ပ္ဍဲပွိုင်ဍုင်ရေဝ်၊ တွဵုရးဍုင်မန်ဝွံ ကုညးတြုံစဴကၠုင်နူလ္ဂုင်မွဲတၠဂှ် ဂွံဆဵုကေတ် စၟယဲဂၞဴလီုဂၞဴအာသ္ကာတ်မြဟ်ရဂှ် ဂွံတီကေတ် နူညးစုက်လုက်ကဵု ဌာနက္ဍိုက်က္ဍိုပ်ပရေင်ထတ်ယုက်ပွိုင်ဍုင်ရ။
ညးတြုံအာယုက် (၃၄) သၞာံ၊ ဒၟံင်တန်တဴမံင် ပ္ဍဲအရာပ်သဳရိခေမာ၊ ဍုင်ရေဝ်ဂှ်ဝွံ စနူဂိတုအဝ်ဂေတ် (၁၄) ဏံတုဲ ဂၞဴအာမံင်မွဲနှေံမွဲနှေံဂှ်ရ အာစိုပ်ထ္ၜး ပ္ဍဲရုင်ဂဥုဲဇၞော်ညးဍုင်ကွာန်၊ ခရိုင်ရေဝ်ရ။
ကာလစမ်ၜတ်စၟဳစၟတ် ညးတြုံဂၞဴအာမံင် မွဲနှေံနှေံဂှ်မ္ဂး ဂွံဆဵုကေတ် ကတဵုဒှ်ဒၟံင်ယဲ ဂၞဴလီုဂၞဴအာ Cholera test kit positive ရောင် ဂးရ။
အခိင်လၟုဟ်ဏံဝွံ ညးတြုံဂွံဆဵုကေတ်လဝ် စၟယဲဂၞဴလီုဂၞဴအာသ္ကာတ်မြဟ်ဂှ် ဒုင်လွဳလွတ်မံင်ဖိုဟ်တုဲ ပရေင်ထတ်ယုက်ခိုဟ်ကၠုင်မံင်ဣရဂှ် ညးစုက်လုက်ကဵု ဌာနက္ဍိုက်က္ဍိုပ်ပရေင်ထတ်ယုက်ပွိုင်ဍုင်မွဲတၠ ဟီုရ။
ယင်ညးတြုံဂှ်ဝွံ ပ္ဍဲဂိတုအဝ်ဂေတ် စၟတ်တ္ၚဲ (၇) တုဲကၠုင်ဏံဂှ် အာစိုပ်လဝ်ဍုင်လ္ဂုင်တုဲ ပ္ဍဲဂိတုအဝ်ဂေတ် (၁၀) ဂှ် က္လေင်စဴစိုပ်ကၠုင်ဍုင်ရေဝ် မွဲကရောံကဵုမိဿဟာဲ (၂) တၠကီု ဂွံတီကေတ်ရ။
ညးက္လေင်စဴကၠုင်နူလ္ဂုင် (၂) တၠ မွဲကရောံကဵု ညးဆဵုစၟယဲဂၞဴလီုဂၞဴအာသ္ကာတ်မြဟ်ဂှ်လေဝ် စွံလဝ် ပ္ဍဲ Quarantine တုဲ မင်ရံင်ဒၟံင်ရောင် ဂးရ။
တုဲပၠန် စၟယဲဂၞဴလီုဂၞဴအာသ္ကာတ်မြဟ် ညံင်ဟွံဂွံကၠောံထၞာန်ဂှ်မ္ဂး ပ္ဍဲသ္ၚိဒၟံင်ညးနွံစၟယဲဂှ်ကဵု ပွဳဗွိုင်တံဂှ် နူဂကောံဟံင်ပြာ်ရီုဗင်မၞိဟ် ကေုာံ ဂကောံအုပ်ဓုပ်အရာပ်၊ ဂကောံထတ်ယုက်ပွိုင်ဍုင်တံ ဂစတ်လဝ်ကဵု ဂဥုဲကလိုဝ်ရေန်ကီုရောင် ဂွံတီကေတ်ရ။
တုပ်သာ်ဂှ်ကီု ပ္ဍဲဂိတုအဝ်ဂေတ် စၟတ်တ္ၚဲ (၁၃) တုဲကၠုင်ဏံဂှ်လေဝ် ညးဗြဴ ဒေသဍုင်ကျာ်ခၟဳ၊ စဴကၠုင်နူလ္ဂုင်မွဲတၠဂှ် ဂွံဆဵုကေတ် စၟယဲဂၞဴလီုဂၞဴအာသ္ကာတ်မြဟ်တုဲ ဒုင်လွဳလွတ်ဒၟံင်ကီုရ။