အခိင်ကာလ ပရေင်ဍုင်ကွာန်ဒှ်ဒၟံင်ပၞာန်ဏံဂှ် တၠကမၠောန်ဟိုဝ်တေဝ်ကၟာတ်လဝ်တအ်ကီု၊ ဒၞာဲဝေင်ကၟာဝေင်ဍာ်တအ်ကီု သီုဖအိုတ်ဂှ် ဒးဒုင်ကဵုဒြဟတ်ဓရိုဟ်ညံင်ဂွံပံက်တုဲ တၠကမၠောန်တအ် ဒှ်ဒၟံင်ပရေင်ဆိုအ်ဗနွံရောင် တၠကမၠောန်လ္ၚဵု ဟီုကၠုင်နွံရ။
တၠကမၠောန်ဟိုဝ်တေဝ်ကၟာတ်လဝ်တအ်ဂှ်ကီု၊ ဒၞာဲဝေင်ကၟာဝေင်ဍာ်နာနာတအ်ဂှ်ကီု အကြာဂိတုဂတဏံ ညံင်ဂွံပံက်ဂှ် နူကဵုအလဵုအသဳတၠအဝဵုတအ် ကဵုလဝ်စၞောန်တုဲ နကဵုအကာဲအရာလၟုဟ်ဏံ ဒးပံက်ကမၠောန်တအ်မ္ဂး သွက်ဂွံကျဗြမ်ပၠန်ရနွံရောင် တၠကမၠောန်ပံက်လဝ်ကၟာဝေင်ဍာ် ဗွိုင်ဍုင်မတ်မလီုမွဲတၠ ဟီုရ။
“ဒၟာနူပရေင်ဍုင်ကွာန် ပေါဲပၞာန်ကတဵုဒှ်မံင်ဂှ်ရ မၞိဟ်တအ်အာကၠုင်အောန် တၠကမၠောန်တအ် တော်ဟွံကိတ်တုဲ ကၟာတ်လဝ်ဟိုဝ်တေဝ်တအ်ဂှ်၊ ဒၞာဲဝေင် ကၟာဝေင်ဍာ်တအ်ဂှ် ဗွဲမဂၠိုင်လေဝ်၊ လၟုဟ်ဍေံတအ် (တၠအဝဵုအလဵုအသဳ) ကဵုဒြဟတ်ဓရိုဟ် ဒးပံက်တွဵုဂးတှ်ေ ပလေဝ်ဂှ်ပလေဝ်လဝ်ကီုလေဝ် ပံက်တုဲလေဝ် မၞိဟ်အာကၠုင်ဟွံမွဲတှ်ေ ကျကမၠောန်ဂှ်ပၠန်ရ” သာ်ဝွံ ညးဟီုရ။
သ္ပဟိုတ်ကဵု အကာဲအရာပရေင်ဍုင်ကွာန်၊ ပရေင်ပၞာန်ဂှ်တုဲ ဟိုဝ်တေဝ်လ္ၚဵုဂှ် မၞိဟ်အာကၠုင်ဇူဒီုဟွံမွဲတုဲ သွံထောံလေဝ်နွံ၊ လ္ၚဵုဂှ် ပြံင်သၠာဲပံက်ကၠုင်ကမၠောန်တၞဟ်လေဝ်နွံ၊ တုပ်သာ်ဂှ်ကီု ဒၞာဲဝေင်ဗွဲမဂၠိုင်တအ်ဂှ် ဟိုတ်နူတော်ဟွံကိတ်တုဲ တၠကမၠောန်တအ် သွံထောံလေဝ်နွံ၊ ပြံင်သၠာဲကမၠောန်တဵုတၞံသတ်ဆုလေဝ် နွံရ။
“ရဲအဖဝ်ပိုဲ ကၠောန်လဝ်ဒၞာဲဝေင် ကၟာဍာ်ဝေင်လ္ၚဵုဂှ် သက်ပဟွံမွဲတုဲတှ်ေ ၜိုတ်သွံဂွံဂှ် သွံထောံဂှ်ညိ၊ တိသၠာတ်သှ်ေနူဂှ်ဂှ် ကလေင်တဵုထောံ တၞံဒူရေန်၊ တၞံဗဗုင်၊ သ္ပကၠအ်သတ်ဆု၊ သက်ဂတးဟွံမွဲရတှ်ေ ဒးပြံင်ကမၠောန်၊ အဵုရဲဂတာပ်အာတဲဗီုဂှ်လေဝ် ဟွံပရေံ၊ ရဲဒုင်ခဳလဝ် ဒြပ်ဇကုလေဝ်ဟွံသွံလဝ် ဟွံပြံင်သၠာဲလဝ်ကမၠောန်ပုဟ်၊ စွံလဝ်အတိုင်ဂှ်တှ်ေ လၟုဟ် ဍေံကဵုပလေဝ်၊ ပလေဝ်တုဲတှ်ေ ညံင်ဂွံပံက်ဂှ် ဍေံကဵုလဝ်စၞောန် ကျာတ်မံင်အိုတ်ဖိုဟ်၊ ဟွံပံက်တှ်ေ ဍေံသ္ပဒုဟ်” သာ်ဝွံ မၞိဟ်ဂှ် ဆက်ဟီုထ္ၜးရ။
သ္ပဟိုတ်နူကဵု အကာဲအရာပရေင်ဍုင်ကွာန်၊ ပရေင်ပၞာန်ဂှ်တုဲ ရုင်ကမၠောန်လတူဍုင်လ္ၚဵုတအ်ကီု၊ ဟိုဝ်တေဝ်ဂမၠိုင်တအ်ကီု၊ ဒၞာဲဝေင် ဒၞာဲကၟာဍာ်ဗွဲမဂၠိုင်တအ်ကီုဂှ် ဗွဲကြဴနူကဵု ပၞာန်သီအဝဵု သၞာံ (၂၀၂၁) တေံတုဲ ဗွဲမဂၠိုင်ဂှ် ကၟာတ်ဒေါံဇူလဝ်နွံဂၠိုင်ရ။