အပ္ဍဲဂကောံကွာန်ဘာ၊ ပွိုင်ဍုင်ရေဝ်၊ တွဵုရးဍုင်မန်ဝွံ နူတနေံဏံ၊ ဂိတုအဝ်ဂေတ် (၂၀) ၊ အခိင်နူဂယးဂှ် ကတဵုဒှ် ပရေင်ဍာ်ဇၞော်ဍာ်ကလိုပ်တုဲ ညးဒၟံင်တန်တဴမံင်ကြပ်ၜဳတံ စပြံင်ဆုဲဒၟံင်ယျရောင် ဂွံတီကေတ် နူညးဒေသတံ ဟီုဂးလဝ်ရ။
နူတနေံဏံ ဂိတုအဝ်ဂေတ် (၂၀) ၊ အခိင်သဝ်တ္ၚဲဂှ် ဍာ်ၜဳကွာန်ဘာ သၠိုင်တိုန်ကၠုင် စဵုကဵု (၈) ပေတုဲ ဟိုတ်နူဗြဲဆက်ဂူဂှ်ရ ထပ်သၠုင်တိုန်မာန်ရောင် ညးဒေသတံ ဟီုရ။
ဟိုတ်ဂှ်ရ ညးဒေသဒၟံင်တန်တဴကြပ်ၜဳတံဝွံ နူတနေံဏံ ဂိတုအဝ်ဂေတ် (၂၀) ဂှ် ကၠောန်သ္ပမံင် ပရေင်ပြံင်ဆုဲကာတၟေင်ရောင် ဂးရ။
“နူကဵုကွာန်ဘာဂှ် အာကွာန်တၞဟ်လေဝ် ဟွံဂွံပုဟ်။ နူကွာန်တၞဟ်လေဝ် ကၠုင်ဟွံဂွံရပုဟ်။ ပ္ဍဲကဵုအရာပ်ကွာန်ဘာဂှ်တှ်ေ ဍာ်လုပ်မံင်ဣရ။ ညးပြံင်ဂှ် ပြံင်မံင်ရ။ ဍာ်ၜဳဂှ်ဂၠိုင်ကၠုင်တှ်ေ သဝ်တ္ၚဲဂှ် (၈) ပေ၊ လၟုဟ်ပြင်မံင်တုဲ ဗြဲဆက်ဂူမံင်တှ်ေ သွက်ဂွံတိုန်ရနွံ” သာ်ဝွံ ညးဒေသကွာန်ဘာမွဲတၠ ဟီုရ။
တုဲပၠန် ပ္ဍဲလ္တူဂၠံင်ကွဳစက်ဍာ်တတ်ၜက်ဒၟံင်ဂှ် ဟိုတ်နူဍာ်ဇွောဝ်ထတ်မံင်ဂှ်ရ ကွဳလိုန်ဓာတ်ကဵု ကွဳစက်ဂမၠိုင်လေဝ် တတ်အာကၠုင်ဟွံဂွံကီု ညးဒေသမွဲတၠဂှ် ဟီုရ။
ပ္ဍဲကဵုကွာန်ဘာဝွံ ဟိုတ်နူဒးဒုင်ဗ္တိုက်ကဵုက္ၜင်ကျာတုဲ ညးပဲါဒဴဘဲပၞာန် ပြံင်ဆုဲတန်တဴဒၟံင်တံဂှ်လေဝ် ဟိုတ်နူဘဲဍာ်ဏံပၠန်တုဲ ထပ်ဒးပြံင်ဆုဲမာန်ရောင် ကောန်ကွာန်တံ ဟီုရ။
ပ္ဍဲကဵုပွိုင်ဍုင်ဗွဲမဂၠိုင် သ္ကုတ်သၠုင်ကျာတွဵုရးဍုင်မန်ဂှ်ဝွံ ဗြဲဇၞော်ဆက်ဂူဒၟံင်ၜါတ္ၚဲတုဲ စနူဂိတုအဝ်ဂေတ် (၂၀) ၊ နူတနေံဏံ အခိင်ဒေါဝ်တ္ၚဲဂှ်တုဲ ပ္ဍဲကဵုဒၞာဲသ္ကုတ်တိသဝ်ဂမၠိုင်ဂှ် ဍာ်ဇၞော်ဍာ်ကလိုပ်မံင်ရောင် ဂွံတီကေတ် နူညးဒေသဂမၠိုင်တံရ။