ပ္ဍဲသ္ကုတ်သၠုင်ကျာဍုင်ဗြဝတဳ၊ ပယျဵုသေံ-ဗၟာဂှ်ဝွံ အကြာဒပ်ကမ္မယှေန်ပၞာန်ကဵု ဂကောံဒပ်ပၠန်ဂတးတံ ပေဲါဗ္တိုက်သ္ကာတ်မြဟ်ကၠုင်ဒၟံင်တုဲ ပန်ရီုမံင်ကဵုက္ၜင်ကျာ ဗွဲမသ္ကာတ်မြဟ်ရောင် ပ္ဍဲပရိုင်သေံဂမၠိုင် ဓမံက်ထ္ၜးလဝ်ရ။
ဒပ်ကမ္မယှေန်ပၞာန်တံဝွံ သွက်ဂွံဗပေင်ဇြဟတ်ပ္ဍဲမုက်ပၞာန် အပ္ဍဲပေဲါဗ္တိုက်ဍုင်ဗြဝတဳဂှ်ကဵု သွက်ဂွံဗ္တိုက်ဗဒိုပ် ဂကောံဒပ်ပၠန်ဂတးတံဂှ် ပန်ရီုမံင်ကဵုက္ၜင်ကျာရောင် ဂးရ။
ပေဲါဗ္တိုက်ဝွံ အဓိက ကတဵုဒှ်ဒၟံင် ပ္ဍဲပွဳဗွိုင်ပွိုင်ဍုင်ဗြဝတဳ၊ မၞုံဂတမုက်ခရိုင်ဖုတ်ဖရာကဵု မာဲချံက် ကၟိန်ဍုင်သေံဂှ်တုဲ သီုၜါလ္ပာ်ဂှ် က္လေင်ပန်ပှော်မံင်ကဵု လွဟ်ဍောတ်၊ လွဟ်ဇၞော် ဇၟာပ်တ္ၚဲရ။
ရေင်ကွဳစက်ထံက်ပင်ပ္ဍဲဗလးတိ ဒပ်ကမ္မယှေန်ပၞာန်တံဝွံ ဟိုတ်နူဒးဒုင်ကြတ်ဗ္တိုက်ကဵု ဂကောံဒပ်ပံင်ကောံပၠန်ဂတးတံဂှ်ရ ဇွောံမစၞစကဵု ကပေါတ်လွဟ်လနက်ဂမၠိုင်ဂှ် အဓိက ဒးပလံင်ဗ္စိုပ်ဒၟံင်ကဵုက္ၜင်ကျာဟေင် ဂွံတီကေတ်ရ။
ဒပ်ကမ္မယှေန်ပၞာန်တံ အဃောဂိုတ်ဂ္စာန်ဒၟံင် သွက်ဂွံက္လေင်သီ ဗဒိုပ်ဂကောံဒပ်ပၠန်ဂတးဂမၠိုင်ဂှ်ဝွံ လွဟ်ဇၞော်မပန်ပှော်ဏာလ္ၚဵုတံဂှ် အာဒတုံခတိုဟ်ဒး သ္ၚိဒၟံင်လ္ၚဵု အပ္ဍဲကွာန်ဘာန်ဟိုဲအ်မဟာဝါန်ပယျဵုသေံဂှ်နွံကီုလေဝ် ညးဍုင်ကွာန်/ညးဒေသတံ ဟွံဒးဘဲဝပ်ရ။
လ္ပာ်ဗၟာဏံ ရမျာင်ပေဲါဗ္တိုက်သ္ကာတ်မြဟ်ဗက်ကၠုင်ဟွံဂတာပ် ညးဒေသကောန်ကွာန် မၞုံမွဲဒမြိပ်ပယျဵုတံ ဟွံဂံင်မံင် ပ္ဍဲသ္ၚိဒၟံင်တုဲ ကၠောန်သ္ပဒစးဒုင်ပလေဝ်ပလေတ်ရ။
ပ္ဍဲမွဲဒမြိပ်ပယျဵုဂှ်ဝွံ အခိင်ကၠာတေံလေဝ် ဟိုတ်နူပေဲါဗ္တိုက်တုဲ ကမ်လွဟ်ဒတုံစှေ်ဒၟံင်လ္ပာ်သေံ မွဲနှေံမွဲနှေံတုဲ ဟိုတ်နူဒးမိင်မံင်ရမျာင်လွဟ်ထတ်ထတ်ဂှ်ရ ညးဒေသဂမၠိုင် ကတဵုဒှ်ဓဝိင်တုဲ ဒးမံင်တန်တဴဒၟံင် နကဵုသတိကီုရ။
ဟိုတ်နူပေဲါဗ္တိုက်ပယျဵု ကတဵုဒှ်မံင်လၟုဟ်ဏံဂှ်ရ နကဵုညးတာလျိုင်သေံဂမၠိုင်တံဝွံ ပ္ဍဲမွဲဒမြိပ်ပယျဵုဂှ် သၠုင်ပ္တိုန် ပရေင်ဂီုကၠီု အာကာသ ကေုာံ ဗလးတုဲ မင်ရံင်ဒၟံင်နွံရောင် ဂွံတီကေတ်ရ။