ဒပ်ကမ္မယှေန်ပၞာန် အဃောထ္ပက်ကၠုင်ကရောင်ပၞာန် အပ္ဍဲကွာန်အံင်ဇၞး၊ သ္ကုတ်ဂၠံင်ဍာ်ဗု – ကလိင်အံင်၊ ပွိုင်ဍုင်ဍာ်ဗုဂှ် ရပ်ကော်ဏာလဝ် ကောန်ကွာန် (၅) တၠတုဲ ပ္ဍဲဂိတုအဝ်ဂေတ် စၟတ်တ္ၚဲ (၃) တုဲကၠုင်ဏံ က္လေင်ဗၠးကၠုင်ရဂှ် ဂွံတီကေတ် နူတမ်ရိုဟ်ပရိုင်ဗလးတိရ။
အပ္ဍဲကွာန်မွဲဒမြိပ်သ္ကုတ်ဂၠံင်ကွဳစက် ဍာ်ဗု – ကလိင်အံင်ဂှ် စပ္တံနူဂိတုဂျူလာင်အိုတ်တုဲ ကရောင်ပၞာန်ကမ္မယှေန်ပၞာန် ဇြဟတ်ၜိုတ် (၂၀၀) မွဲကရောင်ပၞာန်တံ ချဳဓရာင်လုပ်တိတ်မံင် မွဲကွာန်တုဲမွဲကွာန်ရ။
ပ္ဍဲဂိတုအဝ်ဂေတ် စၟတ်တ္ၚဲ (၁) တုဲကၠုင်ဏံ အဃောဒပ်ကမ္မယှေန်ပၞာန် ထ္ပက်လုပ်ကၠုင်ကရောင်ပၞာန် ဇရေင်ကွာန်အံင်ဇၞးဂှ် ရပ်ကော်ဏာလဝ် ကောန်ကွာန် (၅) တၠတုဲ ပ္ဍဲဂိတုအဝ်ဂေတ် စၟတ်တ္ၚဲ (၃) တုဲကၠုင်ဏံ က္လေင်ဗလးကဵုလဝ်ရောင် ညးတာလျိုင် နူဒပ်စဵုဒၞာညးဍုင်ကွာန်ကာန်ပံက် ဥူအံင်ပါန် ဟီုရ။
“အခိင်ထ္ပက်ကရောင်ပၞာန် ပ္ဍဲကွာန်အံင်ဇၞးဂှ် ရပ်ဏာ ကောန်ကွာန် (၅) တၠရ။ မုဟိုတ်ရပ်ဏာဂှ် ဟွံတီပုဟ်။ လၟုဟ် ဍေံတံ က္လေင်ဟလးကဵုရဂှ် ဂွံတီကေတ်ရ” သာ်ဝွံ ညးဟီုရ။
လ္ပာ်ကွာန်ရတ်တၟးဂှ်လေဝ် ပ္ဍဲဂိတုအဝ်ဂေတ် စၟတ်တ္ၚဲ (၅) တုဲကၠုင်ဏံ ဒပ်ကမ္မယှေန်ပၞာန်တံ ထ္ပက်လုပ်ကရောင်ပၞာန် စၟဳစၟတ်သၟာန်သၟုက် ကောန်ကွာန်လ္ၚဵုတံဂှ်တုဲ ကော်ရပ်ဏာဟွံမွဲရောင် ဂးရ။
အခိင်လၟုဟ်ဏံဝွံ ပ္ဍဲကဵုမွဲဒမြိပ်သ္ကုတ်ဂၠံင်ကွဳစက် ဍာ်ဗု – ကလိင်အံင်ဂှ် ကမ္မယှေန်ပၞာန်တံ ဖျေံလဝ်ကင်ဒမၠုက်ဗွဲမဂၠိုင်တုဲ ဟိုတ်နူချဳဓရာင်အာကၠုင် လုပ်မွဲကွာန်တိတ်မွဲကွာန်ဂှ်ရ သၟာင်နူကတဵုဒှ်ပေဲါဗ္တိုက်တုဲ ညးဒေသတံ ဒှ်ဂဝိင် ဂွိင်ဖေက်ဒးဒုင်ရပ် နွံရဂှ်လေဝ် ညးတာလျိုင် နူဗျူဟာ (၃၃) ၊ ဌာနပၞာန်ရးတၟေင် PDF သဝ်ဒါကိုဝ် ဟီုရ။
“ဒၞာဲကရောင်ပၞာန်ဍေံတံ လုပ်ကၠုင်ဂှ်တှ်ေ ကောန်ကွာန်တံ ဖေက်ရ။ ဍေံတံ ထ္ပက်ကရောင်ပၞာန် ဒဵုကဵုဌာန်ဇၞူရ။ ပ္ဍဲကဵုဂၠံင်ဂှ်လေဝ် ဖျေံလဝ်ကင်ဒမၠုက်ရ။ ဍေံတံ ပကောံဇြဟတ်တုဲ တိုန်ကၠုင်နူလ္ပာ်တယျက်ချံင်ရ။ လုပ်ဍာ်ဂမ္တဴ။ တုဲတှ်ေ လုပ်ကၠုင် ဒဵုကဵုအံင်ဇၞး၊ ရတ်တၟး၊ ဌာန်ဇၞူ” သာ်ဝွံ သဝ်ဒါကိုဝ် ဟီုရ။
ပ္ဍဲကဵုမွဲဒမြိပ်သ္ကုတ်ဂၠံင်ဂှ်ဝွံ ဟိုတ်နူဖျေံစွံလဝ်ကင်ဒမၠုက်ဂှ်ရ ညးဒေသတံ သွက်ဂွံတတ်ကၠောံအာကၠုင်ဂှ် ပရေင်ဂီုကၠီုဟွံမွဲတုဲ သွက်ဂွံအာစိုပ် ကၠောန်ကမၠောန်ကၠအ်ဂူဂှ်လေဝ် ဒှ်မံင်ခက်ခုဲရောင် ဂွံတီကေတ်ရ။
ပ္ဍဲကဵုဒေသ သ္ကုတ်ဂၠံင်ကွဳစက် ဍာ်ဗု – ကလိင်အံင်ဂှ်ဝွံ သၟာင်နူဒပ်ကမ္မယှေန်ပၞာန်တုဲ ဂကောံဒပ်ပၠန်ဂတးတံလေဝ် အာကၠုင်ချဳဓရာင်မံင်ဂှ်ရ ပ္ဍဲသၞာံ (၂၀၂၅) တုဲကၠုင်ဏံဂှ် ဒှ်ဒၞာဲပေဲါဗ္တိုက်သ္ကာတ်မြဟ်ရ။