ပ္ဍဲအခိင်ကာလ (၁၀၀) တ္ၚဲ အလဵုအသဳပၞာန်ဝွံ ပရေင်ပြုပြေင်ပၞာန်ဒပ်ပၞာန် စွံပွန်ကဵု ကောန်ကွာန် အပ္ဍဲတိဍာ်ဗော်သွးကရေင် ကေအေန်ယူ သာတုဲဂၠိုင်ကၠုင်ရဂှ် ဓမံက်ထ္ၜးလဝ် ပ္ဍဲလိက်ဒုင်စဳရေင် ကမ္မတဳအခေါင်အရာမၞိဟ်ကေအေန်ယူ လလောင်ပ္တိတ်လဝ်ရ။
ပရူပရာဒပ်ပၞာန်ဖံက်ပ္ကဝ်အခေါင်အရာမၞိဟ် အပ္ဍဲ (၁၀၀) တ္ၚဲဂှ်ဝွံ နကဵုလိက်ဒုင်စဳရေင် “ကိုန်စဳဇန် မေန်အံင်လှာင် စွံပွန်ကြာန်ဓဇန်လ္တူညးဍုင်ကွာန် (၁၀၀) တ္ၚဲ” ဂှ် ကေအေန်ယူ လလောင်ပ္တိတ်လဝ် ပ္ဍဲဂိတုအဝ်ဂေတ် စၟတ်တ္ၚဲ (၁၉) တုဲကၠုင်ဏံရ။
ဒပ်ပၞာန်တံ စွံပွန်ပရေင်ပၞာန် ကုဒပ်ပၞာန်ဗၠးၜးကောန်ဂကူကရေင် KNLA ကဵု ဒပ်မဟာမိတ်ပၠန်ဂတးတံသၟးဟေင် ရန်တၟံဗ္တိုက်ဏာ ဟွံသေင်တုဲ သီုဒၞာဲဒေသ ကောန်ဍုင်ကွာန်တံ ဒၟံင်တန်တဴဂှ်လေဝ် စွံပွန်ဗ္တိုက်ဏာလဝ်ရောင် ဓမံက်ထ္ၜးလဝ် ပ္ဍဲလိက်ဒုင်စဳရေင်ဝွံရ။
ဒပ်ပၞာန်တံဝွံ ပွမရုဲစှ်ပန်ဗ္တိုက် ဒၞာဲကောန်ဍုင်ကွာန်တံနွံ ထပ်ကဵုထပ်ကီု၊ ပွမစၟတ်ပါ်ခြာလဝ် ပွန်ပၞာန်ဟွံမွဲကီု၊ လွဟ်လနက် ကေုာံ နဲဗျူဟာ မစကာလဝ်ဂမၠိုင်ဂှ် နကဵုတင်ရန်တၟံနွံနွံ စွံပွန်ကဵု ကောန်ကွာန် ကေုာံ စမြိုင်ဆေင်စပ်ကဵု ကောန်ကွာန်ဂမၠိုင်တုဲ ပန်ဗ္တိုက်မံင်ရောင် ဂးရ။
အပ္ဍဲ (၁၀၀) တ္ၚဲဂှ်ဝွံ ဒပ်ပၞာန်တံ ဇၞော်သၠဲမုက်ပၞာန် ကေုာံ ထ္ပက်ပၞာန်ဗလးတိ၊ ပန်ဗ္တိုက်ကဵုက္ၜင်ကျာ/စက်ဗရုသာဲ/လွဟ်ဇၞော်၊ ပလီုပလာ်သ္ၚိဒၟံင်ကောန်ကွာန်၊ ဂစိုတ်မၞိဟ်ဟွံဗဗွဲဓဝ်၊ သကဵုကၠောန်သ္ပဗွဲအဓမ္မတုဲ ပရေင်ဒးဒုင်ဘဲဂိလေင်ဂမၠိုင် ကေုာံ ကမၠောန်ပကီုပရာပ် ဆေင်စပ်ကဵု ပဋိပက္ခဂမၠိုင်ဂှ်လေဝ် လုတ်လောန်လဝ်ဒုဟ်ရောင် ချူဓမံက်လဝ် ပ္ဍဲလိက်ဒုင်စဳရေင်ဝွံရ။
အပ္ဍဲသၞာံ (၂၀၂၆) နူဂိတုအေဗရဴ (၂၀) စဵုကဵုဂိတုဂျူလာင် (၃၁) တုဲကၠုင်ဏံဝွံ ပ္ဍဲတိဍာ်ကေအေန်ယူထိင်ဒဝ်ဂှ် ကတဵုဒှ်ပေဲါဗ္တိုက် (၅၃၆) ဝါတုဲ မွဲတ္ၚဲမ္ဂး ကတဵုဒှ်ပဋိပက္ခ (၅) ဝါနွံရောင် ဓမံက်ထ္ၜးလဝ် ပ္ဍဲလိက်ဒုင်စဳရေင်ရ။
အပ္ဍဲ (၁၀၀) တ္ၚဲဏံဝွံ ဟိုတ်နူဒပ်ပၞာန်တုဲ ကောန်ကွာန်ချိုတ် (၄၄) တၠ၊ ဒးဝပ် (၁၂၄) တၠနွံရဂှ် ဓမံက်ထ္ၜးလဝ် ပ္ဍဲလိက်ဒုင်စဳရေင် ကမ္မတဳကမၠောန်သုတေသန ကေုာံ ကမ္မတဳအခေါင်အရာမၞိဟ်ဗဟဵု ကေအေန်ယူရ။
ဒပ်ပၞာန်တံ စကာကၠုင် က္ၜင်ကျာဗ္တိုက်၊ က္ၜင်ကျာ Y-12 ကေုာံ Y-8 ၊ ဟေဝ်လဳကပ်တာ၊ Gyrocopter ကဵု Paramotor တုဲ ပန်ဗ္တိုက်လဝ် (၃၃၁) ဝါ၊ ပန်ကဵုလွဟ်ဇၞော် (၁၂၉) ဝါ၊ စံင်ပလီုပလာ် (၁၂) ဝါ ကေုာံ အမှုလုတ်လောန်ဒုဟ်တၞဟ်တၞဟ် (၁၇) ဝါ ကတဵုဒှ်ကၠုင်နွံဂှ်လေဝ် ပါလုပ်မံင်ရ။
ဟိုတ်နူဒပ်ပၞာန် ပန်ကဵုလွဟ်ဇၞော်/က္ၜင်ကျာတုဲ သ္ၚိဒၟံင်ညးဍုင်ကွာန် (၃၉၀) မ၊ ဘာလကျာ် (၁၄) ဘာ၊ ဘာဗ္တောန်လိက် (၈) ဘာ၊ ရုင်ဂဥုဲ (၅) မ၊ ဘာကျာ်ခရေတ် (၂) ဘာကဵု ခဒမ်ဂဥုဲ (၁) မ လီုလာ်အာလဝ်နွံရောင် ဓမံက်ထ္ၜးလဝ် ပ္ဍဲလိက်ဒုင်စဳရေင်ဝွံရ။
တုဲပၠန် ကရောင်ပၞာန်ဂကောံဒပ်ပၞာန်တံ လုပ်စိုပ်အပ္ဍဲကွာန်ဂမၠိုင်ဂှ် ရပ်ဏာကောန်ကွာန် (၃၄) တၠတုဲ ကောန်ကွာန်မၞုံကြပ် ဒၞာဲဖျေံလဝ်ဒပ်တံဂှ် စကာနဒဒှ်ပရေင်စဵုဒၞာပၞာန်ရဂှ်လေဝ် ဓမံက်ထ္ၜးလဝ်ရ။
အပ္ဍဲအခိင်ကာလ (၁၀၀) တ္ၚဲဂှ်ဝွံ ဒပ်ပၞာန်တံ လုတ်လောန်ဒုဟ်ပကီုပရာပ်သ္ကာတ်မြဟ် လ္တူကောန်ၚာ်တံအဆက်ဆက်ကီု၊ ပ္ဍဲကဵုပရူဒဒှ်လုတ်လောန်ဒုဟ် (၁၄) ဝါဂှ်မ္ဂး ကောန်ၚာ်ချိုတ် (၈) တၠတုဲ ဒးဘဲဝပ် (၁၁) တၠနွံရောင် ကေအေန်ယူ ဂးရ။