သၞေဟ်ကင်စၟဳစၟတ်အၜေတ်၊ မၞုံပ္ဍဲသ္ကုတ်ဂၠံင်အၜေတ်-ခလေဝ်တဃောန်တိုင်၊ ပွိုင်ဍုင်မုဟ်ဍုင်၊ တွဵုရးဍုင်မန်ဂှ်ဝွံ ကိစ္စဓရတ်ကံက်ကေတ်သြန် ကုညးအာတရဴနူဌာန်သ္ၚောဲ (ညးဒေသဟွံသေင်) တံဂှ် သာတုဲပရေံဂၠိုင်ကၠုင်ဒၟံင်ရောင် ညးဍုင်ကွာန်အာတရဴကဵု ညးဒဳကွဳစက်တံ ဟီုရ။
အခိင်ကၠာတေံမ္ဂး ကၠောန်သ္ပပ္ည္ညဳပ္ညပ်ကဵု ညးဒဳကွဳစက်နွံကီုလေဝ် အခိင်လၟုဟ်ဏံဂှ် နအလဵုဇကုညးတံ စၟဳစၟတ်ညးအာတရဴဂမၠိုင်တုဲ ညးအာတရဴနူဌာန်သ္ၚောဲမွဲတၠမ္ဂး ဒးကဵုမံင်သြန် ဟွံအောန်နူ (၂၀၀၀၀) ဒကေဝ်နွံရောင် ညးဒဳကွဳစက်ဂြိပ်မံင်ဂၠံင်ဍာန်ဂှ်မွဲတၠ ဟီုရ။
“ဟွံကဵုတှ်ေ စၟဳစၟတ်အခိင်လအ်လအ်တံ၊ သၟာန်သၟုက်တံနွံရ။ ညးအာတရဴတံလေဝ် ဂွိင်ဖေက်တရဴလအ်တုဲ ၜိုတ်အာတ်လှုဲဂှ် ကဵုမံင်ရ။ ကၠာတေံတှ်ေ သဳကၠဳပ္ညဳပ္ညပ်ဂွံရ။ လၟုဟ်ဏံ တၞးကာဒ်ကောန်ဍုင်ဒေသသ္ၚောဲမွဲတှ်ေ ၜါဠက်ဒကေဝ်ရ။ အေလှုဲဂှ်တှ်ေ ညးအာတရဴတံ ဒးကဵုရ” သာ်ဝွံ ညးဒဳကွဳစက်ဂှ် ဟီုရ။
နကဵုညးအာတရဴနူဌာန်သ္ၚောဲတံဝွံ သၟာင်နူဒးဒုင်စၟဳစၟတ် တၞးကာဒ်ကောန်ဍုင်ဂှ်မ္ဂး ဟိုတ်ဖဵုအာတရဴ၊ ဒၞာဲအာ ကေုာံ အကာဲအရာလၟေင်တရဴဂမၠိုင်ဂှ်လေဝ် ဒးဒုင်သၟာန်သၟုက်တုဲ ကဵုသြန်တုဲဒှ်ဟေင် အခေါင်ဆက်တရဴနွံရောင် ဂွံတီကေတ်ရ။
ဟိုတ်ဂှ်ရ ညးအာတရဴတံ ဒးအိုတ်စရိတ်တရဴ ဂၠိုင်နူစၟတ်လဝ်ဂှ်တုဲ ဒးဒုင်စၟဳစၟတ်သၟာန်သၟုက်ဒၟံင် အခိင်လအ်လဂှ်ရ လၟေင်တရဴ လဇုဲလဇမံင်နွံရောင် ညးအာကၠုင်မံင်တရဴ သ္ကုတ်ဂၠံင်ဂှ်မွဲတၠ ဟီုရ။
“သၟာကွဳစက်ဒေသတံဂှ်တှ်ေ ဟွံမိက်ဖ္ဍိုက် မၞိဟ်နူဌာန်သ္ၚောဲတံပုဟ်။ ဟွံမိက်ပယှုက် ပ္ဍဲဂုက်အၜေတ်ဂှ်၊ ပဲါမံင်ရ။ ကၠာတေံတှ်ေ သၟာကွဳစက်တံဂှ် အာတ်စရိတ်ကွဳစက် နူညးအာတရဴ နူဌာန်သ္ၚောဲတံဂၠိုင်ဂၠိုင်တုဲ ညးတံရ ကဵုမံင်ၚုဟ်ဂုက်” သာ်ဝွံ ဟီုရ။
ညးဒဳကွဳစက်ဖ္ဍိုက်ကပေါတ်ဂမၠိုင်တံလေဝ် ကွဳစက်မွဲဖ္ဍိုက်မ္ဂး ဒးကဵုဒၟံင်သြန် စဵုကဵုအကြာ (၃၀၀၀၀၀) ဒကေဝ်တုဲ လ္ၚဵုတံဂှ် သၟာင်နူသြန်မ္ဂး ဒးကဵုဒၟံင် သီုကပေါတ်ဗၞိက်ရ။ တုဲပၠန် သၞေဟ်ကင်စၟဳစၟတ် ဂကောံရပ်လွဟ်အပ္ဍဲဒေသတံလေဝ် နကဵုစၟတ်လဝ်ဟၟဲမွဲသာ် အာတ်ဓရတ်ကေတ်မံင်သြန်လေဝ်နွံရ။
သ္ကုတ်ဂၠံင်ကွဳစက် မုဟ်ဍုင်-လှာဒကှ်-ကျာ်ပိ သၞေဟ်ကင်စၟဳစၟတ်ကမ္မယှေန်ပၞာန် မနွံတန်တဴဒၟံင်ဂှ်ဝွံ နူတွဵုရးဍုင်မန် – တွဵုရးကရေင်သၟးဟွံသေင် ကာလအာကၠုင် ဇရေင်ဍုင်ကျာ်ပိ မၞုံပ္ဍဲဒေသပယျဵုသေံဗၟာဂှ်လေဝ် ဒှ်ဂၠံင်ဍာန်စကာအဓိကမွဲရ။
ပ္ဍဲသ္ကုတ်ဂၠံင်ကွဳစက်ဂှ်ဝွံ ညးဒေသအာတရဴဂမၠိုင်၊ ညးအာတရဴနူဌာန်သ္ၚောဲဂမၠိုင် ကေုာံ ကွဳစက်ပလံင်ဗ္စိုပ်ကပေါတ်ဗၞိက်ဂမၠိုင် လၟိဟ်ကြပ်ကဵုကၠံ အာကၠုင်တတ်ကၠောံမံင် ဇၟာပ်တ္ၚဲနွံရောင် ဂွံတီကေတ်ရ။