စနူဂိတုအဝ်ဂါတ်မံက်ဏအ်ဂှ် ကပေါတ်ဖျာလုပ်ပါၚ်ဖဴနာနာ မပ္တံကဵုသ္ရု၊ ကၠေင်၊ မြေက်၊ ၜဵု၊ ကသိုန်တအ် င္ရုဟ်သၠုၚ်တိုန်ကၠုင်ဖအိုတ်တုဲ သွက်သၟာကမၠောန်စလိင်တ္ရဲ ကၠောန်မွဲတ္ၚဲ စမွဲတ္ၚဲ နွံတန်တဴဒၟံင် ပ္ဍဲဒေသပယျဵုဍုၚ်ကျာ်ပိတအ် ဒးဆဵုဂဗဒၟံၚ်ကဵု ပရေၚ်ခက်ခုဲစသုၚ်မံၚ်စံၚ်နွံရောၚ် ဂွံတီကေတ်ရ။
င္ရုဟ်ကပေါတ်ဖျာလုပ်ပါင်ဖဴတအ်ဂှ်စက္ဍင်တိုန်မံင် နူအဒေါဝ်ဂိတုဂျူလာၚ်တေံရတုဲ ကာလစိုပ်ဂိတုအဝ်ဂါတ်လ္ပာ်မံက်ဗက်ဟွံဂတာပ် င္ရုဟ်ဖျာဂမၠိုင် ထပ်သၠာ်တိုန်အာမွဲတဲဓဝ်ပၠန်ရောင် ညးဒေသဍုင်ကျာ်ပိမွဲတၠ ဟီုရ။
“စိုပ်အခိၚ်ဏံတှ်ေ ဒးဆဵုဂဗဒၟံၚ်ဇၟာပ်သၞာံရ၊ ဟိုတ်ပရောပရာဍေံဂှ်တှ်ေ မွဲဒမြိပ်ဂၠံၚ်ဍာန်ကွဳစက်ဍုၚ်ကျာ်ပိ အာကၠုၚ်တံဂှ် စိုပ်အခိၚ်ကသီုတှ်ေ ဂၠံၚ်ဍာန်ပရေံတုဲ တရဴအာမွဲတ္ၚဲစိုပ်ဂှ် ဒးတိက်အာအကြာဂၠံၚ်ဍာန် ၜါပိတ္ၚဲနွံတုဲ ခရိတ်ဂၠံၚ်ဍာန်အိုတ်ဂၠိုၚ်ဂှ်ရ ဒးသၠုၚ်တိုန်လဝ် င္ရုဟ်ကပေါတ်လုပ်ပါၚ်ဖဴဖဴနာနာရောၚ်” သာ်ဝွံ ညးဆက်ဟီုရ။
ပြဟ်ဟ်ဏံ မပ္တံကဵု သ္ၚုကီု၊ ကသိုန်ဗ္ကေတ်၊ ကသိုန်ပတာၚ်၊ မြေက်၊ ကၠေၚ်၊ ခရံက်၊ ဖျုန်ကၠိက်၊ ဖျုန်စာၚ်၊ ဖျုန်ၚုဲ၊ ဖျုန်က ကပေါတ်ဇွောံမလုပ်ပါၚ်ဖဴနာနာဂှ် ၚုဟ်က္ဍင်တိုန်အာဒၟံၚ်ဖအိုတ်ရောၚ် ဂးရ။
င္ရုဟ်ကသိုန်ဗ္ကေတ်မွဲကဳလိုဝ် င္ရုဟ်နွံမံင် နူ (၂၅) ၝာတ်ဂှ် သၠာ်တိုန်အာ (၃၅) ၝာတ်၊ ကသီုဗ္တာၚ် မွဲကဳလိုဝ် (၆၀) ၝာတ်ဂှ် ဒှ်အာ (၈၀) ၝာတ်၊ မြေက်မွဲကဳလိုဝ် နူ (၉၀) ၝာတ်ဂှ် ဒှ်အာ (၁၂၀) ၝာတ်တုဲ ကပေါတ်သောဲဗြောဲတၞဟ်တအ်လေဝ် ၚုဟ်သၠုၚ်ဗက်တိုန်ကီုနွံရ။
တုဲပၠန် င္ရုဟ်ဖျုန်ကၠိက် မွဲကဳလိုဝ် နူ (၁၈၀) ၝာတ်ဂှ် လၟုဟ်ဒှ်အာ (၂၂၀) ၝာတ်၊ ဖျုန်စာၚ် နူမွဲကဳလိုဝ် (၁၀၀) ၝာတ်ဂှ် ဒှ်အာ (၁၃၀) ၝာတ်၊ ဖျုန်စာၚ်ကွာန် နူမွဲကဳလိုဝ် (၂၀၀) ၝာတ်ဂှ် ဒှ်အာ (၃၀၀) ၝာတ်၊ ဖျုန်က၊ ဖျုန်ၚုဲတံဂှ်လေဝ် တန်တဴကဵုက၊ ၚုဲတုဲ ၚုဟ်သၠုၚ်တိုန်ဒၟံၚ်ဖအိုတ်ကီုရောၚ် ဂွံတီကေတ်ရ။
“ခရိတ်ၚုဟ်ကမၠောန်ဂှ် နွံအတိုၚ်တြေံရ၊ ခရိတ်စသုၚ်မံၚ်စံၚ်ဂှ်ရ ပဵုတိုန်ဒၟံၚ်ဖအိုတ် ခယျကေတ်တှ်ေ ပ္ဍဲပွိုၚ်မွဲၜါဂိတုဏံ ဒးကဵုၚုဟ်ဒၞာဲလိၚ်သ္ၚိကဵု စဂှ် ပြေပြံၚ်၊ ဂွံပဵု ဂွံပြၚ်ပလံၚ်လှုဲပ္ဍဲကွာန် ဗီုဂိတုတုဲတုဲကၠုၚ်ဂှ် ပလံၚ်ဖျဴဟွံမာန်ရ” သာ်ဝွံ သၟာကမၠောန်ကၠောန်ဒၟံၚ်ကမၠောန် လ္ပာ်ကုန်သြၚ်သေံ ဒေသပယျဵုကျာ်ပိမွဲတၠ ဟီုရ။
ကပေါတ်လုပ်ပါင်ဖဴနာနာ မသွံတြးမံင် လ္တူဍုင်ကျာ်ပိတအ်ဂှ်ဝွံ လုပ်စိုပ်ကၠုင်လဝ်နူကဵုပၞော်ဂၠံင်မတ်မလီုကီု နူလ္ပာ်ဍုင်သေံကီုနွံတုဲ ညးဍုင်ကွာန်လ္တူဍုင်ကျာ်ပိတအ်ဂှ် ရပ်စပ်ရာန်တဴဒၟံင် နကဵုသြန်ၝာတ် အဓိကရောင်။
ပ္ဍဲဒေသပယျဵုသေံ-ဗၟာ ဍုၚ်ကျာ်ပိဂှ် သၟာကမၠောန်ကောန်ဍုၚ်အရၚ် မပ္တံကဵုဂကူမန်၊ ဗၟာ၊ ကရေၚ်၊ ရခေၚ်၊ ဂလာ ဂကူဘသာစုင်လေင် နွံတန်တဴမံင်တုဲ လက္ကရဴဏအ် ဂကူကြုက် မဆက်စပ်ကဵု ကမၠောန်လီဠာန်သြန်အန်လာင် (ကျာဖျ) တအ်လေဝ် လုပ်စိုပ်တန်တဴကၠုင်နွံရောင် ဂွံတီကေတ်ရ။