ဂိတုဂျူအဝ် စၟတ်တ္ၚဲ ၁၃ နူတနေံဏအ်ဝွံ ပ္ဍဲသၚ်္ခဠၜုရဳ (ဝၚ်က) အရာပ်နံၚ်လုဂှ် ပၞာန်မၚ်ဂီုကၠီုသေံ တၞံပကုက်တအ် ရပ်စပ်ဂွံကောန်ဍုၚ်ဗၟာညးကၠတ်လုပ်ဍုၚ်သေံ လၟိဟ် (၅၂) တၠနွံရောၚ် ဂွံတီကေတ်ရ။
နူတနေံဏအ် ၜိုတ်အခိၚ်ဗ္တမ် (၁၁) နာဍဳဂှ်ဝွံ အဃောကၠတ်လုပ်စိုပ် လ္ပါ်ဝၚ်က၊ အရာပ်နံၚ်လု ဂၠံၚ်ဂြိုပ်မွဲဒၞါဲဂှ် ပၞာန်မၚ်ဂီုကၠီုသေံတအ် ရပ်စပ်ညးတအ်တုဲ ပ္ဍဲကဵုဂှ်မ္ဂး ကောန်ဍုၚ်ဗၟာညးကၠတ်လုပ်ဍုၚ်သေံ မၞိဟ်တြုံ ၃၄ တၠကဵု မၞိဟ်ဗြဴ ၁၈ တၠ၊ သီုပါလုပ်ဃံၚ်ထပၠုပ်မၞိဟ်မွဲတၠရ။
ပယျဵုသေံ-ဗၟာ ဒေသကျာ်ပိဏအ်ဝွံ ပ္ဍဲမွဲဒမြိပ်ဂၠံၚ်လုပ်ဍုၚ်သေံ လ္ပါ်ဝၚ်က၊ ထံၚ်ခၞောန်၊ ကမ္မရဳဂှ်မ္ဂး ဒှ်ပၠော်ဂၠံၚ်အဓိကမွဲတုဲ ကောန်ဍုၚ်ဗၟာတအ် သွက်သ္ဂောံလုပ်စိုပ် အာကၠောန်စကမၠောန်ပ္ဍဲဍုၚ်သေံဂှ် နူကဵုဒေသပယျဵုသေံ-ဗၟာ ကျာ်ပိဂှ်မွဲအဆံၚ် အဃောကၠတ်လုပ်ဂှ် ဗၠာဲသၟိၚ်သေံတအ် ရပ်စပ်ဂွံဏာ ညးတအ်ရ။
ကောန်ဍုၚ်ဗၟာတအ်ဂှ်မ္ဂး ဒးကဵုကၠုၚ်စရိတ်ဂၠံၚ် ကုဃံၚ်ထပၠုပ်မၞိဟ်တအ် ညးမွဲတၠမ္ဂး ဩန်သေံ အကြာ ၁၅,၀၀၀ ၝာတ် ကဵု ၂၀,၀၀၀ ၝာတ်နွံကၠုၚ်ရ။
ပြဟ်ဟ်ဏအ်ဝွံ ကောန်ဍုၚ်ဗၟာညးကၠတ်လုပ်ဍုၚ်သေံ (၅၂) တၠတအ်ကဵု ဃံၚ်ထပၠုပ်မၞိဟ်သေံမွဲတၠဂှ် ရပ်ထိၚ်လဝ် ပ္ဍဲကဵုရုၚ်ဗၠာဲသၟိၚ်သေံ သၚ်္ခဠၜုရဳ (ဝၚ်က)ဂှ်တုဲ ကောန်ဍုၚ်ဗၟာညးကၠတ်လုပ်သေံလ္ၚဵုတအ်ဂှ် ပလံၚ်ဏာမံၚ်လ္ပါ်ပယျဵုကအ်သံၚ်တေံလေဝ်နွံ ညးလ္ၚဵုဂှ် ကလေၚ်ပလံၚ်ကိုဟ်မံၚ် လ္ပါ်ကဵုပယျဵုသေံ-ဗၟာ လ္ပါ်ကျာ်ပိဏအ်လေဝ် နွံရ။
အပ္ဍဲပယျဵုသေံ-ဗၟာ လ္ပါ်ကဵုဒေသပယျဵုကျာ်ပိဂှ်ဝွံ ပ္ဍဲဂိတုဂျူအဝ်ဂေတ်ဏအ်သၟးဂှ် ဗၠာဲသၟိၚ်သေံ၊ ဒပ်ပၞာန်မၚ်ဂီုကၠီု ဒေသပယျဵုတအ် ရပ်စပ်ဂွံမံၚ် ကောန်ဍုၚ်မန်ဗၟာညးကၠတ်လုပ်ဍုၚ်သေံတအ် အဆက်က်တုဲ သရောပ်မ္ဂး လၟိဟ်ဗ္ဒါဲ (၂၀၀) တၠပြၚ်ဣရဂှ် ဂွံတီကေတ်ရ။
ဗီုရုပ် – Thai News (ข่าวเด่นภูมิภาคทั่วไทย กาญจนบุรี)