ ပ္ကောံတဴဇြဟတ် ဒၞါဲသၟတ်တၠပညာတံ ညးစိုထတ်ကၠောန်ပရေင်ဂကူ ညးပူဗိုင်ဂကူ ဒှ်တဴအခေါၚ်အရာစိုတ် ပိုဲမၞိဟ်တံရ (ထ္ကးလညာတ်ညးဍုၚ်ကွာန်ဟွံသေၚ်) မိက်ဂွံသ္ဂးရ။
ဒၞာဲဏံ အဲဒးကၠောန်ပရေၚ်ဂကူတွဵု (ဒေါံဟွံဂွံ) သွက်အဲတှ်ေ စိုတ်လေဝ်ဟွံထတ် အဲကဵုမၞိဟ်ဏံ ဗဵုအာမုက် ပံၚ်အာလေဝ်ဟွံဂွံ စိုတ်ကၠောန်ပရေၚ်ဂကူဂှ် သာတုဲ အောန်ကၠုၚ်သၟးဟွံက သီုစိုတ်ဓါတ်စှ်ေလောန်ကာဲအာနွံဂၠိုၚ်ရ၊ တ္ၚဲဏံ ဗီုညးညးချူမံၚ်ဝၚ်ဂကူ ဟွံတုဲဏီဟာ၊ စိုတ်ဓါတ် စေတနာဇကု ပံက်ဟီုထ္ၜးလဝ်သက်သဳကဵု ညးဂမၠိုၚ်ဂှ် ဒှ်ဓဝ်သစ္စဍာံဇေတ်ယျဟာ၊ ဇကုအဲ အဲကၠောန် ဒး၊ ဗၠေတ်ဂှ် အဲရတီ၊ ညးလဵုလေဝ် ချူမံၚ်ဝၚ် ပ္ဍဲက္ဍဟ်ဂကူ ဟွံတုဲဏီဟာ၊ ဍာ်ၜဳကြုၚ် သ္ပမှၚ်လေဝ် ဇတ်ကှ်အာအိုတ်ယျ၊ ဂၠးတိသုန္ဓရဳလေဝ် သ္ပကၞေဟ်အိုတ်အာယျ၊ အာကာသ (အကး) လေဝ် သ္ပစက္ခူအိုတ်အာယျ “ကှ်ေ” မန်တံ ချပ်လ္ဇုဲ အခေါၚ်မန်တံ ဂြုဲစှ်ေသာ်သာ်ရောၚ်။