ပ္ဍဲကဵုသၟာကမၠောန် မဂြိပ်တိတ်လဝ် နူရုင်ကမၠောန်လီဠာန်သြန်အန်လာင် ကော်ဂး ကျာဖျကြုက် မၞုံဒေသကျာ်ပိ (၂၁) တၠတအ်ဂှ် က္လေင်ရပ်ဂွံလဝ် (၄) တၠရောင် ညးတီပရူဒဒှ်မွဲတၠ ဟီုလဴကၠုင်ကဵုဌာန်ပရိုင်ဗၠးၜးမန်ရ။
ပ္ဍဲဂိတုအဝ်ဂါတ် စၟတ်တ္ၚဲ (၈) ပယျာံနူဂယး အခိင် (၇) နာဍဳပြၚ်ၚ်ဂှ် သၟာကမၠောန် နူရုင်ကမၠောန်ကျာဖျကြုက် (၂၁) တၠ ဂြိပ်တိတ်အာ လ္ပာ်အရာပ် (၁) ကဵု အကြာဆေင်ဖျာဇၞော် ဍုင်ကျာ်ပိဂှ်တုဲ နူကဵုဂကောံဂီုကၠီုတအ် ဗက်ဂၠာဲရပ်ဂှ် က္လေင်ဂွံမၞိဟ် (၄) တၠ၊ သှ်ေ (၁၇) တၠတအ်ဂှ် ဗၠးတိတ်အာရောင် ဂးရ။
“မၞိဟ်တီပရောပရာ ပ္ဍဲရုင်ကမၠောန်လီဠာန်သြန်အန်လာၚ်ကျာဖျမွဲတၠဟီုဂှ်တှ်ေ သၟာကမၠောန်မွဲတၠ ၜိုန်ရဂွံမံင်သြန် မွဲဂိတုအကြာ (၃) ဠက်ၝာတ်ကီုလေဝ် ပွိုၚ်မွဲမွဲတ္ၚဲ ဂၠာဲသြန်ဒးဂွံမူစိ ဍေံဖျေံလဝ်ကဵုနွံမံင်၊ အတိုင်ဍေံဖျေံလဝ် ယဝ်ဂၠာဲဟွံဂွံတှ်ေ ဒးကဵုဒုဟ်ဒဏ် ၜုၚ်တက်နာနာ၊ ဟွံဂွံစပုၚ်နွံတုဲ သၟာကမၠောန်လ္ၚဵု ဒုၚ်ဘဲဒဏ်ဂှ်ဟွံမာန် ဂြိပ်တိတ်ကၠုၚ် ဗီုပြင်ဂှ်နွံ” ညးဒေသကျာ်ပိမွဲတၠ ဟီုရ။
ဒဒှ်သၟာကမၠောန် နူရုင်ကမၠောန်ကျာဖျ ဍုင်ကျာ်ပိတအ် ဂြိပ်တိတ်သာ်ဏအ်ဂှ် ဂွံမိင်အလန်ကၠာအိုတ်တုဲ မၞိဟ်ဗၠးမံင် (၁၇) တၠတအ်ဂှ်လေဝ် စဵုကဵုတ္ရဲဏအ် (ဂိတုအဝ်ဂါတ် စၟတ်တ္ရဲ ၁၁) ဟွံက္လေင်ရပ်ဂွံဏီရောင် ညးဆက်ဟီုရ။
အတိုင်ညးစုက်လုက်မံင်ကဵု ဂကောံအုပ်ဓုပ်လ္တူဍုင်ကျာ်ပိမွဲတၠဟီုကၠုင်ဂှ်မ္ဂး သၟာကမၠောန်ကျာဖျ မဗၠးတိတ်မံင် (၁၇) တၠတအ်ဂှ် နူဂကောံအုပ်ဓုပ်လ္တူဍုင်ကျာ်ပိ ထဝ်မေအ်ပါ နွံသၟဝ်တဲဗော်ကေအေန်ယူတအ် ထိင်ဒဝ်ဂွံလဝ်တုဲ လ္ပာ်ဂကောံရပ်လွဟ် ဒဳကေဗဳအေကဵု ရဲကေတ်မံင်ဂီုကၠီု ပရေင်ကမၠောန်ကျာဖျကြုက်တအ် အာတ်မိက်ဒၟံင်ကၠာလေဝ် ဟွံက္လေင်အပ်ပြာပ်ကဵုဏီရောင် ဂးရ။
“ပ္ဍဲကဵုညးဂြိပ်တိတ်ဏအ်ဂှ် ဂကူကြုက်အောန်တုဲ ကောန်ဍုင်ဗၟာတအ်ရ ဂၠိုင်” သာ်ဏအ် ညးစုက်လုက်ဂကောံအုပ်ဓုပ်ဍုင်ကျာ်ပိဂှ် ဆက်ဟီုပၠန်ရ။
ပ္ဍဲပွဳပွူဍုင်ကျာ်ပိကီု လ္တူဍုင်ကျာ်ပိကီု ရုင်ကမၠောန်ကျာဖျကြုက်တအ် ပံက်ကၠောန်ဒၟံင်ဟွံမွဲရောင် ညးတာလျိုင် ဂကောံရပ်လွဟ်ဒဳကေဗဳအေတအ် ဟီုပ္တိတ်ကၠုင်လဝ်အဆက်က်နွံရောင် ဂွံတီကေတ်ရ။