ပ္ဍဲပွိုင်ဍုင်ရးတၞင်သဳဝွံ အခိင်ကရောင်ပၞာန်ကမ္မယှေန်ပၞာန်တံ လုပ်စိုပ်ကၠုင်ဂှ် စကာဒၟံင်ညးဒေသတံ နဒဒှ်ပရေင်စဵုဒၞာပၞာန်ဂှ်ရ ပဲါဒဴဒၟံင်တန်တဴအာ နူကရောင်ပၞာန်ပကီုပရာပ်တံညိဂှ် တမ်ဒပ် စၟတ် (၃) ခရိုင်ဗိက်၊ ဌာနပၞာန်ရးတၞင်သဳ ကေုာံ ကရောင်ပၞာန်ဠေန်ယုင် လလောင်ပ္တိတ်ကဵုလဝ်သတိ ပ္ဍဲဂိတုအဝ်ဂေတ် စၟတ်တ္ၚဲ (၂၅) တုဲကၠုင်ဏံရ။
အတိုင်ကဵုလဝ်သတိဂှ်ရ အပ္ဍဲပွိုင်ဍုင်ရးတၞင်သဳဝွံ အကြာဒပ်ကမ္မယှေန်ပၞာန်ကဵု ဂကောံဒပ်ပံင်ကောံဒပ်ပၠန်ဂတးတံ ဆက်ဒှ်မံင်ပေဲါဗ္တိုက်တုဲ အပ္ဍဲကွာန်ဂမၠိုင်ဂှ် ဂကောံဒပ်ကမ္မယှေန်ပၞာန်တံ ထ္ပက်လုပ်ကၠုင်မံင်ကရောင်ပၞာန်ရ။
ညးဒးဒုင်စကာဒၟံင် နဒဒှ်ပရေင်စဵုဒၞာပၞာန် မွဲကရောံကဵု ကရောင်ပၞာန် ဒပ်ကမ္မယှေန်ပၞာန်တံဂှ်ဝွံ ကောန်ကွာန်ဓမ္မတာလ္ၚဵုတံ ပါလုပ်မံင်တုဲ ညးကဵုပရိုင်ကုဒပ်ပၞာန်တံ သာတုဲဂၠိုင်မံင်ရောင် ညးတာလျိုင်တမ်ဒပ် စၟတ် (၂) ၊ ခရိုင်ဗိက်မွဲတၠဂှ် ဟီုရ။
“ဗွဲမဂၠိုင်ဂှ် ဒှ်မံင်ညးကဵုပရိုင်ကုဒပ်ပၞာန်ရ။ ဍေံတံ ကဵုထ္ၜးဂၠံင်ရ။ ပိုဲတံလေဝ် ကၠောန်သ္ပဝါတ်မံင်ရ။ ဟိုတ်ဂှ်ရ ညးဍုင်ကွာန်တံဂှ် ဍေံတံ ထ္ပက်ကၠုင်ကရောင်ပၞာန်တှ်ေ ပဲါဒဴအာ ဒၞာဲဗၠးဘဲညိ။ ဒှ်ကၠုင်ပေဲါဗ္တိုက်တှ်ေလေဝ် ညံင်ဟွံဂွံဒးဘဲဇီုကပိုက်” သာ်ဝွံ ညးတာလျိုင်ဂှ် ဟီုရ။
အခိင်ဒးဒုင်ရပ်ကော်ဏာ ဇရေင်ဒပ်ကမ္မယှေန်ပၞာန်ဂှ် ယဝ်ဒှ်ကၠုင်ပေဲါဗ္တိုက်ၜါလ္ပာ်မ္ဂး ကောန်ညးဍုင်ကွာန်တံ ဒးဘဲဇီုကပိုက်ချိုတ်ဂျိုင်မာန်ဂှ်ရ ဒးပဲါဒဴဒၟံင်တန်တဴအာ နူကရောင်ပၞာန်ဒပ်ကမ္မယှေန်တံရောင် ဂးရ။
ဟိုတ်ဂှ်ရ ဟွံကလင်တင်ကဵုသတိမွဲသာ် ကောန်ကွာန်တံ ယဝ်ဒးကၠုင်ဘဲဝပ်ချိုတ်ဂျိုင် အပ္ဍဲပေဲါဗ္တိုက်မ္ဂး ဆေင်စပ်ကဵုဇကုဇကုဟေင်ရဂှ်လေဝ် ထပ်ကဵုလဝ်သတိရ။
ညးတာလျိုင်တမ်ဒပ် စၟတ် (၃) ၊ ခရိုင်ဗိက်မွဲတၠဂှ် “အပ္ဍဲပွိုင်ဍုင်ရးတၞင်သဳဂှ် လ္ပာ်သၞတံ ထ္ပက်မံင်ကရောင်ပၞာန် ဒၞာဲဗွဲမဂၠိုင်ရ။ ဇြဟတ်ဂှ်တှ်ေ ဟီုချိုတ်ချိုတ်ပၠိုတ်ပၠိုတ် ဟွံဂွံဏီပုဟ်။ အခိင်လၟုဟ်ဏံ လ္ပာ်ဒပ်ပၞာန်တံ ဒှ်ပေဲါဗ္တိုက်တုဲ ဒးဂိ က္လေင်ဆုတ်အာရ။ လွဟ်ဇၞော်ဂှ်လေဝ် ပန်မံင်အဆက်ဆက်ရ။ နူတနေံဏံ ပန်ဏာဗွဲမဂၠိုင်ရ” သာ်ဝွံ ညးဟီုရ။
အပ္ဍဲပေဲါဗ္တိုက်ၜါလ္ပာ်ဂှ်ဝွံ လ္ပာ်ဒပ်ပၞာန်တံ ဒးဂိဒၟံင်ဂှ်ရ အခိင်လၟုဟ်ဏံ ကရောင်ပၞာန်ဂမၠိုင် က္လေင်ဆုတ်အာတုဲ ပန်မံင်ကဵုလွဟ်ဇၞော်ဆဆဵု အဆက်ဆက်ကီုရ။
ပ္ဍဲဂိတုအဝ်ဂေတ် စၟတ်တ္ၚဲ (၂၄) တုဲကၠုင်ဏံဝွံ အခိင်နူဂယး ၜိုတ် (၉) နာဍဳဂှ် ကတဵုဒှ်ပေဲါဗ္တိုက်ၜါလ္ပာ် ကြပ်ကွာန် (မီးလောင်ကုန်း၊ ဘန်လော) ဂှ်မွဲဝါ၊ အခိင် (၁၂) နာဍဳလ္ဒောဝ်တ္ၚဲဂှ် ကြပ်ကွာန် (ဘန်လောလမ်းဆုံ) မွဲဝါ၊ အခိင်သဝ်တ္ၚဲ (၃) နာဍဳဂှ် ကြပ်ဘာဗ္တောန်လိက် (ကွျဲထိန်းကုန်း) မွဲဝါပၠန်တုဲ အပ္ဍဲမွဲတ္ၚဲဓဝ်ဂှ် ကတဵုဒှ်အာ ပေဲါဗ္တိုက်ၜါလ္ပာ် စဵုကဵု (၃) ဝါနွံရောင် ဂွံတီကေတ်ရ။
အပ္ဍဲပွိုင်ဍုင်ရးတၞင်သဳဝွံ ဟိုတ်နူအကာဲအရာ ပရေင်ပၞာန်လၟုဟ်ဏံတုဲ နကဵုကောန်ညးဍုင်ကွာန် မၞုံအပ္ဍဲကွာန်ဂမၠိုင်တံ ပသတိကဵု ဒၞာဲဒှ်ပေဲါဗ္တိုက်မာန်ဂှ်ကဵု ပရေင်အာကၠုင်ကရောင်ပၞာန်တံတုဲ ဒစးဒုင်ပဲါဒဴဒၟံင်တန်တဴအာ သွက်ပရေင်ဂီုကၠီုညိဂှ် လ္ပာ်ဂကောံဒပ်ပၠန်ဂတးတံ ဟီုဂးဖ္တိုက်ဖၟောဝ်လဝ်ရ။