အပ္ဍဲတွဵုရးဍုင်မန်ဝွံ ပ္ဍဲရာသဳကသီုသၞာံဏံဂှ် ဟိုတ်နူဥတုရာသဳပြံင်လှာဲကီု၊ ညးကၠောန်ကမၠောန်ဝါဗ္ၚအောန်ကီု ကေုာံ စၟစၟောန်လုပ်စိုပ်ကီုဂှ်ရ အခိင်သြောံတိတ်တေံမ္ဂး သြောံတိတ်အောန်စှ်ေမာန်ရောင် သၟာဗ္ၚတံ တော်ခယျလဝ်ရ။
အတိုင်သၟာဗ္ၚတံဟီုမ္ဂး အခိင်တဵုသြောံလၟုဟ်ဏံ တ္ၚဲဍာ်ဗြဲဟွံရုံဂပ်ကီုနွံတုဲ ဗွဲကြဴဂှ် ဗြဲဇၞော်ဂူဆက်မံင်ဂှ်ရ ဝါဗ္ၚဂမၠိုင်ဗၠိုက်ဍာ်တုဲ တၞံသြောံဂမၠိုင် လီုလာ်အာနွံရောင် ဂွံတီကေတ်ရ။
သၟာင်နူဂှ်ပၠန် ကၠေင်စက်၊ ဝဲါဓာတ်၊ ဂဥုဲဂစိုတ်စၟ၊ ဂကူသြောံ ကေုာံ ၚုဟ်သၟာကမၠောန်ဂမၠိုင် သၠုင်တိုန်ကၠုင်ဟွံမွဲကဵုသၞောတ်ဗ္ၜတ်ဂှ်ရ သၟာဗ္ၚတံ ဒးဆဵုဂဗမံင်ကဵု စရိတ်တဵုလွဳက္ဍင်တိုန်ရ။
ပ္ဍဲပွိုင်ဍုင်ရေဝ်၊ မုဟ်ဍုင် ကေုာံ ပွိုင်ဍုင်ပံင်ဝွံ တၞံသြောံဂမၠိုင် ကတဵုဒှ်ယဲ ကေုာံ စၟစၟောန်ဂမၠိုင်လုပ်စိုပ်ဂှ်ရ လ္တူသြောံတိတ်ဂှ် အဆက်ဖဵုထပ်တိုန်စိုပ်မာန်ရောင် သၟာဗ္ၚတီကၠိုဟ်ပရူသြောံ နူမုဟ်ဍုင်မွဲတၠ ဟီုရ။
“သၞာံဏံ သြောံတိတ်အောန်ဂှ် ချိုတ်ပၠိုတ်ရ။ သၞာတုဲတေံလေဝ်ယအ်၊ မုရောဟီုတှ်ေ လၟုဟ် သြောံတံဂှ် စၟစ၊ ကၞုတံ လုပ်ရ။ ဂစတ်ဂဥုဲဂစိုတ်စၟတုဲ ကၠေံ၊ ဆ ထပ်လုပ်ကၠုင်မံင်ရ။ စှ်လန်ဟွံကရပုဟ်။ ဟိုတ်နူဥတုရာသဳလေဝ် ပါရ။ ကၠောန်သၞောတ်ဂြာတ်ရ။ ဗီုဏံတှ်ေ သြောံ ဗီုလဵုဂွံခိုဟ်ရော၊ သၟာဗ္ၚလ္ၚဵုတံတှ်ေ ဟွံကၠောန်ရပုဟ်” သာ်ဝွံ ညးဟီုရ။
သၞာံတုဲကၠုင်တေံလေဝ် အခိင်အခါဟွံသေင် ဗြဲဂူကီု၊ ဒးစၟပလီုသြောံတုဲ ခံက်ဝါဗ္ၚလီုလာ်ကီု၊ ဟိုတ်နူကဵုဝဲါ/ပၠောပ်ဝဲါ ရုံရုံဂပ်ဂပ်ဟွံမာန်ဂှ်ရ နလၟေင်ဍာံ သြောံမွဲဨက တိတ်မံင် (၄၀) နပြင်ဂှ် မွဲဨက (၂၅) နဟေင်တိတ်ရဂှ် သၟာဗ္ၚလ္တူဂှ် ဆက်ဟီုလဝ်ရ။
ၜိုန်ဂှ်ကီုလေဝ် သြောံကသီုသှ်ေသၞာံတုဲဂှ်ဝွံ အခိင်လၟုဟ်ဏံ ဇြဟတ်ရာန်သၠုင်တိုန်မံင်တုဲ သြောံမွဲန နူကဵု (၃၀၀၀၀) ဒကေဝ်ဂှ် စဵုကဵု (၄၀၀၀၀) ဒကေဝ် ၚုဟ်သၠုင်တိုန်မံင်ရောင် ဂွံတီကေတ်ရ။
“လၟုဟ် သၟာဗၞိက်တံ ဗက်ရာန်မံင်သြောံတှ်ေ ၚုဟ်သြောံတိုန်မံင်ညိညိရ။ ဆဂး ဍာ်ဒကေဝ်ခိုဟ်/ဟွံခိုဟ် ထပိုတ်ကဵုမံင်ၚုဟ်တှ်ေ ညးနွံပၟိက်ကဵုလှုဲတှ်ေ သွံရ။ သၟာဗ္ၚဗွဲမဂၠိုင်ဂှ်လေဝ် သွံမံင်ရ။ အခိင်ၚုဟ်တိုန်၊ ဆ ၚုဟ်စှ်ေအာညိညိဏီရ။ ကၠာတေံဟီုတှ်ေ ၚုဟ်လေဝ်ဟွံမွဲ၊ ညးကၠုင်ရာန်လေဝ် ဟွံမွဲပုဟ်” သာ်ဝွံ သၟာဗ္ၚရေဝ်မွဲတၠ ဟီုရ။
ကၠာတေံဝွံ ကောန်ဂကောံသၟဝ်ကမ္မယှေန်ပၞာန်တံ ရပ်စပ်သြောံ ပလံင်ဗ္စိုပ်တတ်ကၠောံပွိုင်ဍုင်ကီု၊ အာတ်သြန်ဟွံမွဲကဵုသၞောတ်ဗ္ၜတ်ကီုဂှ်ရ သၟာဗၞိက်တံ ကၠုင်စိုပ်ရာန်သြောံ ဇရေင်သၟာဗ္ၚတံ အောန်စှ်ေတုဲ ဟွံကလိဂွံၚုဟ်သြောံခိုဟ်ခိုဟ်ရ။
သၟာင်နူဟွံကလိဂွံၚုဟ်ခိုဟ်ဂှ်မ္ဂး ဒးဆဵုဂဗမံင်ကဵု ၚုဟ်မးကပေါတ်ဗၞိက်က္ဍင်မံင်ဂှ်ရ သၟာဗ္ၚတံ တဵုဖအောန်ဖျေံသြောံကသီုတုဲ သၟာဗ္ၚဗွဲမဂၠိုင်တံ တဵုလွဳနကဵုသၞောတ်ဂြာတ်ဂှ်ရ သြောံကသီု သာတုဲတိတ်အောန်စှ်ေမာန်ရဂှ်လေဝ် သၟာဗ္ၚတံ တော်ခယျဟီုဂးမံင်နွံရ။
ပ္ဍဲတွဵုရးဍုင်မန်ဝွံ ကမၠောန်သြောံကသီုဂှ် အဓိကကၠောန်သ္ပတဵုလွဳမံင်တုဲ နဒဒှ်ဒုတိယဂှ်မ္ဂး သြောံက္ညင်၊ ပ္ကဴသၟိင်တ္ၚဲ၊ ၜဲတိ ကေုာံ ၜဲဂကူနာနာဂမၠိုင်ဂှ်လေဝ် တဵုလွဳဒၟံင်ဨကဗွဲမဂၠိုင်ဂၠင်နွံရ။