နကဵုဇြဟတ်ညးဍုၚ်ကွာန်ကောန်ဍုၚ်အရၚ်တံ ဗ္တိုက်သရိုဟ်သၞောတ်တၠအဝဵုပၞာန်မာန်ဂှ်ရ ဒပ်ပံၚ်ကောံခိုၚ်ဗိုန်မွဲ သ္ဂောံမံက်ကၠုၚ်ဂှ် ဂိုန်ဂ္စာန်ဒၟံၚ်လၟိုန်ရောၚ် ဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) / ဒပ်မန်ရာမည ဟီုကဵုသမ္တီ လလောၚ်ပ္တိတ်ဏာ ပ္ဍဲတ္ၚဲပၠန်ဂတးမန် မရနုက်ကဵု (၇၉) ဝါဏံရ။
ပၠန်ဂတးရပ်လွဟ်ဝွံ က္လေၚ်ကလိဂွံ အခေါၚ်အရာကောန်ဂကူမန်ရောၚ် ပတှေ်ကေတ်ဂှ်ရ နူဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) NMSP-AD / RMA ပံၚ်တောဲလုပ်အာပေဲါဗ္တိုက် မွဲကရောံကုဒပ်ပၠန်ဂတးမန်ဂမၠိုၚ်၊ ဂကောံဇြဟတ်ပၠန်ဂတးတမ်က္ညၚ်ဂမၠိုၚ် ကေုာံ ဂကောံဇြဟတ်ပၠန်ဂတးကောန်ဍုၚ်အရၚ်ဂမၠိုၚ်တံရောၚ်။
ဒပ်ပံၚ်ကောံခိုၚ်ဗိုန်မွဲ သ္ဂောံမံက်ကၠုၚ်ဂှ် ဂိုတ်ဂ္စာန်ဒၟံၚ်ကီုလေဝ် ဟိုတ်နူဂုန်ဖဵုပိုန်ဒြပ် ကေုာံ ဝၚ်အတိက် ဂကောံမွဲမွဲကဵု ဂကောံဇဳ ဟွံတုပ်သၟဟ်ဂှ်ရ ဒးကေတ်အခိၚ် ပရေၚ်သဳကၠဳ ပ္ညဳပ္ညပ်ရောၚ် ချူဓမံက်လဝ် ပ္ဍဲလိက်လလောၚ်ရ။
အခိၚ်လၟုဟ်ဏံလေဝ် မွဲကရောံကဵု ဒပ်ပံၚ်ကောံမဟာမိတ်ဂမၠိုၚ်ဂှ် နူဒပ်မန်ရာမည ရေၚ်တၠုၚ်ဓမံက်ဒၟံၚ်ရုပ်ရဴ အစဳဇန်ချူဓဇက် ချာတာပၠန်ဂတးဍုၚ်မန်ရောၚ် ဂွံတီကေတ်ရ။
အပ္ဍဲကဵုချာတာဂှ်ဝွံ အရာမနွံပၟိက် သွက်ဂွံဒက်ပ္တန် ဗီုပြၚ်ကၟိန်ဍုၚ်ဖေဝ်ဒရေဝ် မဒုၚ်သဇိုၚ် အလုံတွဵုရးဍုၚ်မန်မွဲ ပါလုပ်မာန်ရဂှ်လေဝ် နူဗွိုၚ်ပရေၚ်ဍုၚ်ကွာန်မန်တံ ဟီုဂးသ္ၚဳဂၠိပ်ဒၟံၚ်နွံရ။
နကဵုဗော်ဍုၚ်မန်တၟိ (ဗ္တိုက်သရိုဟ်တၠအဝဵုပၞာန်) / ဒပ်မန်ရာမညဝွံ လညာတ်ဟွံတုပ်သၟဟ် အကြာကောန်ဂကူမွဲစွံတံဂှ် ပဲါထောံလဝ်တုဲ နကဵုဓဝ်ကၠိုဟ်စိုတ်နွံနွံ ဆက်လုပ်အာပေဲါဗ္တိုက် ဗွဲမညဳသၟဟ်ကောံကလောံ သဝ်အလာံကောန်ဂကူမန်ရောၚ်ဂှ်လေဝ် ဟီုဂးလလောၚ်ပ္တိတ်လဝ် ပ္ဍဲတ္ၚဲပၠန်ဂတးမန် မရနုက်ကဵု (၇၉) ဝါ၊ ပ္ဍဲဂိတုအဝ်ဂေတ် စၟတ်တ္ၚဲ (၂၈) ၊ တ္ၚဲဏံရ။