ဒေံဒုအကြာပ်ဒပ်ဗၠာဲသၟိင် (၁) တၠ နူဗဒိုပ်ဗၠာဲသၟိင်ၝောံဍုင်ၜဳက္လေင်၊ တွဵုရးဍုင်မန် ပါလုပ်ကီု သီုဖအိုတ် သၟတ် (၇) တၠတံဂှ် ဒပ်ပၞာန်၊ ပၞာန်ကွာန် ကေုာံ ဂကောံပံင်ကောံပျူသဝ်ထဳတံ ရပ်ဏာလဝ် ကဵုသ္ပကောန်ပၞာန်နွံရောင် ဂွံတီကေတ် နူညးစုက်လုက်ကဵု ဂကောံဒပ်ဗၠာဲသၟိင်တံရ။
ဒပ်ပၞာန်၊ ပၞာန်ကွာန် ကေုာံ ဂကောံပျူသဝ်ထဳတံဝွံ ပ္ဍဲဂိတုအဝ်ဂေတ် စၟတ်တ္ၚဲ (၄) တုဲကၠုင်ဏံ ပ္ဍဲဂၠံင်ကွဳစက် ၜဳက္လေင် – တံင်ဇြောန် ကေုာံ လ္တူဍုင်ၜဳက္လေင်ဂှ် ဗက်ဂၠာဲရပ်သၟတ်တံ နကဵုကွဳစက်ရ။
ပ္ဍဲတ္ၚဲဂှ်ဝွံ ဒပ်ပၞာန်ကဵု ဂကောံတံ ရပ်ဂွံသၟတ် (၇) တၠတုဲ အပ္ဍဲဂှ်မ္ဂး ဒေံဒုအကြာဒပ်ဗၠာဲသၟိင် နူၝောံဍုင်ၜဳက္လေင် (၁) တၠလေဝ် ပါလုပ်ရ။
ဒေံဒုအကြာပ်ဒပ်ဗၠာဲသၟိင် ဒးဒုင်ရပ်လဝ်ဏံ သ္ဂောံက္လေင်ဗၠးဂှ် ဂကောံသ္ၚိကၟိန်တံ ဂိုန်ဂ္စာန်ကီုလေဝ် ဟွံက္လေင်ဗၠးကၠုင်ဏီရောင် ညးစုက်လုက်ကဵု ဂကောံဒပ်ဗၠာဲသၟိင်မွဲတၠ ဟီုရ။
“ဒေံဒုအကြာပ်ဒပ်ဗၠာဲသၟိင်ဂှ် ဒးဒုင်ရပ် ပ္ဍဲအရာပ် (ဘိုရာဇာ) ၊ ဍုင်ၜဳက္လေင်ရ။ သၟတ်သှ်ေတံဂှ် နူကွာန်တံင်ဇြောန်ကဵု ပံက်တဝ်ဂှ်ဏောင် ဂွံတီကေတ်ရ” သာ်ဝွံ ညးဟီုရ။
သၟတ်ဒးဒုင်ရပ်ဏာ ကဵုသ္ပကောန်ပၞာန်တံဂှ်ဝွံ ပ္ဍဲဂိတုအဝ်ဂေတ် စၟတ်တ္ၚဲ (၄) ဏံ ဒးဒုင်ပလံင်ဏာ ဇရေင်ဗဒိုပ်ပကောံပကေဝ်ကောန်ပၞာန် ပ္ဍဲဍုင်မတ်မလီုဂှ်ရောင် ဂးရ။
ကမ္မယှေန်ပၞာန်တံဝွံ သွက်တန်ဗ္တောန်ယိုက်ဂၠေင်ပၞာန်ဂှ် ပကောံဂွံကောန်ပၞာန် အောန်စှ်ေကၠုင်ဂှ်ရ သၟာင်နူဂကောံသ္ၚိကၟိန်သၞာဲဒဴမ္ဂး အခိင်လၟုဟ်ဏံ သီုဂကောံသ္ၚိကၟိန်ဒပ်ဗၠာဲသၟိင်တံလေဝ် ရပ်တုဲ သကဵုပကောန်ပၞာန်ရ။
အပ္ဍဲတွဵုရးဍုင်မန်ဂှ် ဒပ်ပၞာန်ကဵု ဂကောံတံ ထ္ၜးဟိုတ်အမိင်ဒေသန္တရ စွံပွန်ကဵုသၟတ်တံတုဲ ဇၟာပ်တ္ၚဲရပ်စပ်မံင်နွံရောင် ဂွံတီကေတ် နူညးဒေသတံရ။
အတိုင်တင်နင် ဌာန်ဒတန်အခေါင်အရာမၞိဟ်ဍုင်မန် HURFOM မ္ဂး ပ္ဍဲတွဵုရးဍုင်မန်ဝွံ တန်ဗ္တောန်ယိုက်ဂၠေင်ပၞာန် နူလၟေင် (၁) စဵုကဵု လၟေင် (၂၇) ဂှ် ကောန်ပၞာန် ဒးဒုင်ပကောံသွက်ဂွံယိုက်ဂၠေင်ပၞာန် ဟွံအောန်နူ (၅၈၀၀) တၠနွံရောင် ဓမံက်ထ္ၜးလဝ်ရ။