အပ္ဍဲဒေသကၞောတ်ၜဳရေဝ်၊ ပွိုင်ဍုင်ရေဝ်ဝွံ ဟိုတ်နူဒပ်ကမ္မယှေန်ပၞာန်တံ ဗ္တိုက်ကဵုက္ၜင်ကျာဂှ်ရ ညးဒေသဂမၠိုင် ဒးပဲါဒဴဒၟံင်တုဲ ဒးဆဵုဂဗဒၟံင်ကဵု တင်ကော်ဆော ပရေင်စသုင်မံင်စံင် ကေုာံ ပရေင်ဂီုကၠီုရောင် ညးပဲါဒဴဘဲပၞာန်တံ ဟီုရ။
ပ္ဍဲဂိတုအဝ်ဂေတ် စၟတ်တ္ၚဲ (၁၁) တုဲကၠုင်ဏံဂှ် ပန်ဗ္တိုက်ဏာကဵုက္ၜင်ကျာတုဲ စဵုကဵုတ္ၚဲဏံ ဂေတ်ပဝ်ထံက်မံင်ကင်ကဵုက္ၜင်ကျာဂှ်ရ ညးဒေသကြပ် (၁၀၀၀) တၠ ဟွံအောန်နူ (၅) ကွာန်၊ အပ္ဍဲဂကောံကွာန် ကွာန်ဘာဂှ် ဒးဂြိပ်ပဲါဒဴဒၟံင်ဒၞာဲကြပ်တံဂှ်ရ။
အခိင်ဟွံရုဲ ဒးဒုင်ထပ်ဗ္တိုက်မာန်ကီုလေဝ် သွက်ပရေင်စသုင်မံင်စံင်ဂှ် ဂွံအာမင်ရံင် သ္ၚိဒၟံင် ကေုာံ ကၠအ်ဂူဂမၠိုင်မာန်ဂှ်ရ ဒးဂြိပ်ပဲါဒဴဒၟံင် အကြာပွဳဗွိုင်ဂှ်တုဲ ပရေင်ဂီုကၠီုဟွံမွဲရောင် ညးပဲါဒဴဘဲပၞာန်ကၞောတ်ၜဳရေဝ်မွဲတၠ ဟီုရ။
“ကဵုၜင်ကျာဟီုတှ်ေ ဒၞာဲလဵုထောံဖျေံဂှ် ဟွံတီပုဟ်။ လၟုဟ် ပဲါဒဴမံင်ပ္ဍဲကွာန်ဘာကီုလေဝ် ဒၞာဲဏံလေဝ် အခိင်ဟွံရုဲ ဒှ်အာမွဲသာ်မာန်မံင်။ သွက်ဂွံပဲါဂှ် ဒၞာဲလဵုလေဝ် ဟွံဂီုကၠီုပုဟ်။ လၟုဟ် ဒှ်မံင်ဂှ်တှ်ေ ဒၞာဲတိဍာ်ကေအေန်ယူထိင်ဒဝ်ရ” သာ်ဝွံ ညးဟီုရ။
အပ္ဍဲဒေသကၞောတ်ၜဳရေဝ်ဝွံ သ္ပပဓာန်မံင်ကဵု ကမၠောန်ထ္ၜိုတ် ကေုာံ သတ်ကီု သီုသတ်ဆုတိတ်နူဒေသဂမၠိုင်တုဲ အကြာဒးဒှ်ဓဝိင်ကဵု ဘဲအန္တရာဲက္ၜင်ကျာဂှ်ရ ဒှ်ဓဝ်စံင်တူကဵု ပရေင်ဖံက်လုပ်သ္ၚိ ကေုာံ သတ်ဆုကၠေံတုဲ ဒးအာစိုပ်မင်ရံင်ဒၟံင် ပ္ဍဲဇရေင်ကၠအ်ဂူတေံရ။
တုဲပၠန် ပ္ဍဲဂိတုအဝ်ဂေတ် စၟတ်တ္ၚဲ (၁၅၊ ၁၆) တုဲကၠုင်ဏံဂှ်လေဝ် ဟိုတ်နူဗြဲဇၞော်ဂူဂှ်ရ အကြာပွဳပွိုင်ကွာန်၊ ကွာန်ဘာဂှ် ဍာ်ဇၞော် ဍာ်ကလိုပ်တုဲ ညးပဲါဒဴဘဲပၞာန်တံ အာကၠုင်ခက်ခုဲကီု ဂွံတီကေတ်ရ။
မွဲလ္ပာ်ပၠန်ဂှ်လေဝ် က္ၜင်ကျာဒပ်ပၞာန်တံ ပဝ်ဂေတ်ထံက်မံင်ကင် သီုဗ္တံသီုတ္ၚဲတုဲ အခိင်ဗ္တံဂှ် ဂွံမိင်ကေတ်ရမျာင်ကြပ်ကြပ်ရဂှ်လေဝ် ညးဒေသရေဝ်မွဲတၠဂှ် ဟီုရ။
“ အခိင်ဗ္တံတှ်ေ (၉) နာဍဳ ကၠုင်ရ။ ဆဠတှ်ေ ၜိုတ် (၁၁) နာဍဳ ကၠုင်ရ။ ဒှ်မံင်ဗီုပြင်ထံက်ကင်၊ ဂေတ်မံင် ပ္ဍဲပွဳဗွိုင်မ္ၚးကွာန်ရ။ ဆဠတှ်ေ သဝ်သဝ်ဟေင်ရ။ ဗွဲမဂၠိုင်ဂှ်တှ်ေ ဒှ်ဓဝိင် ထပ်ထောံဖျေံဗမ်ရ။ လ္ၚဵုတံ စဴကၠုင်ဟွံလအ်ဏီပုဟ်၊ လၟုဟ် က္လေင်ပဲါအာပၠန်ရ” သာ်ဝွံ ညးဟီုရ။
ပ္ဍဲဒေသကၞောတ်ၜဳရေဝ် ဗော်ဍုင်မန်တၟိထိင်ဒဝ်ဂှ်ဝွံ အပ္ဍဲဂိတုမေတုဲကၠုင်တေံ သၟာင်နူဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာတုဲ သီုဂေတ်ပဝ်ထံက်မံင်ကင်လ္တုအာကာသ သီုဗ္တံသီုတ္ၚဲဂှ်ရ ညးဒေသ (၁၀၀၀) ပြင် ဒးဂြိပ်ပဲါဒဴတုဲ အပ္ဍဲဂိတုဂျူလာင်ဂှ် က္လေင်စဴလဝ်ဌာန်ရောင် ဂွံတီကေတ်ရ။
ဂိတုအဝ်ဂေတ် စၟတ်တ္ၚဲ (၁၁) တုဲကၠုင်ဏံဂှ်လေဝ် ပ္ဍဲကဵုဗဒဲါကွာန် (ချောထာ) ကေုာံ ကွာန် (ကျောင်တိုင်)၊ ဂကောံကွာန်ဘာ၊ ပွိုင်ဍုင်ရေဝ်ဂှ် ဟွံဒှ်ပေဲါဗ္တိုက်မွဲသာ် ပန်ဗ္တိုက်ထောံဖျေံဗမ်ကဵုက္ၜင်ကျာ (၅) မရ။
ပ္ဍဲပွိုင်ဍုင်ရေဝ် ဇြဟတ်ချဳဓရာင် ဂကောံဒပ်ပၠန်ဂတးခိုဟ်မံင်ဂှ်ဝွံ စနူသၞာံဏံမံက်တုဲ နူဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာ အဆက်ဆက်နွံရ။