သ္ကိုပ်ဒပ်/သၟိင်ပၞာန် “တပ်ချုပ်” သ္ကိုပ်ပၞာန်ဇၞော်ယျေဝ်ဝေန်ဥူ မစိုပ်ဒၟံင်ကၟိန်ဍုင်သေံ သွက်ဂွံတိုန်စိုပ် ပေဲါကောံဓရီုညးတာလျိုင်အဆံင်သၠုင်သေံ-ဗၟာဂှ်ဝွံ နူတနေံဏံ ဂိတုအဝ်ဂေတ် (၁၉) ဂှ် ဆဵုဂဗလဝ်ကဵု သ္ကိုပ်က္ဍိုက်က္ဍိုပ်ပရေင်စဵုဒၞာ ဒပ်ပၞာန်ဨကရာဇ်သေံရ။
ပ္ဍဲကဵုပေဲါဆဵုဂဗဂှ်ဝွံ အကာဲအရာ သွက်ဂွံပံင်ကောံထိင်ဒဝ်ဗ္တိုက်သရိုဟ် ကိစ္စဆေင်စပ်ကဵု အမှုတတ်ကၠောံပယျဵု ကေုာံ ပရေင်သွံရာန်လွဟ်လနက်ဒမၠုက်ဂမၠိုင်ဂှ် သဳကၠဳလဝ်ရ။
တုဲပၠန် ပရေင်ကူသာန်ဗၞိက်ဒေသပယျဵုၜါဍုင် သ္ဂောံက္လေင်ခိုဟ်ကၠုင်ဂှ်မ္ဂး ဒးနွံပၟိက်ကဵု ပရေင်ၜိုဟ်လလမ်ဒေသပယျဵုတုဲ အကြာဒပ်ပၞာန်ၜါဍုင်ဏံ သွက်ဂွံပံင်ကောံထိင်ဒဝ်အာဂှ် နွံပၟိက်ရောင် ဂးရ။
ညးဒေသကျာ်ပိမွဲတၠဂှ် “ယျေဝ်ဝေန်ဥူ ဒှ်ကၠုင်သ္ကိုပ်ဒပ်တုဲဂှ် ကၠတ်ထဝ်တံ၊ မုတံ ဒက်ကၠုင်ရ။ သ္ကိုပ်ပၞာန်ဇၞော်အိုတ် မေန်အံင်လှာင် ဒှ်သမ္မတတုဲဂှ် ကိုန်စဳဇန် (၁၀၀) တ္ၚဲ မံက်ကၠုင်ရ။ ပ္ဍဲကဵုကိုန်စဳဇန် (၁၀၀) တ္ၚဲဂှ်တှ်ေ ဒေသမၞုံမွဲဒမြိပ်ပယျဵုသီုဖအိုတ်ဂှ် က္လေင်အာတ်ကေတ် နူဂကောံရပ်လွဟ်တံလေဝ်နွံ၊ က္လေင်ဗ္တိုက်ဏာဂှ်လေဝ်နွံရ။ ဒေသပယျဵုဗွဲမဂၠိုင် က္လေင်စိုပ်အာ သၟဝ်တဲကမ္မယှေန်ပၞာန်လေဝ်နွံ” သာ်ဝွံ ညးဟီုရ။
ပ္ဍဲကဵုသ္ကိုပ်ဒပ်/သ္ကိုပ်ပၞာန် ၜါဍုင်တံ ဆဵုဂဗဂှ်ဝွံ သွက်ဂွံထိင်ဒဝ် ပရေင်ကူသာန်ဗၞိက်ဟွံဗဗွဲဓဝ် ပ္ဍဲဒေသပယျဵုကီု၊ အကာဲအရာဗ္တိုက်သရိုဟ် ပရေင်ဝေင်္ၚေင်လီသြန်လ္တူအန်လာင် မၞုံပ္ဍဲဒေသပယျဵုၜါဍုင်ဂှ်ကီု သဳကၠဳလဝ်ရ။
နကဵုကၟိန်ဍုင်ဗၟာဝွံ သၟာင်နူအကာဲအရာပံင်ကောံရေင်တၠုင်မာန် အပ္ဍဲဂကောံအာဇြဳယာန်တုဲ ဆေင်စပ်ကဵု ပရေင်ပ္ကတ်ပ္ကေင် အကြာဒပ်ပၞာန်ၜါဍုင်ကီု၊ ကိစ္စပံင်ကောံရေင်တၠုင် တန်ဗ္တောန်ဂမၠိုင်ဂှ်လေဝ် သဳကၠဳလဝ်ကီုရ။
သွက်ဂွံတိုန်စိုပ် ပေဲါကောံဓရီုညးတာလျိုင်အဆံင်သၠုင်ဗၟာ-သေံ မရနုက်ကဵု (၉) ဝါဏံဂှ် သ္ကိုပ်ဒပ်/သၟိင်ပၞာန် သ္ကိုပ်ပၞာန်ဇၞော်ယျေဝ်ဝေန်ဥူ၊ သ္ကိုပ်ကောပ်ကာဲပ္ညဳပ္ညပ် (ကြည်း၊ ရေ၊ လေ) သ္ကိုပ်ပၞာန်ဇၞော်ကိုဝ်ကိုဝ်ဥူ ကေုာံ ညးတာလျိုင်တၞဟ်တၞဟ်တံ ပါဗက်ကၠုင်ရ။
ပ္ဍဲမွဲဒမြိပ်ပယျဵုသေံဗၟာဂှ်ဝွံ ဗော်ဍုင်မန်တၟိ (NMSP) ၊ ဗော်သွးကရေင် (KNU) ၊ ကံင်ဇြဳက္လေင်ဒက်ပ္တန်ရးသေံ (RCSS) ကီု သီုဂကောံရပ်လွဟ် ကောန်ဂကူကောန်ဍုင်အရင်တၞဟ်တၞဟ်ဂမၠိုင်တံလေဝ် သ္ပသဇိုင်ချဳဓရာင်မံင်တုဲ ဂကောံပၠန်ဂတးရပ်လွဟ်နာနာတံလေဝ် ချဳဓရာင်ဒၟံင်နွံရ။