ပ္ဍဲဒေသကိုန်စဳဇန် ပရေင်ပိုန်ဒြပ်တၟေင်ထဝဲါ၊ အပ္ဍဲပွိုင်ဍုင်ဍာ်ဗု၊ ရးဒေသဇၞော်တၞင်သဳဂှ် အပ္ဍဲပွိုင်ဂိတုဂျူလာင်တုဲကၠုင်ဏံ ဟိုတ်နူပရေင်ပြုပြေင်ပၞာန် ကရောင်ပၞာန်ကမ္မယှေန်ပၞာန်တုဲ ကောန်ကွာန် ဒးဒုင်ဂစိုတ် (၆) တၠ၊ ဒးဒုင်ရပ်လဝ် (၁၃) တၠနွံရောင် နူဂကောံ Dawei SEZ Watch လလောင်ပ္တိတ်လဝ် ပ္ဍဲဂိတုအဝ်ဂေတ် စၟတ်တ္ၚဲ (၂) ဏံရ။
ကိုန်စဳဇန်ပရေင်ပိုန်ဒြပ်တၟေင်ထဝဲါ သ္ဂောံက္လေင်ဓမံက်ရုပ်ရဴမာန်ဂှ်မ္ဂး နူတမ်ဂိတုဂျောန်တေံရ သွက်ဂွံပသောင်တိဍာ်ဂှ် ဒုသ္ကိုပ်ပၞာန်ဇၞော်ကျဝ်ဇြဲလေန် ကဵုလဝ်စၞောန်တုဲ စနူဂိတုဂျူလာင် (၉) တုဲကၠုင်ဏံဂှ် ကရောင်ပၞာန်ဇြဟတ်ကြပ် (၁၀၀၀) တၠတံ လုပ်စိုပ်ချဳဓရာင်ကၠုင် အပ္ဍဲတိဍာ်ကိုန်စဳဇန်ဂှ်ရ။
ကရောင်ပၞာန်ကမ္မယှေန်ပၞာန် မချဳဓရာင်ပါ်လဝ်ဂၠံင်ဍာန်နာနာဂှ် အပ္ဍဲဂိတုဂျူလာင်တုဲကၠုင်ဏံ ဂစိုတ်လဝ်ကောန်ကွာန် (၆) တၠ သီုပါလုပ်ကောန်ၚာ်အာယုက်ဟွံပေင် (၁) တၠကဵု ခၟဳသင်မွဲဇကုတုဲ ညးဒေသဗွဲမဂၠိုင်တံလေဝ် ဒးပဲါဒဴဒၟံင်ရောင် ကောန်ဂကောံ Dawei SEZ Watch ဟေတု ဟီုရ။
“ထ္ၜးဟိုတ် ကဵုဂီုကၠီု ကုကိုန်စဳဇန်တုဲ ထ္ပက်မံင်ကရောင်ပၞာန်ကီုလေဝ် နတဲဂှ် ရပ်ဂစိုတ်မံင် ကောန်ကွာန်တံ၊ သ္ၚိဒၟံင်တံဂှ်လေဝ် ဗက်ပလီုပလာ်စံင်မံင်ရ။ ဟိုတ်နူကရောင်ပၞာန်တုဲ ညးဒေသဗွဲမဂၠိုင် ပဲါဒဴမံင်ရ။ တုဲတှ်ေ ကမၠောန်ဂယိုင်လမျီုတံလေဝ် ဒးဒေံါဇူလဝ်ရ” သာ်ဝွံ ညးဟီုရ။
ပ္ဍဲကဵုကွာန်ကရောင်ပၞာန်လုပ်စိုပ်ကၠုင်ဂှ်ဝွံ ညးဒေသတံ ဒးဒုင်ဂစိုတ်ကီု၊ ဒးဒုင်ရပ်စကာ နဒဒှ်မၞိဟ်ဒုင်ဒၞာပၞာန်ကီု၊ ဒးဒုင်စံင်ပလီုပလာ် သ္ၚိဒၟံင်ကီု၊ ဒးဒုင်ကၠတ်ဂၠံက်ဒြပ်ကသပ်ကီု မပ္တံပရေင်ဖံက်ပကဝ်အခေါင်အရာမၞိဟ်ဂမၠိုင် ကတဵုဒှ်မံင်အဆက်ဆက်ရောင် ဂးရ။
ဟိုတ်နူပရေင်ထ္ပက်ကရောင်ပၞာန် အပ္ဍဲဂိတုဂျူလာင်ဂှ်ရ ညးဒေသ နူကဵုကွာန် ၜိုတ် (၄၀) ကွာန် မၞုံပ္ဍဲဒေသပရေင်ပိုန်ဒြပ်တၟေင်ထဝဲါဂှ် ဒးပဲါဒဴဘဲပၞာန်ရ။ ညးဒေသနူကဵုကွာန်ဂမၠိုင်ဂှ်ဝွံ ဒးဂြိပ်ပဲါဒဴအာ ဒၞာဲဒေသဗၠးဘဲတုဲ ကွာန်လ္ၚဵုတံဂှ် လုပ်စိုပ်ထ္ပက်မံင်ကရောင်ပၞာန် ဂၠိုင်နူ (၁) ဝါဏီရ။
အခိင်လၟုဟ်ဏံဝွံ ကရောင်ပၞာန်ကမ္မယှေန်ပၞာန်မွဲကရောင် ချဳဓရာင် ပၞုက်(ဂေတ်)မံင်ကင် ပ္ဍဲကြပ်ကွာန်ဍုင်တြေံတုဲ သၟတ် ဂွံဆဵုကေတ်ပ္ဍဲဂၠံင်တံဂှ် ရပ်စပ်ကီု၊ ဂစိုတ်ကီု ဆက်ကၠောန်သ္ပမံင်ရောင် နူတမ်ရိုဟ်ပရိုင်ပၠန်ဂတး အပ္ဍဲဒေသမွဲတၠ ဟီုကဵုဌာန်ပရိုင်ဗၠးၜးမန် IMNA ရ။
“ထ္ပက်ကၠုင်ကရောင်ပၞာန် လ္ပာ်ဍုင်တြေံတုဲ ဆဵုမၞိဟ်တှ်ေ ပန်ဂစိုတ်၊ ဟွံသေင်တှ်ေ ရပ်၊ ဂျူလာင် (၂၈) ဂှ်လေဝ် ပန်ဂစိုတ်ထောံ သၟတ်မွဲတၠရ။ ပ္ဍဲပွဳဗွိုင်ဒေသနဗုလာဂှ်လေဝ် သွက်ဂွံဍဵုဍိုက်ညးဍုင်ကွာန်မာန်ဂှ် တြးလဝ်ဇြဟတ်ဒပ် ကြပ် (၁၀၀၀) ရ” သာ်ဝွံ ညးဟီုရ။
လၟေင်ကမၠောန်ဓမံက်ရုပ်ရဴ ကိုန်အစဳဇန် အလဵုအသဳဒပ်ပၞာန်ခါန်ကၞက်ဏံဝွံ ပ္ဍဲဗလးတိမ္ဂး သကဵုဇီုကပိုက်အာ ကုပရေင်ဂီုကၠီု၊ ပရေင်ပိုန်ဒြပ်ဘဝမၞိဟ် ကေုာံ ဆေင်စပ်ကဵု အခေါင်အရာမၞိဟ် သွက်ညးဍုင်ကွာန်/ညးဒေသဂမၠိုင်ရောင် ပ္ဍဲကဵုလိက်ဒုင်စဳရေင် ဂကောံ Dawei SEZ Watch ဂှ် ဟီုဂးသ္ၚဳဂၠိပ်လဝ်ရ။