ပ္ဍဲအရာပ်သၞေဟ်ကွဳပၟတ်၊ ဍုင်လၟိုင်၊ တွဵုရးဍုင်မန် ကွဳစက်ဒးဒုင်ပၠံင်ၜးဏာ နူညးတြုၠံ ဘပဠထ္ၜးလွဟ်မွဲတၠ ပ္ဍဲဂိတုအဝ်ဂေတ် (၂၅) ၊ နူတနေံဏံ အခိင်နူဂယးဂှ်ဝွံ အခိင်သဝ်တ္ၚဲ အကြာ (၅) နာဍဳ ဂွံက္လေင်ဆဵုကေတ်ကွဳစက်ဂှ် အပ္ဍဲကၠအ်ထ္ၜိုတ်၊ မကြပ်ကဵုဍုင်လၟိုင်ဂှ်ရောင် ဂွံတီကေတ်ရ။
ကွဳစက်ဂှ်ဝွံ ခါတ်ကသအ်ထောံလဝ် ပ္ဍဲကၠအ်ထ္ၜိုတ် အကြာကွာန်တံင်ပရင်ကဵု ဍုင်လၟိုင်တုဲ ညးတြုံဒေသမွဲတၠ အဃောအာစိုပ်ကၠအ်ထ္ၜိုတ်ဂှ် ဂွံဆဵုကေတ်ရ။
သၟာင်နူအကာဲအရာ ဂၠာဲထကဵုလဝ် အပ္ဍဲကွဳစက်ဂှ်တုဲ ဒ္ၚောဝ်ကွဳစက်ဂှ်လေဝ် ဂွံဆဵုကေတ်လီုလာ်မံင်ရောင် ညးစုက်လုက်ကဵု သ္ၚိကၟိန်ဂှ်မွဲတၠ ဟီုရ။
“ကာဂှ်တှ်ေ ညးဒေသတံင်ပရင် အဃောညးအာကၠအ်ဂှ် ဆဵုရ။ ဂၠာဲထကဵုလဝ် ပ္ဍဲကွဳစက်ဂှ်ရ။ ဂၠံင်ဍေံအာ ဟွံမွဲတုဲ စွံလဝ်ရ။ ပၞုက်လဝ်ဟာဟီုဂှ် ဟွံတီကၠးပုဟ်။ ဒ္ၚောဝ်ကာဂှ်တှ်ေ လီုလာ်မံင်ရ။ သှ်ေတၞဟ်ဂှ် ခိုဟ်မံင်ဖအိုတ်ရ” သာ်ဝွံ ညးဟီုရ။
နူတနေံဏံ ဗွဲကြဴနူကွဳစက်ဒးဒုင်ပၠံင်ၜးဏာတုဲဂှ်မ္ဂး အတိုင်ညးဆဵုတံကဵုပရိုင် ဒၞာဲကွဳစက်စိုပ် မပ္တံကဵုတၟအ်ကၞေင်၊ လၟိုင် ကေုာံ ဒၞာဲတၞဟ်ဟ်ဂမၠိုင်ဂှ် နူညးတၠခန္ဓတံ ဗက်ဂၠာဲလဝ်ဒၞာဲဇဳရောင် ဂွံတီကေတ်ရ။
အခိင်လၟုဟ်ဏံဝွံ ဂွံက္လေင်ဆဵုကွဳစက်ဂှ်ကီုလေဝ် ညးတြုံအဝဲလ္ဒောဝ် ဘပဠထ္ၜးလွဟ် ပၠံင်ၜးကေတ်ဏာကွဳစက်ဂှ် ရပ်ဟွံဂွံဏီရ။
“မၞိဟ်ဂှ် ရပ်ဟွံဂွံဏီပုဟ်။ မန်ရ ဒှ်ဂၠိုင်၊ ဍေံဟီုအရေဝ်ဝေဝ်မံင်ရ။ ဗီုပိုဲဟီုအရေဝ်ကဵု လ္ပာ်တၞဟ်ဟီုအရေဝ်ဂှ် ဟွံတုပ်ပုဟ်တှ်ေ ထေင်ခယျဂွံမံင်ညိညိရ” သာ်ဝွံ ညးစုက်လုက်ကဵု သ္ၚိကၟိန်ဂှ် ဟီုရ။
ဂိတုအဝ်ဂေတ် (၂၅) ၊ နူတနေံဏံဝွံ ကွဳစက် Ford EcoSport အရံင်လမ္စံက်၊ စၟတ် 1R/7598 ဒေံါလဝ်ဂတမုက်သ္ၚိဂှ် ညးတြုံအဝဲလ္ဒောဝ်မွဲတၠ လုပ်တေက်ဇီုစုတ်ကဵု ကွဳလိုန်ဓာတ်တုဲ ဘပဠထ္ၜးလွဟ်ဂၠေံ ပၠံင်ၜးဒဳဓရိပ်ဏာကွဳစက်ဂှ်ရ။
ပ္ဍဲဍုင်လၟိုင်ဝွံ ကပေါတ်ကယျိုင်ကယျဝ်ထဝ် ပ္ဍဲဆေင်ထဝ်ဂမၠိုင် ကေုာံ ကွဳစက်ယာဉ်ဂမၠိုင် ဒးဒုင်ပၠံင်ၜး မွဲနှေံမွဲနှေံနွံကီုလေဝ် ကုညးလုတ်လောန်ဒုဟ်ဂမၠိုင်ဂှ် ရပ်စပ်ကေတ်အရေဝ် ဗွဲမစိုပ်တရဴဟွံမာန်ဏီရောင် ဂွံတီကေတ် နူညးဒေသတံရ။