ပ္ဍဲဍုင်ဗြဝတဳ၊ တွဵုရးကရေင်ဂှ် ဗြဲဇၞော်ဂူတုဲ ဍာ်ၜဳ “သောင်းရင်း” သၠုင်တိုန်ကၠုင်ဂှ်ရ ညးဒေသဒၟံင်တန်တဴ ကြပ်ဇိုင်ၜဳကဵု သ္ကုတ်တိသဝ် (၅၀၀) ပြင်တံ ဒးပြံင်ဆုဲယာယဳနွံရောင် ဂွံတီကေတ် နူညးဒေသကဵု ဂကောံဟံင်ပြာ်ရီုဗင်မၞိဟ်တံရ။
ဍာ်ၜဳ “သောင်းရင်း” ဝွံ အတိုင်ဌာနက္ဍိုက်က္ဍိုပ်ဗြဲကျာတံၜတ်လဝ် တ္ၚဲဏံ အခိင်နူဂယး (၆) နာဍဳကဝက်ဂှ်မ္ဂး စိုပ်ဒၟံင် (၁၁၂၃) သေန်တဳမဳတာတုဲ ၜက်လောန်ဒၟံင် လ္တူစၟတ်ဍာ်ဒှ်ဓဝိင် (၉၆၃) သေန်တဳမဳတာရောင် ဂွံတီကေတ်ရ။
စနူဂိတုအဝ်ဂေတ် စၟတ်တ္ၚဲ (၂၀) နူတနေံဏံတုဲ ပ္ဍဲကဵုအရာပ် စၟတ် (၁၊ ၂၊ ၅) တံဂှ် ဍာ်လုပ်စိုပ်ဒၟံင်ဂှ်ရ ဂကောံဟံင်ပြာ်ရီုဗင်မၞိဟ်ပ္ဍဲဒေသတံ ရီုဗင်ပြံင်ဆုဲဏာ ဒၞာဲဗၠးဘဲတုဲ အခိင်လၟုဟ်ဏံ ညးဒးဘဲဍာ် (၅၀၀) ပြင် စိုပ်ဒၟံင် ပ္ဍဲဇြပ်သဘင်ဓရ်ဘာဂြိုပ်နွံရောင် ဂးရ။
“ဗြဲခိုဟ်မံင်တှ်ေ ဍာ်တိုန်မြက်မံင်ရ။ နူတနေံဏံမွဲတ္ၚဲ ဍာ်တိုန်ကၠုင်ကွေံ၊ ဒဵုလၟုဟ် တိုန်မံင်ဖိုဟ်၊ နူဗ္တံဏံ သ္ကုတ်သဝ်ပိုဲတံကဵု ညးမံင်ကြပ်ဇိုင်ၜဳတံ ဒးပြံင်အခိင်ဗ္တံရ။ ပြဟ်ပြဟ်ဏံတှ်ေ ပြံင်ဏာလဝ် ပ္ဍဲဘာလကျာ် စၟတ် (၄) ရ” သာ်ဝွံ ကောန်ဂကောံဟံင်ပြာ်ရီုဗင်မၞိဟ်မွဲတၠ ဟီုရ။
ဍာ်ၜဳဝွံ စဵုကဵုတ္ၚဲဏံ ဆက်တိုန်မံင်နွံတုဲ အပ္ဍဲတ္ၚဲဂတဏံမွဲတၠ ၜိုတ် (၅) ပေ ထပ်သၠုင်တိုန်မာန်ဂှ်ရ ဆက်နွံမံင်လ္တူဍာ်စၟတ်ဒှ်ဓဝိင်ရောင် ဌာနက္ဍိုက်က္ဍိုပ်ဗြဲကျာတံ တော်ခယျလဝ်ရ။
တုပ်သာ်ဝွံကီု ပ္ဍဲကြပ်ဒဒန် စၟတ် (၁) သေံ – ဗၟာ ကေုာံ ပ္ဍဲကဵုဖျာလေန်မိုဲ၊ ဍုင်မာဲဆံက်၊ ကၟိန်ဍုင်သေံဂှ်လေဝ် ဍာ်ၜဳလုပ်စိုပ်ဒၟံင်ယျရောင် ဂွံတီကေတ်ရ။
ဟိုတ်ဂှ်ရ ညးဍုင်ကွာန်ဒၟံင်တန်တဴ ပ္ဍဲကွာန်မေအ်ကျလံင် ကေုာံ မေအ်ကသ၊ မေအ်တံင်၊ တသာင်လှေက်၊ မဟာဝါန်၊ မေဝ်ကု၊ မေဝ်ပ ပွိုင်ဍုင်မာဲဆံက်ကဵု ပွိုင်ဍုင်မေအ်လမာတ် ခရိုင်တက်တံ သွက်ဂွံပြံင်ဆုဲဒၟံင်တန်တဴ ဒၞာဲဗၠးဘဲဍာ်ဂှ် ညးတာလျိုင်သေံတံ ကဵုသမ္တီဆဝ်မ္ၚုဟ်လဝ်နွံရ။